Bakı, 27 dekabr, AZƏRTAC

Müdafiə Nazirliyinin təşkilatçılığı ilə Bakı şəhərindən start götürən “Heydər Əliyev İli”nə Zəfər bayrağı ilə!” adlı vətənpərvərlik marafonunun növbəti ünvanı Vətən müharibəsinin 13-cü günündə işğaldan azad edilən Xocavənd rayonunun Hadrut qəsəbəsində bir il öncə dekabrın 24-də Azərbaycan Prezidenti, Müzəffər Ali Baş Komandan İlham Əliyevin açılışını etdiyi Əməliyyat Komando briqadası olub.

AZƏRTAC xəbər verir ki, yaradılmasının birinci ildönümünü böyük ruh yüksəkliyi ilə qeyd edən briqadanın şəxsi heyəti fəxri qarovul dəstəsinin müşayiəti və “Qələbə marşı”nın sədaları altında hərbi hissəyə gətirilən Zəfər bayrağını alqışlarla qarşılayıblar.

“Dəmir yumruq” abidəsi ziyarət olunduqdan sonra vətənpərvərlik marafonunun iştirakçılarına məlumat verilib ki, bu Əməliyyat Komando briqadası Müzəffər Ali Baş Komandan İlham Əliyevin açılışını etdiyi, döyüş bayrağı təqdim olunan ilk hərbi hissədir. Ötən müddətdə hərbçilərimiz döyüş və mənəvi-psixoloji hazırlıqda bir çox uğurlara imza ataraq qarşıya qoyulan mühüm tapşırıqların layiqincə yerinə yetirilməsi üçün səylərini əsirgəməyiblər. Hər bir əsgər və zabit yaxşı bilir ki, Hadrutdakı bu hərbi hissənin açılışı Prezident İlham Əliyevin dediyi kimi, çox böyük əhəmiyyət daşıyır. Çünki bu hərbi hissə işğaldan azad edilmiş ərazidə - Xocavənd rayonunda açılıb və Ordumuzun sərəncamına verilib. Bu strateji qəsəbənin işğaldan azad edilməsi isə bizim gələcək planlarımıza dəstək verdi. Çünki əgər biz Hadrutu işğalçılardan azad etməsəydik, gələcək əməliyyatlarımızda daha böyük çətinliklərlə üzləşə bilərdik.

Hərbi şəhərcikdə yaradılan şərait, maddi-texniki təminatın yüksək səviyyədə olması, hər bir döyüşçünün qələbə əhval-ruhiyyəsi ilə yaşaması, Ali Baş Komandanın əmrlərinə hər an hazır olması marafon iştirakçılarını ilk tanışlıqdan heyran edib.

“Heydər Əliyev İli”nə Zəfər bayrağı ilə!” adlı vətənpərvərlik marafonu çərçivəsində keçirilən növbəti tədbir başlamazdan öncə Ümummilli Lider Heydər Əliyevin və unudulmaz şəhidlərimizin xatirəsi bir dəqiqəlik sükutla yad edilib, Dövlət Himni ifa olunub.

Şuşayacan şərəfli döyüş yolu keçmiş “Qarabağ” ordenli zabit Elmir Abdullayev marafon iştirakçılarını salamlayaraq Prezident, Müzəffər Ali Baş Komandan İlham Əliyevin sıra meydanında düz bir il əvvəl şəxsi heyətin qarşısında çıxış edərkən söylədiyi “Ordu dövlət tərəfindən, Prezident, Ali Baş Komandan tərəfindən daim diqqətlə əhatə olunub. Bu diqqət və qayğının nəticəsində bu gün Azərbaycanın müzəffər Ordusu dünyada məhz müzəffər, döyüş meydanında qalib gəlmiş ordu kimi tanınır” fikirlərini xatırladıb və böyük inam hissi ilə bəyan edib ki, Azərbaycan komandosu da “Heydər Əliyev İli”nə Zəfər bayrağı ilə!” qədəm qoyan hərbçilərin ön cərgələrindədir.

