Zemfira Meftahətdinova: Atıcılarımızın Dünya Kubokunda uğurlu nəticələr qazanacağına inanıram
Bakı, 1 may, AZƏRTAC
"İdmançılarımızın bu yarışdan uğurlu nəticələrlə ayrılacağına inanıram".
AZƏRTAC xəbər verir ki, bu sözləri Azərbaycan Atıcılıq Federasiyasının vitse-prezidenti Zemfira Meftahətdinova Bakıda keçiriləcək Dünya Kuboku öncəsi təşkil olunan mətbuat konfransında deyib.
O, Azərbaycanda perspektivli atıcıların çox olduğunu diqqətə çatdırıb: "Atıcılarımız hər zaman ölkəmizi nüfuzlu turnirlərdə layiqincə təmsil edirlər. Əli Hüseynli, Nurlana Cəfərova, Nigar Nəsirova kimi istedadlı atıcılarımız lisenziya turnirlərində öz qüvvələrini sınadılar. Onların lisenziya qazanmaq üçün şansları var idi. Finala qədər irəliləmişdilər. Nəticələr onu göstərir ki, bu idman növü Azərbaycanda kifayət qədər inkişaf edib".
Qeyd edək ki, Dünya Kuboku mayın 1-dən 12-dək Bakı Atıcılıq Mərkəzində keçiriləcək.
Bölmənin digər xəbərləri
