Bakı, 4 fevral, Ceyhun Rüstəmov, AZƏRTAC

“Azərbaycan Hava Yolları” Qapalı Səhmdar Cəmiyyətinin (QSC) ötən il dekabrın 24-də paytaxta gətirdiyi və “Arzular layneri” (“Dreamliner”) adlanan ən müasir “Boeing-787-8” sərnişin təyyarəsi ilk uçuşunu ulu öndər Heydər Əliyevin doğulub boya-başa çatdığı Naxçıvana həyata keçirib.

AZƏRTAC xəbər verir ki, Heydər Əliyev Beynəlxalq Aeroportundan yerli vaxtla saat 14:40-da havaya qalxan və azərbaycanlı pilotların idarə etdiyi “Boeing-787-8 Dreamliner” 1 saatdan sonra muxtar respublikanın Naxçıvan Beynəlxalq Hava Limanında yerə endi.

“Azərbaycan Hava Yolları” QSC-nin vitse-prezidentləri İlham Əmirovu və Etibar Hüseynovu, eləcə də QSC prezidentinin köməkçisi, xidmət rəisi Məhərrəm Səfərlini Naxçıvan Beynəlxalq Hava Limanının rəhbərliyi və kollektivi qonaqpərvərliklə qarşıladılar.

Hava limanının rəhbərliyi “Azərbaycan Hava Yolları” QSC-nin yeni aldığı və “Ordubad” adlandırılan müasir “Boeing-787-8” tipli təyyarənin interyeri və göstəriciləri ilə tanış oldu. Bildirildi ki, “Dreamliner” ən müasir tipli hava gəmilərindəndir. Son texniki nailiyyətləri özündə cəmləşdirən layner daha uzaq məsafələrə uçuşlar həyata keçirməyə malikdir. Bu təyyarə həm texniki, həm də xidmət cəhətdən digər hava gəmilərindən fərqlənir. Onun çəkisi analoji təyyarələrlə müqayisədə daha yüngüldür. Buna baxmayaraq, uçuş məsafəsi və yükqaldırma imkanı digərlərindən yüksəkdir və 20 faiz az yanacaq sərf edir. Geniş gövdəli bu təyyarə 210 sərnişin tutumuna malikdir. Fasiləsiz 15 saat uçuş yerinə yetirən layner birbaşa 15 min 700 kilometr məsafə qət edə bilir. “Dreamliner” bu göstəricilərə görə hazırkı sərnişin təyyarələri arasında liderdir. Təyyarədə sərnişinlərin rahatlığı üçün gözəl şərait yaradılıb. Sərnişinlər təyyarənin salonunda “biznes”, “premium ekonom” və “ekonom” siniflərinin xidmətlərindən yararlana bilərlər.

Təyyarənin bütün aeronaviqasiya və sərnişin salonunun audio-video sistemləri ən son texnoloji yeniliklər əsasında tərtib olunub. Bu təyyarə ilə ilk mərhələdə Bakıdan Nyu-Yorka, Londona, Parisə, Pekinə, Avropanın müxtəlif paytaxtlarına uçuşlar yerinə yetiriləcək.

“Uzun müddətdir blokada şəraitinin ağırlığına mətanətlə sinə gərən Naxçıvan Muxtar Respublikası bu gün Ulu Öndərin işləyib hazırladığı strategiya nəticəsində dinamik inkişafı və tərəqqisi ilə seçilir. Milli aviaşirkətimiz olan “Azərbaycan Hava Yolları” da Naxçıvanın bu iqtisadi yüksəlişinə, eləcə də muxtar respublikanın hava əlaqəsinin daha da möhkəmləndirilməsinə öz töhfəsini vermək üçün şərəfli missiyanı qürurla həyata keçirir”, - deyən “Azərbaycan Hava Yolları” QSC-nin vitse-prezidenti İlham Əmirov müsahibəsində bildirdi ki, ümumiyyətlə, Naxçıvanın iqtisadi inkişafına, eləcə də muxtar respublikanın beynəlxalq aləmə çıxışının təmin edilməsinə çalışan Ulu Öndərin ideyaları artıq bu gün reallığa çevrilir. Azərbaycanın əldə etdiyi nailiyyətlər, eləcə də mülki aviasiyamızın bugünkü inkişafı ümummilli lider Heydər Əliyevin adı ilə bağlıdır. Müstəqilliyimizin ilk illərində ölkə iqtisadiyyatı üçün çox çətin zamanda bu sahəyə daim diqqət və qayğı göstərən Ümummilli Lider heç də asan olmayan o dövrdə aviasiyamızın bugünkü inkişaf xəttinin təməlini yaradıb.

