Bakı, 30 avqust (AZƏRTAC). Azərbaycan Dövlət Aqrar Universitetinin (ADAU) tələbələri avqustun 10-dən 23-dək Macarıstanın Kapoşvar Universitetində təşkil olunan “XXI əsrdə kənd təsərrüfatının davamlı inkişafı” mövzusunda beynəlxalq yay məktəbində iştirak ediblər.

ADAU-nun mətbuat xidmətindən AZƏRTAC-a bildiriblər ki, tədbirdə Türkiyə, Rusiya, Qazaxıstan, Rumıniya və Almaniyadan nümayəndə heyətləri də təmsil olunublar.

Yay məktəbində ADAU-nu iqtisadiyyat, baytarlıq, aqromühəndislik və aqronomluq fakültələrində təhsil alan 15 nəfər tələbə və bir nəfər müəllim təmsil edib.

Proqramın ilk günündə açılış mərasimi keçirilib və tələbələrin Kapoşvar Universitetinin tədris-təcrübə binalarına gəzintisi təşkil olunub.

Tələbələr avqustun 11-dən 15-dək Kapoşvar şəhərində olublar. Burada “Kənd təsərrüfatının davamlı inkişaf yolları”, “Geni dəyişdirilmiş bitkilər, onların müsbət və mənfi xüsusiyyətləri”, “Heyvandarlığın inkişaf yolları, parazitar xəstəliklər və onlara qarşı mübarizə yolları”, “İstehsal zamanı ətraf mühitin qorunmasına dair beynəlxalq standartlar və yaşıl inqilab” və s. mövzularda mühazirələr dinlənilib.

Kapoşvar Universitetinin rəhbərliyi ADAU-da tədrisin keyfiyyətinin yüksəldilməsi və maddi-texniki bazanın möhkəmləndirilməsi sahəsində görülən işlərdən məmnunluqlarını bildirib və universitetlərarası əlaqələrin inkişafının, o cümlədən müəllim-tələbə mübadiləsinin genişləndirilməsinin zəruriliyini qeyd edib.

Avqustun 16-da iştirakçıların Pecs şəhərinin tarixi yerlərinə ekskursiyası təşkil edilib. Ayın 17-də isə tələbələr Bozsenfa ve Szenna şəhərlərindəki universitetlərin tarla-təcrübə sahəsi və heyvandarlıq təsərrüfatı ilə tanış olublar.

Yay məktəbi avqustun 18-dən 21-dək Macarıstanın məşhur turizm mərkəzi olan Siofok şəhərində davam etdirilib. Həmçinin burada “Maddələrin biokimyəvi dövriyyəsi”, “Ətraf mühitin qorunması” və s. mövzularda mühazirələr keçirilib.

ADAU-nun tələbələri Siofok şəhərindəki Balaton gölünün sahilində yerləşən universitetin yataqxanasında qalıblar. Burada təşkilat qrupu tərəfindən tələbələrin asudə vaxtlarını səmərəli keçirmələri və istirahətləri üçün maraqlı proqramlar təşkil edilib.

Avqustun 21-də Siofok şəhərində proqramın bağlanış tədbiri keçirilib və tələbələrə sertifikatlar verilib.

Tədbirdə ADAU-nun əməkdaşı F. Ələkbərov universitetin rektoru və tələbələr adından proqramın təşkilatçılarına təşəkkürünü bildirib, onlara universitetin hədiyyəsini təqdim edib. Sonda xatirə şəkli çəkdirilib.

http://adau.edu.az/view.php?lang=az&menu=22&id=1586