İgid döyüşçü E.Abdullayev deyib: “Müzəffər Ali Baş Komandan cənab İlham Əliyev bir il öncə əsgəri şərəf, şücaət və şöhrət rəmzi kimi hərbi hissənin hər bir qulluqçusuna Vətənə sədaqətlə xidmət etmək, öz qanını və canını belə əsirgəmədən onu mərdlik və bacarıqla müdafiə etmək, qoşunlara həvalə olunmuş xidməti döyüş tapşırıqlarını əzmlə yerinə yetirmək, doğma torpağın hər qarışını düşməndən qorumaq borcunu xatırlatmaq üçün hərbi hissəmizə döyüş bayrağı təqdim etdi. Həmin gün komandirimiz polkovnik Sanayev döyüş bayrağını qəbul edərkən şəxsi heyət adından möhtərəm Prezidentimizin qarşısında babalarımızın qanı bahasına ucalan bu şanlı döyüş bayrağını öz canından da əziz bilib yüksəkliklərdə tutacağına and içdi.

Komandirimiz “Ulu Öndər Heydər Əliyevin ruhunu yaşadan bu şanlı döyüş bayrağını məndən sonra sağ qalana təhvil vermədən ölmək mənə haram olsun. İçdiyim bu anda sadiq qalacağımı və ehtiramımı bildirmək üçün bayrağımı öpür və təhvil alıram”, - deyə əminliklə deyib.

Biz yenə də andımıza sadiqik və Müzəffər Ali Baş Komandanın əmrlərini canımızla, qanımızla yerinə yetirməyə hər an hazırıq. “Heydər Əliyev İli”nə Zəfər və döyüş bayraqları ilə qədəm qoyacağıq. “Heydər Əliyev İli” Azərbaycan Ordusunun da yeni Zəfər ili olacaqdır.

Tədbir iştirakçılarını Müdafiə Nazirliyinin rəhbərliyi adından salamlayan layihənin müəllifi polkovnik Abdulla Qurbani vətənpərvərlik marafonunun bütün qoşun növlərini, birlik birləşmə və hərbi hissələri əhatə etdiyini bildirib, “Heydər Əliyev İli”ndə Azərbaycan Ordusunda keçiriləcək tədbirlərin anonsunu verib və şəxsi heyəti qarşıdan gələn bayramlar münasibətilə təbrik edib.

Tədbirin aparıcısı Hərbi Dəniz Qüvvələrinin zabiti Rüstəm Əliyevin söylədiyi “Heydər Əliyev İli” adlı şeir böyük maraqla dinlənilib və tədbir iştirakçıları da ona səsinə qoşulublar.

Vətən üçün alışır ocağımız, közümüz,

Çiçəklər üstdə mehdi hər kəlməmiz, sözümüz,

Bu bayram işığında qüdrət olduq özümüz

“Heydər Əliyev İli” - bizim əziz ilimiz!

Buludları dağılmış neçə dağım var mənim,

Atlar cövlan edəsi göy yaylağım var mənim,

Qara bağı qırılan Qarabağım var mənim

“Heydər Əliyev İli” - bizim əziz ilimiz!

Yerə-göyə bəs edən bir “Heyratı” bizik, biz!

Vətən deyən ən gözəl bir bayatı bizik, biz!

Qarşı gələn illərin nəqəratı bizik, biz!

“Heydər Əliyev İli” - bizim əziz ilimiz!

“Heydər Əliyev İli” - yeni Zəfər ilimiz!

Əməkdar artist Cahangir Qurbanov, Mətləb Ağayev, Leyla Əliyeva, Elçin Məmmədov və başqa solistlərin ifa etdikləri Ulu Öndərə həsr olunmuş mahnı və hərbi marşlar alqışlarla qarşılanıb.

Polkovnik-leytenant Cahangir Qurbanovun ifa etdiyi Müzəffər Ali Baş Komandana həsr edilən “Dəmir yumruqlu Prezidentim” mahnısının təqdimatı ilə “Heydər Əliyev İli”nə Zəfər bayrağı ilə!” adlı vətənpərvərlik marafonu çərçivəsində keçirilən növbəti tədbir başa çatıb.