Vitse-prezident diqqətə çatdırdı ki, son illərdə digər sahələrdə olduğu kimi, mülki aviasiya sahəsində də uğurlu inkişaf mərhələsi yaşanır. Bu inkişaf özünü həm yeni aerovağzal komplekslərinin inşasında, həm də müasir hava gəmilərinin alınmasında daha aydın göstərir. Bu baxımdan “Azərbaycan Hava Yolları” QSC-nin aviaparkının ən müasir “Boeing-787-8 Dreamliner” sərnişin təyyarələri ilə yenilənməsi də mühüm əhəmiyyət kəsb edir. “Azərbaycan Hava Yolları”nın və ümumilikdə, Azərbaycan mülki aviasiyasının nailiyyətləri Prezident İlham Əliyevin bu sahəyə birbaşa göstərdiyi diqqət və qayğısının nəticəsidir.

“Boeing-787-8” laynerinin MDB məkanında və bir sıra Şərq ölkələri arasında ilk dəfə Azərbaycana gətirildiyini vurğulayan İ.Əmirov deyib ki, artıq azərbaycanlı pilotlar “Dreamliner”in idarə edilməsində təcrübə toplayıblar: “Əminəm ki, “Azərbaycan Hava Yolları”nın aviatorları “Boeing-787-8 Dreamliner” ilə hələ neçə-neçə dünya şəhərini bir-birinə yaxın edəcək”.

Ulu Öndərin layiqli davamçısı, Prezident İlham Əliyevin milli aviasiyaya diqqət və qayğısından danışan “Azərbaycan Hava Yolları” QSC-nin vitse-prezidenti Etibar Hüseynov isə deyib ki, Azərbaycanın mülki aviasiyası Ümummilli Lider tərəfindən yaradılan möhkəm bünövrə üzərində dayanaraq, 2003-cü ildən özünün yeni inkişaf mərhələsinə qədəm qoyub. Belə ki, 2004-cü ildə müasir standartlara cavab verən Naxçıvan Beynəlxalq Hava Limanı, sonrakı illərdə bir-birinin ardınca Gəncə, Zaqatala, Lənkəran və Qəbələdə aeroportlar istismara verilib. Sərnişin və yük daşımalarının daha müasir səviyyəyə çatdırılması üçün təyyarə və helikopter parkı yenilənib.

“Boeing-787-8” laynerinin ilk uçuşunun Naxçıvana reallaşdırılmasını əlamətdar hadisə adlandıran QSC-nin vitse-prezidenti, Naxçıvan Beynəlxalq Hava Limanında aparılan yenidənqurma işləri barədə də məlumat verib. Diqqətə çatdırılıb ki, hava limanında yüksək inkişaf templəri müşahidə olunur, bir sıra sahələrdə islahatlar reallaşdırılır. Bu islahatlar istər kadr baxımından, istərsə də maddi-texniki təchizat və digər sahələrdə həyata keçirilir. Aparılan islahatlar hava limanının hər sahədə beynəlxalq standartlara cavab verməsini təşkil etmək məqsədi daşıyır. Hazırda Naxçıvan Beynəlxalq Hava Limanında sərnişindaşıma texnologiyasının müasir səviyyəyə çatdırılması, eləcə də rahatlığın təmin edilməsi üçün yenidənqurma işləri aparılır: “Əgər indiyədək aerovağzal binasının 1-ci mərtəbəsi sərnişinlərin qeydiyyatı, uçuşa gedişi və uçuşdan gəlişi üçün nəzərdə tutulurdusa, yenidənqurma işləri nəticəsində bu mərtəbə ancaq sərnişinlərin qeydiyyatı və uçuşdan gəlişi üçün fəaliyyət göstərəcək. İkinci mərtəbədə isə əvvəlki layihəyə əsasən aeroport administrasiyası və mühəndis-texniki işçilərin otaqları yerləşirdi ki, onlar da ötən il yeni inzibati binaya köçürülüblər. Beləliklə, ikinci mərtəbə də sərnişinlərin gedişi üçün yenidən qurulacaq. Bu mərtəbədə sərnişinlərin rahatlığı üçün gözləmə zallarında oturacaqlar yerləşdiriləcək, kafelər xidmət göstərəcək. Bundan başqa, aerovağzal binasında 4 eskalator, 2 lift istifadəyə veriləcək. Həmçinin aerovağzal binasına təyyarələrin yaxınlaşması üçün 2 teleskopik traplar da quraşdırılıb, stasionar körpülər inşa olunub. Bu körpülərdə uçuşdan gələn yaşlı və əlil sərnişinlərə 2 lift avadanlığı xidmət edəcək. Görülən işlər nəticəsində aerovağzal binasında kommunikasiyalar tam yenilənəcək, sərnişinlərin gedişi və gəlişi üçün texnoloji avadanlıqlar quraşdırılacaq”.

Naxçıvan Beynəlxalq Hava Limanında aparılan yenidənqurma işləri ilə tanışlıqdan sonra təyyarə axşam saatlarında geriyə - paytaxt Bakıya qayıtdı.