Tokio, 27 may, AZƏRTAC

Yaponiya və Azərbaycan arasında diplomatik münasibətlərin qurulmasının 30-cu ildönümü və Müstəqillik Günü münasibətilə Tokioda ölkəmizin Yaponiyadakı səfirliyi tərəfindən rəsmi qəbul təşkil edilib.

AZƏRTAC xəbər verir ki, Tokionun mərkəzində yerləşən “Okura” mehmanxanasında keçirilən qəbulda əsas qonaq qismində Yaponiya parlamentinin müşavirlər palatasının sədri xanım Akiko Santo, Yaponiya xarici işlər nazirinin müavini Taro Honda, Yaponiya-Azərbaycan parlamentlərarası dostluq qrupunun sədri Akira Amari, Tokionun qubernatoru Yuriko Koike, Yaponiya-Azərbaycan İqtisadi Komitəsinin həmsədri Yoşihisa Suzuki, deputatlar, Yaponiyanın bir sıra prefektura və şəhərlərinin qubernatorları və merləri, ictimai-siyasi dairələrin nümayəndələri, aparıcı kütləvi informasiya vasitələrinin təmsilçiləri, şirkət rəhbərləri, diplomatik korpus və bu ölkədə yaşayan həmvətənlərimiz iştirak ediblər.

Əvvəlcə Azərbaycanın və Yaponiyanın dövlət himnləri canlı olaraq yaponiyalı müğənni Kyoko Yamamoto tərəfindən ifa edilib.

Tədbiri giriş sözü ilə açan səfir Gürsel İsmayılzadə qonaqlara minnətdarlığını ifadə edib. Bildirib ki, ümummilli lider Heydər Əliyevin və Prezident İlham Əliyevin müdrik rəhbərliyi ilə Azərbaycan siyasi, iqtisadi və sosial sahələrdə böyük irəliləyişə nail olub. Ölkəmizin beynəlxalq nüfuzu əhəmiyyətli dərəcədə artıb. Azərbaycan beynəlxalq tərəfdaşları ilə nəhəng enerji və nəqliyyat layihələri həyata keçirən dünyanın ən rəqabətqabiliyyətli dövlətlərindən birinə çevirilib.

Qeyd edib ki, 2020-ci ilin sentyabr-noyabr aylarında davam edən 44 günlük Vətən müharibəsi nəticəsində Azərbaycan nəinki öz torpaqlarını azad edib, həm də bir milyona qədər azərbaycanlının tarixi ədalətini, ərazi bütövlüyünü və fundamental hüquqlarını bərpa edərək, BMT Təhlükəsizlik Şurasının qərarlarını həyata keçirib. Hazırda işğaldan azad edilmiş ərazilərin bərpası və inkişafının Azərbaycan hökumətinin əsas prioriteti olduğunu qeyd edib.

Bildirib ki, təbii ehtiyatlarla zəngin Azərbaycan enerji sektorunda regionun əsas oyunçudur. Azərbaycanın enerji sahəsindəki fəaliyyəti ölkəni regional enerji mərkəzinə çevirib. Ölkə nəhəng enerji layihələri vasitəsilə öz neftini və təbii qazını beynəlxalq bazarlara çatdırır, Avropanın enerji təhlükəsizliyinə töhfə verir.

Azərbaycan – Yaponiya ikitərəfli münasibətlərinə toxunan səfir 2022-ci ildə iki ölkə arasında diplomatik münasibətlərin qurulmasının 30-cu ildönümünün qeyd olunduğunu xatırladıb. Azərbaycan ilə Yaponiya arasında münasibətlərin ümumi maraqlar, qarşılıqlı anlaşma və hörmət prinsipləri əsasında qurulduğunu və bunun xalqlarımızın mənafelərinə xidmət etdiyini vurğulayıb. Son 30 il ərzində ikitərəfli münasibətlərin bütün səviyyələrində mühüm irəliləyişlərə nail olduğunu, möhkəm siyasi təməl və etimada əsaslanan iqtisadi-ticarət əməkdaşlığının müxtəlif sahələrdə uğurla inkişaf etdiyini bildirib. Yapon şirkətlərinin 1990-cı illərdə Azərbaycanın enerji layihələrinə sərmayə qoyan ilk şirkətlərdən olduğunu və hazırda da ölkəmizin enerji sektorunda fəal iştirak etdiyini tədbir iştirakçılarının diqqətinə çatdırıb.

Səfir Azərbaycan və Yaponiyanın kənd təsərrüfatı, informasiya texnologiyaları, turizm, nəqliyyat, logistika kimi sahələrdə əməkdaşlıq etmək üçün böyük potensiala malik olduğunu vurğulayıb, son illər ölkələrimizin regionlarının da səmərəli əməkdaşlığa başladığını qeyd edib.

