Brüssel, 26 iyun, AZƏRTAC

Brüssel şəhərində yerləşən NATO-nun mənzil-qərargahında Azərbaycan-NATO tərəfdaşlığının qurulmasının 30-cu ildönümünə və Azərbaycan Respublikası Silahlı Qüvvələrinin yaradılmasının 106 illik yubileyinə həsr olunan rəsmi qəbul və fotosərgi təşkil edilib.

AZƏRTAC xəbər verir ki, Azərbaycanın NATO yanında nümayəndəliyi tərəfindən təşkil olunan tədbirin əvvəlində Azərbaycan Respublikasının Dövlət Himni səsləndirilib.

Tədbirdə NATO Baş katibinin Qafqaz və Mərkəzi Asiya üzrə xüsusi nümayəndəsi, NATO Hərbi Komitəsinin sədr müavini, Alyansın Beynəlxalq Qərargahının, Beynəlxalq Hərbi Qərargahının, Müttəfiq Qüvvələrinin Avropadakı Ali Baş Qərargahının (SHAPE), NATO-nun Dəstək və Təchizat Agentliyinin yüksək vəzifəli rəsmiləri, eləcə də NATO-ya üzv və tərəfdaş ölkələrin Alyans yanındakı səfirləri və hərbi nümayəndələri,o cümlədən diplomatik korpusun üzvləri iştirak ediblər.

Rəsmi qəbulda çıxış edən Azərbaycanın NATO yanında nümayəndəliyinin başçısı Cəfər Hüseynzadə Ümummilli Lider Heydər Əliyevin ölkəmizin ordu quruculuğunda və Alyansla tərəfdaşlığın inkişafında tarixi xidmətləri barədə məlumat verib. Nümayəndəliyin başçısı qeyd edib ki, müstəqilliyinin ilk illərində çətin siyasi vəziyyətlə üzləşən, ərazi bütövlüyü və suverenliyi pozulan yeni müstəqil dövlət üçün NATO ilə tərəfdaşlığın əsasının qoyulması Azərbaycanın xarici və təhlükəsizlik siyasətində mühüm qərarlardan biri olmuşdur. Ulu Öndərin uzaqgörən siyasətinin Prezident İlham Əliyev tərəfindən uğurla davam etdirilməsi sayəsində hazırda Azərbaycanın dünyada güclü ordulardan birinə malik olduğu vurğulanıb.

Nümayəndəliyin rəhbəri Prezident İlham Əliyevin apardığı müdrik, rasional və uzaqgörən xarici siyasət nəticəsində Azərbaycanın öz ərazi bütövlüyünü və suverenliyini tam bərpa etdiyini, ərazisində separatizmə, xarici hərbi qüvvələrin mövcudluğuna son qoyduğunu və bunun münaqişələrin həlli ilə bağlı dünya tarixində görünməmiş hal olduğunu bildirib. O, Azərbaycanın otuz il davam edən münaqişəni həll etməklə regional sabitliyə əsas təhlükəni aradan qaldırdığını, Ermənistanla münasibətlərin normallaşması prosesinə təşəbbüs göstərərək Cənubi Qafqazın sabit və firavan regiona çevrilməsinə şərait yaratdığını və bu addımların ölkəmizin Avro-Atlantika təhlükəsizliyi üçün də vacib olan regionda davamlı sülhə sadiqliyinin bariz nümunəsi olduğunu diqqətə çatdırıb.

Ölkəmizin Alyansla praktiki əməkdaşlığı ilə yanaşı, yüksək səviyyəli dialoqunun da son bir neçə ildə intensivləşdiyini vurğulayan nümayəndəliyin başçısı Prezident İlham Əliyevin 2021-ci ilin dekabrında NATO-nun mənzil-qərargahına səfərinin tərəfdaşlığımıza yeni təkan verdiyini deyib. C.Hüseynzadə, həmçinin NATO-nun Baş katibi Yens Stoltenberqin cari ilin 17-18 mart tarixlərində Bakıya səfərinin Azərbaycan-NATO əlaqələrinin əhəmiyyətini və Azərbaycanın etibarlı tərəfdaş olduğunu bir daha təsdiqlədiyini bildirib.

