Almaniya sərhədlərdə yoxlama tədbirlərini sentyabrdan sonra da davam etdirəcək
Berlin, 7 avqust, AZƏRTAC
Almaniya sərhədlərdə yoxlama tədbirlərini sentyabrdan sonra da davam etdirməyi, yeni deportasiya reyslərinin həyata keçirilməsini planlaşdırır.
AZƏRTAC “Spiegel” qəzetinə istinadla xəbər verir ki, bu barədə daxili işlər naziri Aleksander Dobrindt məlumat verib. O, yoxlamaların və sərhəddən geri qaytarmaların sentyabrdan sonra da davam etdiriləcəyini bildirib.
Yanvar-iyul aylarında Almaniyada 70 min 11 ilk sığınacaq müraciəti qeydə alınıb. Bu, ötən ilin eyni dövrü ilə müqayisədə iki dəfə azdır.
Genişmiqyaslı deportasiya tədbirlərinin də nəzərdə tutulduğunu bildirən nazir ağır cinayətlər törətmiş şəxslərin Əfqanıstana deportasiyası məqsədilə xüsusi reysin təşkil edilə biləcəyini və belə tədbirlərin davamlı olmasının vacibliyini qeyd edib. Bildirib ki, hökumət hazırda həm Əfqanıstana, həm də Suriyaya əlavə deportasiya reyslərinin təşkili üzərində işləyir.
Xatırladaq ki, Almaniya bu ilin iyulunda sığınacaq müraciəti rədd edilmiş 81 nəfəri Əfqanıstana deportasiya edib. A.Dobrindt onların ağır və çox ağır cinayətlər törətmiş şəxslər olduğunu bildirib. İlk belə deportasiya reysi isə 2024-cü ilin avqustunda həyata keçirilmişdi.
Elvin Mövsüm
AZƏRTAC-ın xüsusi müxbiri
Berlin
Bölmənin digər xəbərləri