COVID-19 pandemiyası ilə əlaqədar son 2 ildə qarşılıqlı səfərlərin olmadığını qeyd edən səfir cari ayın əvvəlində Azərbaycana səfər etdiyi üçün Yaponiya xarici işlər nazirinin parlament üzrə müavini Taro Hondaya səmimi minnətdarlığını bildirib.

Çıxışının sonunda G.İsmayılzadə gələcək illərdə iki dost xalqın daha da yaxınlaşacağına, dostluğun və əməkdaşlığın bir çox yeni sahələri əhatə edəcəyinə əmin olduğunu vurğulayıb.

Tədbirdə çıxış edən Yaponiya parlamentinin müşavirlər palatasının sədri xanım Akiko Santo Müstəqillik Günü münasibətilə Azərbaycan rəhbərliyini, xalqımızı təbrik edib. Müstəqilliyin bərpasının ilk illərində Azərbaycanda müəyyən iqtisadi çətinliklər yarandığını qeyd edib, lakin ümummilli lider Heydər Əliyevin və Prezident İlham Əliyevin rəhbərliyi ilə Azərbaycanın durmadan inkişaf etdiyini, çiçəkləndiyini bildirib. Bunun Azərbaycan xalqının yorulmaz səyləri nəticəsində əldə olunduğunu vurğulayıb və Yaponiya dövləti adından səmimi hörmətini çatdırıb.

Xanım Akiko Santo ötən il Vyanada keçirilən Parlament Sədrlərinin V Ümumdünya Konfransında Azərbaycan Milli Məclisinin sədri xanım Sahibə Qafarova ilə görüşü xatırlayaraq, iki ölkə arasında əlaqələrin möhkəmləndirilməsi üçün qadın deputatların bir-biri ilə əməkdaşlıq edəcəyi barədə razılığa gəldiklərini vurğulayıb. Bildirib ki, ölkələrimiz yalnız iqtisadiyyat və enerji sahələrində deyil, həm də mədəniyyət, təhsil, informasiya texnologiyaları kimi müxtəlif sahələrdə də əməkdaşlığı dərinləşdirməlidir.

Hazırda dünyada qarışıqlıq hökm sürdüyünü qeyd edən A.Santo suveren dövlətin işğalının tamamilə bağışlanmaz bir hərəkət olduğunu vurğulayıb. Yarım əsrlik siyasi həyatının təcrübəsindən, dünyanın çiçəklənməsi üçün ən çox azadlıq və demokratiya lazım olduğundan əminliyini ifadə edib. Beynəlxalq asayişin qorunması üçün iki ölkə arasında əməkdaşlığın daha da genişləndirilməsini səbirsizliklə gözlədiyini bildirib.

Həmçinin dünyada olan 11 iqlim qurşağından 9-nun Azərbaycanda olması, zəngin təbiəti və uzun tarixlə dəstəklənən Ümumdünya İrsinə aid obyektlərin bolluğu ilə Azərbaycanın həyacanverici cazibə ilə dolu olduğunu söyləyib. Hər iki ölkənin mənafeyi naminə əlindən gələni əsirgəməyəcəyini vurğulayaraq, təbriklərini çatdırıb.

Tədbirdə çıxış edən Yaponiya xarici işlər nazirinin parlament üzrə müavini Taro Honda, Müstəqillik Günü münasibətilə təbriklərini çatdırıb, Azərbaycanın regionda Yaponiya üçün mühüm tərəfdaş olduğunu vurğulayıb.

Səfir G.İsmayılzadənin tövsiyəsi ilə Azərbaycanda səfərdə olduğunu qeyd edən nazir müavini ölkəmizdə keçirdiyi görüşləri də məmnuniyyətlə xatırladıb.

Yaponiyanın Azərbaycan ilə münasibətlərə xüsusi önəm verdiyini vurğulayaraq, iki ölkə arasında əməkdaşlığın gücləndirilməsi üçün geniş perspektivlər olduğunu qeyd edib. Yaponiya tərəfinin münasibətlərin daha da inkişafı və əməkdaşlığın genişləndirilməsində maraqlı olduğunu bildirib və bundan sonra da həmin istiqamətdə lazımı dəstək verəcəyini vəd edib.

Tədbirdə çıxış edən Azərbaycan-Yaponiya parlamentlərarası dostluq qrupunun Yaponiya tərəfindən rəhbəri Akira Amari Müstəqillik Günü və Azərbaycan ilə Yaponiya arasında diplomatik əlaqələrin qurulmasının 30 illiyi münasibətilə Azərbaycan xalqını təbrik edib.

Ölkələrimiz arasında münasibətlərin yüksək səviyyədə olduğunu vurğulayaraq, Azərbaycanın regionda Yaponiyanın ən etibarlı tərəfdaşı olduğunu bildirib. Azərbaycan-Yaponiya parlamentlərarası dostluq qrupunun ümummilli lider Heydər Əliyevin Yaponiyaya səfəri zamanı yaradıldığını xatırladaraq, həm Ulu Öndər, həm də Prezident İlham Əliyevlə görüşlərini məmnunluqla xatırladıb.