Cəfər Hüseynzadə ölkəmizin NATO ilə qarşılıqlı maraq doğuran bir çox məsələlərlə bağlı həm yüksək səviyyəli siyasi dialoqu, həm də praktiki əməkdaşlığı inkişaf etdirdiyini, Alyansla, xüsusilə enerji təhlükəsizliyi, yaşıl enerji ixracı, iqlim dəyişikliyi və COP29 çərçivəsində əməkdaşlıq imkanlarını qeyd edib.

Azərbaycan Silahlı Qüvvələrinin NATO-nun Hərbi Komitəsi yanında hərbi nümayəndəsi polkovnik Ağaverdi Quliyev çıxışında Silahlı Qüvvələrimizin yaranması və inkişaf yolu haqqında məlumat verib və hər iki əlamətdar ildönümün Azərbaycanın həm milli, həm də beynəlxalq müstəvidə sülhə və təhlükəsizliyə sadiqliyinin sübutu olduğunu vurğulayıb.

NATO Baş katibinin Qafqaz və Mərkəzi Asiya üzrə xüsusi nümayəndəsi Xavier Kolomina və Alyansın Hərbi Komitəsinin sədr müavini general-leytenant Andrew Rohling çıxış ediblər.

Xüsusi nümayəndə 30 il əvvəl Ümummilli Lider Heydər Əliyevin Sülh Naminə Tərəfdaşlıq Çərçivə Sənədinə (SNT) imza ataraq, Azərbaycanla NATO arasında tərəfdaşlığın əsasını qoymasını tarixi addım adlandırıb. “Həmin vaxtdan bəri Alyansla Azərbaycan arasında güclü siyasi dialoq və praktiki əməkdaşlıq əlaqələri qurulub” - deyən X.Kolomina bunun bariz nümunələrindən biri kimi NATO Baş katibi Yens Stoltenberqin bu ilin 17-18 mart tarixlərində Bakıya səfərini qeyd edib.

Azərbaycanın Alyansın etibarlı tərəfdaşı olduğunu bildirən X.Kolomina ölkəmizlə NATO arasında bir sıra istiqamətlərdə, xüsusilə enerji təhlükəsizliyi və iqlim dəyişikliyi üzrə mövcud əməkdaşlıq imkanlarına diqqət çəkib.

General-leytenant Andrew Rohling çıxışında Azərbaycanın Alyansla praktiki əməkdaşlıqda aktiv fəaliyyət nümayiş etdirdiyini tədbir iştirakçılarının diqqətinə çatdırıb. Həmçinin müttəfiq dövlətlərin Azərbaycanın Alyansın sülhməramlı əməliyyatlarına, xüsusilə Əfqanıstanda Kabil Hava Limanından kritik təxliyə fəaliyyətlərinə dəstəyini və töhfələrini yüksək qiymətləndirdiyini bildirib. Azərbaycanın NATO-nun Təbii Fəlakətlərə Cavab Tədbirləri üzrə Avro-Atlantik Koordinasiya Mərkəzi (EADRCC) ilə əməkdaşlıq çərçivəsində bu sahədə Alyansa töhfələrini vurğulayıb. A.Rohling, həmçinin Azərbaycanın Ukraynaya göstərdiyi humanitar yardımın NATO tərəfindən yüksək qiymətləndirildiyini xüsusi olaraq qeyd edib.

NATO-nun mənzil-qərargahında, həmçinin Alyansla Azərbaycanın 30 illik münasibətlərini əks etdirən fotosərgi təşkil olunub. Sərgidə Ulu Öndər Heydər Əliyevin Alyansla tərəfdaşlığa mühüm töhfələrini, Prezident İlham Əliyevin 2021-ci ilin dekabr ayında NATO-nun mənzil-qərargahına səfərini, NATO Baş katibinin bu il martın 17-18-də ölkəmizə səfərini, həmçinin Azərbaycanın NATO əməliyyatlarına töhfələrini əks etdirən fotoşəkillər nümayiş olunub. Sərgi iştirakçılar tərəfindən maraqla qarşılanıb.

Vüqar Seyidov

AZƏRTAC-ın xüsusi müxbiri

Brüssel