Xüsusi olimpiyaçı qızlar futbol üzrə seçmə yarışlarda iştirak ediblər

Bakı, 19 may, AZƏRTAC

Azərbaycan Xüsusi Olimpiya Komitəsinin təşkilatçılığı ilə Şağan Olimpiya İdman Kompleksində qızlar arasında futbol üzrə seçmə yarışlar keçirilib.

AZƏRTAC xəbər verir ki, yarışlar xüsusi Olimpiya proqramına uyğun olaraq 2 divizionda təşkil edilib. Yekun nəticəyə görə, birinci divizionda Qaradağ rayonu E.Quliyev adına sağlamlıq imkanları məhdud uşaqlar üçün 9 nömrəli xüsusi internat məktəbinin komandası qalib olub. İkinci divizionda isə Sabunçu rayonu 309 nömrəli inklüziv sinifli tam orta məktəbin futbolçuları birinci yerə layiq görülüb.

Yığma komanda ən güclü divizionda qalib gələn komandanın bazasında komplektləşdiriləcək və 2023-cü ildə keçiriləcək beynəlxalq yarışlarda iştirak edəcək.