A.Amari Azərbaycan Prezidenti İlham Əliyevin rəhbərliyi ilə ölkəmizin sürətlə inkişaf etdiyini vurğulayıb. Səfir G.İsmayılzadənin Yaponiyada çalışdığı müddətdə Azərbaycan – Yaponiya ikitərəfli münasibətlərin yüksələn inkişaf yolunda olduğunu vurğulayaraq, iki ölkə arasında hərtərəfli münasibətlərin inkişafı üçün hər zaman olduğu kimi dəstək verəcəyini vəd edib.

Yaponiyanın Azərbaycan ilə münasibətlərə yüksək əhəmiyyət verdiyini, ölkəmizin inkişafı və nailiyyətlərinin Yaponiyada böyük sevinc ilə qarşılandığını bildirən Akira Amari Azərbaycan xalqının şərəfinə badə qaldırıb.

Azərbaycan xalqını böyük bayram münasibətilə təbrik edən Kaişi universitetinin professoru, “ajmedia.jp” saytının baş redaktoru Akira Matsunaqa AZƏRTAC-ın bu ölkədəki xüsusi müxbirinə bildirib ki, ötən 30 il yapon və Azərbaycan xalqlarının sıx dostluğu və həmrəyliyi ilə tarixə yazılıb: “İki dost ölkə arasında müxtəlif sahələrdə əməkdaşlıq xalqlarımızın inkişafına və daha da yaxınlaşmasına səbəb olub. Əgər münasibətlərimizin ilk illərində Azərbaycan Yaponiyada o qədər də tanınmayan ölkə idisə, bu gün, əksinə, ən çox tanınan və böyük marağın olduğu dövlətlərdən birinə çevrilib. Səmimi deyim ki, bu məni çox sevindirir. Bir daha təbriklərimi çatdırır, Azərbaycan xalqına yeni uğurlar arzulayıram”.

Azərbaycan paytaxtı Bakı şəhərində və İsmayıllı rayonunda yapon bağlarının yaradıcısı, “Kosugi Zohen Co.Ltd” şirkətini prezidenti Saki Kosuqi də xalqımıza təbriklərini çatdırıb: “Artıq 30 ildir ki, Yaponiya və Azərbaycan arasında sıx dostluq münasibətləri var. Bu şəxsən məni çox sevindirir. Azərbaycan xalqının həyata keçirdiyi böyük quruculuq və bərpa işlərinə, sürətli inkişafa da çox şadam. Azərbaycanda neçə illərdir çalışan Yaponiya şirkətinin rəhbəri olaraq ölkələrimiz və xalqlarımız arasında mehriban dostluğun daha da inkişaf etməsini arzulayıram. Bütün yaponları bu gözəl ölkəyə səfər edərək onun ecazkar təbiəti ilə, mehriban insanları ilə tanış olmağı tövsiyə edirəm”.

Yaponiyada fəaliyyət göstərən “Jalə Japan” şirkətinin prezidenti, tanınmış caz ifaçısı Kyoko Yamamoto Azərbaycan xalqını təbrik edib: “Artıq 10 ildir ki, Azərbaycanı tanıyıram və ürəkdən sevirəm. Həm təbiətiniz, həm mədəniyyətiniz, həm də çox mehriban insanlarınız məni özünə heyran edib. Mən Azərbaycan ilə həm biznes, həm də mədəniyyət sahəsində əməkdaşlıq edirəm. Düşünürəm ki, hər iki istiqamət xalqlarımızın biri-birinə daha da yaxınlaşmasına, biri-birini tanımasına xidmət edir. Sevinirəm ki, bu böyük işdə mənim də müəyyən qədər əməyim olub. Bundan sonra da dostluğumuzun möhkəmlənməsi üçün var gücümlə çalışacağam. Bayramınız mübarək”.

“Cross Border Clube 3.0” klubunun meneceri və eyniadlı yutub kanalının təsisçisi Kazuyasu İşida da təbriklərini çatdırıb: “Bu gün həqiqətən də böyük bayramdır. Bir yaponiyalı olaraq çox sevdiyim Azərbaycanı, xalqınızı bu bayram münasibətilə ürəkdən təbrik edirəm. Ölkənizin gözəlliklərini, orada yaşayan çox səmimi insanları Yaponiyada tanıtmaq üçün bundan sonra da əlimdən gələni edəcəyəm. İstənilən xalqın inkişafı digər xalqlarla dostluq münasibətlərdən, birgə fəaliyyətdən keçir. Dost Azərbaycana yalnız inkişaf, tərəqqi və çiçəklənmə arzulayıram”.

Vüqar Ağayev

AZƏRTAC-ın xüsusi müxbiri

Tokio