MƏDƏNİYYƏT
Azərbaycan nümayəndə heyəti UNESCO-nun Dünya İrsi Komitəsinin növbəti sessiyasında iştirak etmişdir
Bakı, 27 iyun (AZƏRTAC). Qətərin paytaxtı Doha şəhərində UNESCO-nun Dünya İrsi Komitəsinin 38-ci sessiyası keçirilmişdir.
Sessiyada ölkəmizi “İçərişəhər” Dövlət Tarix-Memarlıq Qoruğu İdarəsinin, habelə Mədəniyyət və Turizm Nazirliyinin, Azərbaycanın UNESCO yanında Daimi Nümayəndəliyinin, UNESCO üzrə Azərbaycan Respublikasının Milli Komissiyasının rəsmiləri təmsil etmişlər.
“İçərişəhər” Dövlət Tarix-Memarlıq Qoruğu İdarəsindən AZƏRTAC-a bildirmişlər ki, sessiyanın gündəliyinin əhatə etdiyi bir çox məsələlərlə yanaşı, 2000-ci ildə UNESCO-nun Dünya İrsi Siyahısına daxil olmuş İçərişəhərin konservasiyası üzrə hesabatı da nəzərdən keçirilmişdir. Dünya İrsi Komitəsinin İçərişəhərə dair qəbul etdiyi qərarda “İçərişəhər” Dövlət Tarix-Memarlıq Qoruğunun idarəedilməsi və konservasiyası sahəsində Azərbaycan dövlətinin atdığı addımlar və əldə olunmuş irəliləyiş müsbət dəyərləndirilmiş, abidələr kompleksinin qorunması, konservasiyası və “canlı şəhər” konsepsiyasının tətbiqi sahəsində müvafiq idarəetmə alətlərinin təkmilləşdirilmə işlərinin davam etdirilməsi tövsiyə olunmuşdur.
“İçərişəhər” Dövlət Tarix-Memarlıq Qoruğu İdarəsinin rəisi Samir Nuriyevin başçılıq etdiyi nümayəndə heyəti səfər çərçivəsində UNESCO-nun Dünya İrsi Komitəsinin rəhbərliyi, habelə komitənin bir çox üzv ölkələrinin rəsmiləri və ekspertləri ilə ikitərəfli görüşlər keçirmiş, İçərişəhərin qorunması və idarəolunması ilə bağlı fikir mübadiləsi aparmışdır.
Görüşlərdə Azərbaycan hökumətinin son bir neçə ildə İçərişəhərin qorunması sahəsində ciddi irəliləyişlər əldə etdiyi vurğulanmış, dünya irsi obyekti olan bu məkanın gündəlik səmərəli idarəolunmasının təşkili, konservasiya üzrə baş plana əsasən bərpa və konservasiya layihələrinin yüksək peşəkarlıqla həyata keçirilməsi və “canlı tarix” yanaşmasının uğurla tətbiq olunması yüksək qiymətləndirilmişdir.