Bakı, 26 fevral, AZƏRTAC

Azərbaycan Milli Elmlər Akademiyasının Folklor İnstitutunda Xocalı soyqırımını 28-ci ildönümü ilə bağlı tədbir keçirilib.

İnstitutdan AZƏRTAC-a bildirilib ki, əvvəlcə Xocalı soyqırımı qurbanlarının əziz xatirəsi bir dəqiqəlik sükutla yad edilib.

Tədbiri açan Folklor İnstitutunun direktoru, akademik Muxtar İmanov vurğulayıb ki, 1988-ci ildən başlamış Ermənistan-Azərbaycan Dağlıq Qarabağ münaqişəsi dövründə ən müdhiş və faciəli hadisələrdən biri Xocalıda törədilmiş soyqırımıdır. Belə ki, bir gecənin içində qədim Xocalı şəhəri yerlə-yeksan edilib. Şəhəri tərk etməyə məcbur olan əhali dağlara, meşələrə qaçıb. Hər tərəfdə silahlı ermənilər dinc əhalini güllələyib, onlara divan tutub. Yüzlərlə insandan 56 nəfəri xüsusi qəddarlıqla və amansızlıqla qətlə yetirilib. Onlar diri-diri yandırılıb, başları kəsilib, üzlərinin dərisi soyulub, hətta körpə uşaqların gözləri çıxarılıb, hamilə qadınların qarnı süngü ilə yarılıb. M.İmanov bu soyqırımı hadisəsinin qiymətləndirilməsi, dünyaya tanıdılması istiqamətində hər kəsin üzərinə böyük vəzifə düşdüyünü bildirib.

Sonra institutun Folklor studiyasının Xocalı faciəsi ilə bağlı hazırladığı videoçarx izlənilib.

Tədbirdə çıxış edən Mərasim folkloru şöbəsinin müdiri, filologiya üzrə fəlsəfə doktoru, dosent Ağaverdi Xəlil bu soyqırımını törədənlərin hələ də cəzalandırılmadığını bildirib. Cənubi Azərbaycan folkloru şöbəsinin əməkdaşı, filologiya üzrə fəlsəfə doktoru Qiymət Məhərrəmli Xocalı soyqırımının XX əsrin ən dəhşətli və qəddarcasına törədilmiş Xatın, Xirosima faciələri ilə bir sırada durduğunu bildirib. Sonda isə faciə ilə bağlı yazdığı “O gecə” şerini səsləndirib.

Mərasimdə filologiya üzrə fəlsəfə doktoru, dosent, şair Şakir Albalıyev əsirlikdə olarkən erməni vəhşiliyinin bütün üzünü gördüyünü tədbir iştirakçılarının diqqətinə çatdırıb. Müğənni Aşur Adıgözəlov Vətən uğrunda canlarından keçən igid oğullarımızın yaddaşlardan silinməyən qəhrəmanlıqlarından söz açıb.

Sonda akademik Muxtar İmanov bildirib ki, hər il Xocalı faciəsi mövzusunda silsilə tədbirlərin keçirilməsinin bir mənası şəhidlərimizi yad etməkdirsə, digər mənası özümüzü xalq olaraq tanımaq, yaxın-uzaq tarixə baş vurmaq, ibrət dərsi götürmək, düşmənlərimizin törətdiyi vəhşilikləri unutmamaqdır.