İQTİSADİYYAT


® “Baker Hughes” Azərbaycanda ilk dəfə “Energy Forward” tədbiri keçirir

“Baker Hughes” Azərbaycanda ilk dəfə neft və qaz sektorunda məhsuldarlıq, səmərəlilik və təhlükəsizliyi əhəmiyyətli şəkildə dəyişən əsas tendensiyaları müzakirə etmək üçün dünyanın və regionun ideya sahiblərini, texniki ekspertləri bir araya gətirən “Energy Forward” konfransını keçirir.

Tədbirin proqramına aparıcı regional və beynəlxalq şirkətləri təmsil edən yüksək nüfuza malik natiqlər Xəzər dənizi hövzəsində və dünyanın digər yerlərində neft və qaz sektorunda müşahidə olunan dəyişiklərin müzakirə olunduğu plenar sessiyalar, habelə rəqəmsal transformasiya, ən müasir intervensiyalar, ağıllı qazma, tam maye həlləri, vəziyyətin monitorinqi və qabaqlayıcı korroziya idarəetməsi, həmçinin sıxılmış ağac və manifold kimi neftçıxarma avadanlıqları barədə geniş texniki sessiyalar daxildir.

Konfransda SOCAR-ın prezidenti Rövnəq Abdullayev çıxış edərək bildirib ki, indiyədək Azərbaycanda sənaye üsulu ilə 2 milyard tondan çox neft və 900 milyard kubmetrədək təbii qaz hasil edilib. SOCAR-ın qazma tresti tərəfindən “Bulla-91” kəşfiyyat quyusunda “Baker Hughes” ilə birgə quyudibi təzyiqlərin idarə olunması ilə qazma texnologiyası uğurla tətbiq edilməkdədir.

SOCAR-ın prezidenti qeyd edib ki, Azərbaycanda 2 milyard tondan çox neft hasil olunub. Bu, tək bizim üçün deyil, dünyanın bütün digər neft hasilatı ölkələri üçün də böyük rəqəmdir. Ancaq, eyni zamanda, bu o deməkdir ki, əgər biz hazırda çıxarılabilən neftin misal üçün 50 faizini hasil etməyi bacarırıqsa, deməli, yerin altında hələ hasil oluna bilməyən daha 2 milyard ton neft ehtiyatı mövcuddur.

Plenar sessiyada BP şirkətinin Azərbaycan, Gürcüstan və Türkiyə regionu üzrə prezidenti Qəri Counz, Energetika nazirinin müavini Elnur Soltanov və “Baker Hughes” şirkətinin rəqəmsal həllər üzrə vitse-prezidenti Rami Qasem neft sənayesində müşahidə olunan çağırışları və şirkətlərin bu çağırışlara davam gətirəcək çevik və dayanıqlı biznes mühitini necə qurmalı olduqları barədə müzakirə aparıb.

Tədbirdə, həmçinin “Baker Hughes” tərəfindən ilk dəfə Azərbaycanda təqdim olunan ən müasir texnologiyaların nümayiş olunduğu sərgi keçirilir. Sərgidə Xəzər dənizi regionundan olan bütün ölkələrin təmsilçiləri ən son innovasiyalar və qabaqcıl texnologiyalar, o cümlədən süni intellekt, periferik hesablama (edge computing) və yeni nəsil fakelin işinin optimallaşdırılması barədə məlumat əldə etmək imkanı qazanırlar.

“Baker Hughes” şirkətinin sualtı texnologiyaların gələcəyi ilə bağlı yanaşması – “Subsea Connect”, həmçinin qazma və tamamlama işləri üçün qabaqcıl neftçıxarma texnologiyaları nümayiş olunub. Digər bölmə isə karbon və metan tullantılarının azaldılmasına yönəlmiş yeni enerji gələcəyini nəzərdə tutan rəqəmsal həllərə həsr edilib.

“Energy Forward” beynəlxalq səviyyədə qabaqcıl təcrübəni və çıxarılmış nəticələri bölüşmək və mühəndislik, elm və məlumatların imkanlarını kəşf etmək məqsədilə dünyanın əsas neft və qaz şirkətlərini təmsil edən 250-dən çox liderləri və əsas tərəfdaşları bir araya gətirən və Xəzər regionunda neft və qaz sektorunun gələcək inkişafı üçün rəqəmsal transformasiya və innovasiyaların nümayiş olunduğu unikal texnologiya tədbiridir.

