Almatida çıxan “Adəm” jurnalında bu şəhərdə yaşayan soydaşımız, tanınmış foto ustası Corc Xələfov haqqında geniş məqalə verilmişdir. Məqalədə deyilir ki, dünyanın müxtəlif ölkələrində keçirilmiş nüfuzlu beynəlxalq sərgilərin qalibi və diplomçusu olan C. Xələfov 1948-ci ildə Azərbaycanın Horadiz kəndində doğulmuşdur. Bir çox günahsız azərbaycanlılar kimi, onun da ailəsi Qazaxıstana sürgün edilmişdi. 

Uşaqlıqdan foto sənətinə həvəs göstərən Corc 1989-cu ildə “Miss foto-89 SSRİ” sərgisində birinci yeri tutduqdan sonra məşhurlaşmışdır.

C.Xələfov zamanı duyur, onun nəbzini tuta bilir. Məshəti türkləri, Vilnüs, Tbilisi hadisələri, Əfqanıstan, Dağlıq Qarabağ, qaçqınlar - bütün bu mövzular onun işlərində öz əksini tapır. O başqasının görə bilmədiyini görmək bacarığına malikdir.

Məqalə C. Xələfovun bu sözləri ilə bitir:

- Mən hər hansı bir qadını elə çəkərəm ki, o, həyatda olduğundan da gözəl görünər. Mən dünyanı dəyişə bilmərəm, lakin çoxlarının görə bilmədiyi və ya görmək istəmədiyi gözəlliyi əbədiləşdirə bilərəm. Əgər siz dünyaya mənim gözlərimlə baxa bilsəniz, görərsiniz ki, o, ecazkar musiqi qədər gözəldir.

Qulu Kəngərli

AZƏRTAC-ın xüsusi müxbiri

Almatı