ŞƏRH
Azərbaycan hər zaman ordu quruculuğunu inkişaf etdirəcək – ŞƏRH
![Azərbaycan hər zaman ordu quruculuğunu inkişaf etdirəcək – ŞƏRH](/files/2024/2/1200x630/1719388730850745660_1200x630.jpg)
Bakı, 26 iyun, AZƏRTAC
1918-ci il iyunun 26-da yaradılan Azərbaycan Milli Ordusu sentyabrın 15-də Qafqaz İslam Ordusu ilə birgə Bakını işğalçılardan azad etdi. 2020-ci ilin 44 günlük müharibəsində Qarabağı işğaldan azad edərkən isə şanına daha böyük şan qatdı, əzəmətini ucaltdı, Zəfər Ordusu oldu. Savaş nəzəriyyəsinin banilərindən olan Karl fon Klauzevits savaşlardan qalib çıxmanın yolunu dövlət-ordu-xalq birliyində görürdü. İkinci Qarabağ müharibəsində Azərbaycan bu nəzəriyyəni praktikada tətbiq edərək dünyaya dövlət-ordu-xalq arasındakı vəhdətin Zəfər yolunu necə açdığını nümayiş etdirdi.
Bu sözləri AZƏRTAC-a açıqlamasında Sosial Tədqiqatlar Mərkəzinin (STM) baş məsləhətçisi Şəhla Cəlilzadə söyləyib.
O bildirib ki, Azərbaycanın savaşda tətbiq etdiyi strategiyası, taktikaları, istifadə etdiyi silahlar, müasir texniki vasitələr, hərbi personalın yüksək hazırlığı, koordinasiya, qarşılıqlı faydalı müttəfiqliklərin qurulması, xarici siyasət trayektoriyası, vahid milli amal uğrunda birləşmə qələbəyə yol açan amillər oldusa, Prezident, Müzəffər Ali Baş Komandan İlham Əliyevin uğurlu siyasəti özlüyündə beynəlxalq bir təcrübə təşkil edir: “Müharibə siyasətin hərbi vasitə ilə davamıdır və Azərbaycan 1992-2020-ci illər arasındakı siyasət müzakirələrinin, BMT Nizamnaməsinin 51-ci maddəsi ilə sahib olduğu özünü müdafiə haqqını əsas alaraq, faydasız danışıqlar siyasətinə hərbi yolla son verməyə nail oldu. Bunun nəticə etibarilə uğurlu olmasının səbəbi isə Azərbaycan Silahlı Qüvvələrin gücü, peşəkarlığı, qarşısına qoyulan bütün vəzifələri icra etmək bacarığıdır. Ən başlıca səbəb isə “Vətən Anadır” - deyərək torpaq uğrunda gözünü qırpmadan canını qurban etməyə hazır olan Azərbaycan oğullarıdır. Məhz onların açdığı Zəfər yolu ilə bu gün işğaldan azad edilmiş ərazilərə Böyük Qayıdış reallaşmaqdadır”.
Onun sözlərinə görə, Azərbaycanın əsas prioritetlərindən biri də sülh müqaviləsinin imzalanmasıdır. Bu gün Ermənistanın baş naziri 1 ay ərzində sülh müqaviləsini imzalamağa hazır olduğunu bəyan etsə də, qlobal erməni şəbəkəsi və onların havadarları sülhün əldə olunmasına mane olmaq üçün sərhəddə müxtəlif təxribatlara yol açır, Ermənistanın revanşist hislərini qabartmaq üçün əllərindən gələni edirlər. Xüsusilə, Ermənistanın Qərblə hərbi-strateji əməkdaşlığı genişləndirməsi, Fransadan hücum silahları əldə etməsi, Hindistanla hərbi əməkdaşlıq qurması və s. bütün bunlar Azərbaycanı sülh danışıqlarını davam etdirməklə yanaşı, daim yeni müharibəyə hazırlıqlı olmağa, Azərbaycan Ordusunu hər zaman ən güclü formada saxlamağa vadar edir.
“Hətta Ermənistanla sülh müqaviləsi imzalansa belə, Azərbaycan hər zaman öz ordu quruculuğunu, elmi-texniki tərəqqisini artıraraq daha da inkişaf etdirəcək, faydalı strateji əməkdaşlıqlar və qarşılıqlı faydalı layihələrlə bölgədə münaqişədən çəkindirici siyasət yürüdəcək. Çünki güclü ordu ən böyük çəkindirici amildir. Təsadüfi deyil ki, Ermənistan Azərbaycanın hazırkı çəkindirici imkanlara sahib hərbi-siyasi gücünü nəzərə alaraq, Qazaxın 4 kəndini bir güllə atmadan geri qaytardı. Hərbi çəkindirmə və sülhə məcbur etmə prosesi Zəngəzur dəhlizinin, yəni regional kommunikasiyaların tam şəkildə açılması, digər 4 kəndimizin də geri qaytarılması, Ermənistanın hərbi-siyasi doktrinalarında və Konstitusiyasından işğalçı siyasətə səbəb olan bütün maddələrin silinib atılmasınadək davam edəcək. Azərbaycan, xüsusilə böyük Avrasiya siyasətində aparıcı rol oynayacaq, həm Şərq-Qərb, həm də Şimal-Cənub nəqliyyat dəhlizlərinin bağlayıcı gücü olacaq, Türk dünyasının birləşdirici amili olaraq gələcək illərdə siyasi-hərbi-iqtisadi imkanlarını daha da artıracaq. Azərbaycanı regional liderə çevirən ən mühüm amil – dövlət-ordu-xalq vəhdətindən doğan “Dəmir yumruq”dur. Bu “Dəmir yumruq” isə daim yerindədir”, - deyə Ş.Cəlilzadə vurğulayıb.