Bakı, 18 noyabr, AZƏRTAC

Prezident, Müzəffər Ali Baş Komandan İlham Əliyevin birinci xanım Mehriban Əliyeva ilə birgə işğaldan azad olunmuş Füzuli və Cəbrayıl rayonlarına səfər etməsi, Cəbrayıl və Füzuli şəhərlərində, Xudafərin körpüsündə Azərbaycan bayrağını ucaltması mühüm siyasi mesaj, tarixi məqam oldu. Prezident İlham Əliyevin işğaldan azad edilmiş ərazilərə səfəri Qələbənin rəsmiləşdirilməsi demək oldu. Təsəvvür edin, Ermənistanda Paşinyanın öz xalqından gizləndiyi bir vaxtda, Azərbaycanda Prezident İlham Əliyev müzəffər Ordusu ilə Qələbəni bayram etmək üçün Füzuli və Cəbrayıl rayonlarında oldu. Bu, şanlı Qələbəmizin, Zəfərimizin nidasıdır.

Bunu AZƏRTAC-a açıqlamasında Yeni Azərbaycan Partiyası Nizami rayon təşkilatının sədri, Milli Məclisin deputatı Sədaqət Vəliyeva deyib.

Siyasi, diplomatik və hərbi müstəvilərdə düşmən üzərində üstünlük qazanmış Prezident İlham Əliyevin bu səfərinin qalib xalqın Müzəffər Ali Baş Komandanının səfəri kimi tarixə düşdüyünü qeyd edən deputat deyib: “Hər bir Azərbaycan vətəndaşının Prezidenti olan İlham Əliyev Füzuli və Cəbrayıl rayonlarına səfəri ilə, eyni zamanda, hər bir hərbçinin də Ali Baş Komandanı olduğunu aşkar şəkildə nümayiş etdirdi. İşğaldan azad olunmuş bölgələrdə qəhrəman Prezidentini coşqu ilə qarşılayan qalib xalq da ona sevgisini və etimadını göstərdi. Müzəffər Ali Baş Komandanın bölgələrdə izdihamla qarşılanması ölkəmizdə yaşanan xalq-iqtidar birliyindən xəbər verir. Füzuli rayonuna səfəri zamanı sakinləri salamlamaq üçün avtomobilindən düşən Prezident İlham Əliyevin əhali tərəfindən xüsusi coşqu və izdihamla qarşılanması deyilənlərin əyani sübutudur. Qələbədən sonra işğaldan azad olunan bölgələrə ilk səfərini edən Prezident İlham Əliyev, əslində, sevinc hisslərini öz xalqı ilə bölüşdü, xalq da qalib Ordunun Müzəffər Ali Baş Komandanını böyük izdihamla qarşıladı. Sözsüz ki, xalqın Ordumuza inamı və dəstəyi, ölkədə yaşanan milli və siyasi həmrəylik qazandığımız Qələbənin ideoloji əsasını təşkil edir. Xalqı dəmir yumruq kimi birləşdirən Prezident İlham Əliyevin “Biz birlikdə güclüyük” şüarı xalqın qalib ruhunun güzgüsünə çevrildi”.

Sədaqət Vəliyeva əlavə edib ki, Prezident İlham Əliyevin Sərəncamı ilə 101,5 kilometrlik Əhmədbəyli-Füzuli-Şuşa avtomobil yolunun layihələndirilməsi və tikintisi üçün 50 milyon manat vəsaitin ayrılması da mühüm tarixi hadisədir. “Bu, işğaldan azad olunmuş ərazilərimizin abadlaşdırılması, yenidən qurulması istiqamətində ilk böyük layihədir. Bu Sərəncam qarşıdakı müddət ərzində görüləcək irimiqyaslı işlərin, layihələrin başlanğıcı oldu. Bu qərar Prezident İlham Əliyevin bütün tarixi torpaqlarımızda bərpa işlərinin aparılması üçün əzminin, qətiyyətinin, siyasi iradəsinin sübutu oldu”, - deyə deputat vurğulayıb.