QAN YADDAŞI


“Xocalının anımı və Cənubi Qafqazın gələcəyi” mövzusunda dəyirmi masa keçirilib

Bakı, 13 fevral, AZƏRTAC

Qafqaz Jurnalistləri Şəbəkəsi və “Timberwolf Phoenix” Məhdud Məsuliyyətli Cəmiyyətinin birgə təşkilatçılığı ilə “Xocalının anımı və Cənubi Qafqazın gələcəyi” mövzusunda onlayn formatda dəyirmi masa keçirilib.

Diasporla İş üzrə Dövlət Komitəsindən AZƏRTAC-a bildiriblər ki, Xocalı soyqırımı qurbanlarının xatirəsinin bir dəqiqəlik sükutla yad edildiyi tədbir “Timberwolf Phoenix” MMC-nin vitse-prezidenti İrina Tsukermanın moderatorluğu ilə baş tutub.

Xocalıdan xilas olan, lakin hər iki valideyni və yaxın qohumları qətlə yetirilən Yasəmən Həsənova faciə baş verən zaman 12 yaşı olduğunu, bu günədək o qanlı gecəni unuda bilmədiyini, hər gün qulağının səsdə, gözlərinin yolda olduğunu bildirib. Anasının həmin gecə öldürüldüyünü 16 ildən sonra bilən Yasəmən Həsənova onun erməni caniləri tərəfindən əsir götürülmədiyi üçün sevindiyini də dilə gətirib.

Avropa Parlamentinin keçmiş siyasi məsləhətçisi Rino Trombetta ermənilərin Xocalı qətliamındakı hərəkətlərini İkinci Dünya müharibəsindən sonra hazırlanan bütün müqavilə və konvensiyaların tamamilə pozulması kimi dəyərləndirib.

Siyasi şərhçi və yazar Raul Loveri 2016-cı ildə nəşr etdirdiyi “Dağlarda Cinayət ” kitabından bəhs edərək, 7 min sakini olan kiçik Xocalı şəhərinin necə məhv edildiyini, silahsız mülki şəxslərin canlarını qurtarmaq üçün dəhliz vasitəsilə qaçmağa çalışdıqlarını və Ermənistan ordusu tərəfindən onlara qarşı törədilmiş vəhşiliklər haqqında geniş məlumat verib.

Barselona Vəkillər Kollegiyasının üzvü Xaviyer Medina İspaniyada Kataloniya məsələsində ayrılıq yaratmaq istəyənlərlə, hələ o zamanlar SSRİ-yə Azərbaycanı tərk etməsi üçün müraciət edən ermənilərin eyni problemləri olduğunu dilə gətirib. Katalonların və ermənilərin məqsədlərinin separatizm olduğunu bildirib.

Azərbaycan Diaspor Gəncləri şəbəkəsinin üzvü, ABŞ-da yaşayan müstəqil jurnalist Arzu Jaeed faciənin yaxınlaşdığını görəndə atasına əvvəl onu, sonra anasını, sonra da özünü öldürməsini söyləyən beş yaşlı bir qızın hekayəsini danışıb. Azyaşlı bir uşağın bu cür düşüncələrə necə məcbur edilə biləcəyinə təəccübünü gizlədə bilməyib.

Xocalının Azərbaycanın ayrılmaz tərkib hissəsi Qarabağın mühüm strateji yaşayış məntəqələrindən biri olduğunu xatırladan natiqlər qeyd ediblər ki, 1992-ci il fevralın 25-dən 26-na keçən gecə bu şəhərdə erməni silahlı birləşmələri tərəfindən etnik azərbaycanlılara qarşı törədilmiş cinayət bəşəriyyət tarixinin ən qəddar hadisələrindən biri kimi qiymətləndirib. Dəyirmi masa iştirakçıları xalqımızın haqlı və ədalətli mövqeyini dəstəklədiklərini, Azərbaycana səfərləri zamanı ölkəmizin qədim, multikultural, tolerant və müasir dəyərlərə malik ölkə olduğunu öz gözləri ilə gördüklərini bildiriblər.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.