Tədbir çərçivəsində bir neçə sənəd imzalanıb. “Baker Hughes” və SOCAR yuxarı axın əməliyyatlarında səmərəli quyuların konsepsiyasının işlənib hazırlanması və icrası ilə bağlı anlaşma memorandumu imzalayıb. Bu layihənin əsas məqsədi yeni quyularda səmərəliliyin artırılması imkanlarının müəyyən olunması və əldə edilməsidir. “Baker Hughes” şirkətinin qabaqcıl texnoloji həllərinin tətbiqi Azərbaycanın neft və qaz sənayesində inkişafa dəstək olmaqla, yerli resurslar və imkanlardan daha səmərəli istifadəyə şərait yaradacaq.

“Baker Hughes” ilə SOCAR-ın "Neftqazelmitədqiqatlayihə" İnstitutu və şirkətin Azərbaycanda mövcud qurğusundan səmərəli istifadə əsasında neft sənayesi üçün reagentlərin istehsalını daxildə həyata keçirməyə yol açan razılaşma imzalayıb. Qlobal hasilat standartlarını təqdim etməklə, Baker Hughes və SOCAR yerli istismar təşkilatlarına ölkə daxilində və Xəzər dənizi regionunda aparıcı layihələrə qoşulmaq imkanı verəcək. Bu təşəbbüs həmçinin, yerli imkanları genişləndirmək və təkmilləşdirməklə biliklərin ötürülməsinə imkan verəcək və uzun-müddətli strateji fayda yaradacaq.

Bundan əlavə, “Baker Hughes” Bakı Ali Neft Məktəbinə “JewelSuite™” proqram təminatı üçün lisenziyanın verilməsi barədə təhvil-təslim aktı imzalayıb. Dəyəri 1 milyon ABŞ dollarından çox olan bu proqram təminatı üçün lisenziyalar tələbələrə Xəzər hövzəsində yeraltı mürəkkəb quruluşları modelləşdirməyə imkan yaradacaq. Bu təşəbbüs, sənaye sahəsində aparıcı geoloji və geofiziki proqram təminatından istifadə sahəsində real təcrübə qazanacaq, eyni zamanda, tələbələrin təhsildən birbaşa peşəkar fəaliyyətə keçidinə dəstək verəcək.

Qeyd edək ki, “Baker Hughes” dünya miqyasında enerji və sənaye sektorunda fəaliyyət göstərən müştərilərə həllər təqdim edən enerji texnologiyaları şirkətidir. 120 ölkədə fəalliyyət göstərən 100 illik təcrübəyə malik şirkət olaraq, bizim təklif etdiyimiz innovativ texnologiyalar və xidmətlər enerji sektorunu irəliyə apararaq onu insanlar və planet üçün daha təhlükəsiz, təmiz səmərəli edir. “Baker Hughes” ətraf mühitə minimum təsir etməklə və bir barrelə daha aşağı xərclə öz müştərilərinə karbohidrogen məhsullarını daha səmərəli, məhsuldar və təhlükəsiz şəkildə əldə etməyə, daşımağa və emal etməyə kömək edir.

1990-cı ildən Azərbaycanda fəaliyyətə başlayan “Baker Hughes” Xəzər dənizində həyata keçirilən bir sıra kompleks onşor və ofşor layihələr, o cümlədən “Şahdəniz, “Azəri-Çıraq-Günəşli”, “Abşeron” və TANAP layihələri üçün neft və qaz avadanlıq və xidmətlərinin aparıcı təchizatçısıdır. “Baker Hughes” SOCAR, həmçinin BP, “Total”, “Equinor”, “Caspian Drilling Company” şirkətlərinin tərəfdaşıdır.

“Baker Hughes”in Azərbaycandakı işçilərinin sayı 300-dən çoxdur. Ölkəmizdə şirkətin 4 məhsulundan - neft xidmətləri (OFC), neft avadanlıqları (OFE), turbo maşın və proses həlli (DS), ölçmə və nəzarət (M&C) və rəqəmli məhsullarından istifadə olunur.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.