Macarıstanın “Nepszabadsag” qəzeti on ildən sonra yenidən fəaliyyətə başlayıb
Budapeşt, 10 oktyabr, AZƏRTAC
Macarıstanın “Nepszabadsag” qəzeti on illik fasilədən sonra yenidən oxucuların görüşünə qayıdıb.
AZƏRTAC xəbər verir ki, nəşrin onlayn versiyası oktyabrın 8-də fəaliyyətə başlayıb, qəzetin çap variantının da oxuculara təqdim edilməsi nəzərdə tutulur.
Nəşrin internet səhifəsində Macarıstanın və dünyanın ictimai-siyasi həyatı, cəmiyyət və iqtisadiyyat sahələrində baş verən mühüm hadisələr işıqlandırılacaq. Oxuculara xəbərlərlə yanaşı, analitik yazılar, reportajlar, müsahibələr və mövzuya dair ətraflı materiallar təqdim olunacaq.
Qeyd edək ki, “Nepszabadsag” 2016-cı il oktyabrın 8-də nəşrini dayandırıb. Həmin vaxt qəzetin fəaliyyəti maliyyə itkiləri ilə əsaslandırılsa da, redaksiya əməkdaşları qərarın siyasi səbəblərlə bağlı olduğunu bildiriblər.
Yenilənmiş nəşrin “Liberty Press” şirkəti tərəfindən buraxılması planlaşdırılır. Media qrupunun tərkibinə “Nepszava” qəzetinin də daxil olması, onun materiallarının həftəlik buraxılışda dərc edilməsi nəzərdə tutulur.
Bölmənin digər xəbərləri
