15 oktyabr - Azərbaycan Respublikasında prezident seçkiləri günü yaxınlaşdıqca dağıdıcı müxalifət düşərgəsində, onların üzdəniraq mətbuat orqanlarında qəribə bir çaxnaşma, həyəcan, təlatüm baş verməkdədir. Müxalifət çirkin əməllərinə görə cəmiyyət içərisində rüsvay olduğunu bildikcə daha da azğınlaşır və təbii ki, gücü, ağlı olmadığına görə təhqiri, iftiranı, şəri özünə sipər-qalxan edir.

Dağıdıcı müxalifəti sağlam cəmiyyətimizə bir daha tanıtmaq lazım da deyil, çünki xalqımız on ildən çoxdur ki, onları tanıyır, kimin-kim olduğunu bilir, müxalifət qəzetlərindəki çirkin yazıların mövzusunun neçə illərdir ki, dəyişmədiyinin şahididir. Müxalifət, onun himayə etdiyi qəzetlər əvvəllər necə ağa qara deyirdilərsə, möhtərəm Prezidentimizin respublikamızın inkişafı, tərəqqisi naminə gördüyü nəhəng işlərə necə qara yaxırdılarsa, bu gün də onu o cür davam etdirir. Bu, artıq onlarda mərəzə çevrilmişdir. Sağalmaz xəstəlik onları ömür boyu müşayiət edəcək və onlar həmişə xalq tərəfindən lənətlənəcəklər. Dahiyanə deyilmiş bir kəlam var: Allah pis əməllərinə, çirkin xislətinə görə kiməsə cəza vermək istəyirsə, əvvəlcə onun ağlını əlindən alır. Ağlı əlindən alınmış həmin çirkin xislətli adam layiq olduğu cəzanı elə özü özünə verir.

Bu gün dağıdıcı müxalifətdə olan üzdəniraq adamlar da belədirlər. Çirkin əməllərinə görə Ulu Tanrının qəzəbinə tuş gəliblər və onları bu əzabdan heç nə qurtara bilməz.

Azərbaycan Respublikasında demokratiyanın təntənəsindən sui-istifadə edən dağıdıcı müxalifətin qəzetlərində zəmanəmizin görkəmli dövlət xadimi, dahi şəxsiyyət, Azərbaycan Respublikasının Prezidenti möhtərəm Heydər Əliyevə qarşı mənəvi terror kampaniyasının aparılması respublikamızın bütün qədirbilən insanları kimi, Naxçıvan Dövlət Filarmoniyası kollektivinin də hiddətinə səbəb olmuşdur. Biz dağıdıcı müxalifət mətbuatının, xüsusilə “Yeni Müsavat”, “Hürriyyət”, “Yeni zaman” və “Azadlıq” qəzetlərinin tutduğu mövqeyə qəti etiraz edir və inzibati orqanlardan onların qanun qarşısında məsuliyyətə cəlb olunmasını tələb edirik.

Ölkəmizin mühüm bir hadisə, prezident seçkiləri ərəfəsində olduğu vaxtda bu cür təxribat xarakterli yazıların müəyyən qüvvələrin maraqlarına xidmət etdiyi bizə gün kimi aydındır. Dağıdıcı müxalifətin mətbu orqanları cəzasızlıqdan istifadə edərək, dövlətimizin başçısı haqqında şər, böhtan yazmaqla ictimaiyyəti çaşdırmaq məqsədi güdürlər. Cənab Heydər Əliyevin şəxsiyyəti barədə böhtan, iftira və uydurma, təhqir və hədyan dolu yazıları oxuyanda anlaşılmır ki, bunların müəllifləri və həmin yazıları dərc edən mətbu orqanların rəhbərləri, himayədarları hansı ölkənin vətəndaşlarıdır, onlar hansı dinə, məzhəbə qulluq edirlər. Axı, biz bilirik ki, Azərbaycanda əxlaq anlayışı həmişə uca tutulmuşdur. Onların bu mövqeyi isə əxlaqsızlığa gətirib çıxarır. Əxlaqsızlıq isə xalqımız tərəfindən həmişə lənətlə qarşılanmışdır.

Azərbaycan Respublikasının Prezidenti möhtərəm Heydər Əliyevin səhhəti ilə bağlı yalan məlumatlar yayan Star televiziya kanalının Türkiyə Radio-Televiziya Ali Qurumunun qərarı ilə bir ay müddətinə bağlanması respublika Mətbuat Şurasına da təsir etməli, Şura yaranmış vəziyyətə, problemlərə öz münasibətini bildirməlidir.

Biz, Naxçıvan Dövlət Filarmoniyasının kollektivi xalqımızın əvəzsiz lideri möhtərəm Heydər Əliyevin daxili və xarici siyasətini ürəkdən dəstəkləyir, üzdəniraq müxalifətə, onların mətbu orqanlarına “ar olsun!” deyirik və bir daha bildiririk ki, qarşıdan gələn prezident seçkilərində biz yalnız dahi şəxsiyyət Heydər Əliyevi dəstəkləyəcəyik.

Bəyanat Naxçıvan Dövlət Filarmoniyası

kollektivinin iyulun 30-da keçirilmiş

ümumi yığıncağında qəbul edilmişdir.