Xəbər verdiyimiz kimi, fevralın 26-da Vaşinqtonda – Ağ evdə Azərbaycan Respublikasının Prezidenti Heydər Əliyev ilə Amerika Birləşmiş Ştatlarının Prezidenti Corc Buşun görüşü olmuşdur. 

ABŞ Prezidenti Azərbaycan dövlətinin başçısını böyük hörmət və ehtiramla qarşıladı, dövlətimizin başçısı ilə yenidən görüşməyindən məmnunluğunu bildirdi.

Səmimilik və dostluq şəraitində keçən görüşdə ölkələrimiz arasında ikitərəfli münasibətlər, beynəlxalq terrorizmə qarşı birgə mübarizə, Xəzərin karbohidrogen ehtiyatlarının işlənilməsi və nəqli ilə bağlı məsələlər, Ermənistan-Azərbaycan, Dağlıq Qarabağ münaqişəsinin sülh yolu ilə həlli, regionda və beynəlxalq aləmdə baş verən proseslər haqqında fikir mübadiləsi aparıldı.

ABŞ Prezidenti beynəlxalq terrorizmə qarşı mübarizədə, antiterror koalisiyasında Azərbaycanın iştirakına və bu sahədə xidmətlərinə görə Azərbaycan Prezidentinə dərin təşəkkürünü bildirdi, ölkəmiz tərəfindən bu istiqamətdə görülən işlərdən məmnun qaldığını söylədi. Prezident Corc Buş dedi ki, Azərbaycan Amerikanın yaxın dostu, tərəfdaşıdır və biz bununla fəxr edirik.

Prezident Heydər Əliyev ABŞ-a səfərə dəvət olunduğuna, özünə və nümayəndə heyətinin üzvlərinə göstərilən qonaqpərvərliyə, Azərbaycan tərəfindən görülən işlərə yüksək qiymət verdiyinə görə Prezident Buşa minnətdarlığını bildirərək dedi ki, Azərbaycan Amerika ilə dostluq və tərəfdaşlıq münasibətlərini daim inkişaf etdirməyə çalışır.

Xəzərin zəngin karbohidrogen ehtiyatlarının işlənilməsi və nəqli ilə bağlı məsələlərdən söhbət gedərkən Prezident Heydər Əliyev Bakı-Tbilisi-Ceyhan layihəsi, Vaşinqtonda Azərbaycan, Gürcüstan, Türkiyə və Amerika Birləşmiş Ştatlarının “Şərq-Qərb enerji dəhlizi reallıqdır” mövzusunda birgə keçirdikləri beynəlxalq konfrans, əsas ixrac boru kəməri layihəsinin həyata keçirilməsi yolundakı maneələr barədə danışdı. Azərbaycan Prezidenti bununla əlaqədar ölkəmizin mövqeyini bir daha bəyan edərək dedi ki, bu layihənin həyata keçirilməsi yolundakı bütün əngəllərə baxmayaraq, Azərbaycan neftin nəqli üçün seçilmiş marşrutun reallaşdırılmasına nail olmuşdur.

Prezident Corc Buş Bakı-Tbilisi-Ceyhan layihəsinin ABŞ üçün böyük əhəmiyyət daşıdığını vurğulayaraq bildirdi ki, qarşıya çıxan maneələrin, problemlərin aradan qaldırılması üçün lazımi tapşırıqlar və göstərişlər verəcək və layihənin gerçəkləşməsini mütləq təmin edəcəkdir.

Söhbət zamanı Prezident Heydər Əliyev ölkəmiz üçün ən ağrılı problem olan Ermənistan-Azərbaycan, Dağlıq Qarabağ münaqişəsi haqqında danışdı və xəritə üzərində geniş məlumat verdi. Dövlətimizin başçısı qeyd etdi ki, Ermənistanin təcavüzü nəticəsində on ildən çoxdur ki, Azərbaycan torpaqlarının 20 faizi işğal altındadır, bir milyondan çox soydaşımız qaçqın və məcburi köçkün vəziyyətinə düşərək, əksəriyyəti çadırlarda ağır, dözülməz şəraitdə yaşayır. Azərbaycanın bu münaqişənin sülh yolu ilə həllinə tərəfdar olduğunu nəzərə çarpdıran Prezident Heydər Əliyev ATƏT-in Minsk qrupunun həmsədrlərindən biri kimi ABŞ-ın nizamlama prosesində öz səylərini daha da artıracağına ümidvar olduğunu bildirdi.

Prezident Corc Buş bu məsələ ilə bağlı Azərbaycanın narahatlığını başa düşdüyünü vurğuladı, münaqişənin tezliklə sülh yolu ilə ədalətli həlli üçün öz ölkəsinin əlindən gələni əsirgəməyəcəyini bildirdi və elə oradaca dövlət katibi Kolin Pauellə tapşırıqlar verdi.

Söhbət zamanı tərəfləri maraqlandıran digər məsələlər, regionda və beynəlxalq aləmdə baş verən hadisələr barədə fikir mübadiləsi aparıldı.

Görüşdə Amerika Birləşmiş Ştatlarının dövlət katibi Kolin Pauell, müdafiə naziri Donald Ramsfeld, Prezidentin milli təhlükəsizlik üzrə müşaviri Kondoliza Rays, Dövlət katibinin Avrasiya məsələləri üzrə müavini Elizabet Cons, ABŞ-ın Milli Təhlükəsizlik Şurasının Avrasiya məsələləri üzrə direktoru Dan Frid, ABŞ-ın Azərbaycandaki səfiri Ross Uilson, Azərbaycanın xarici işlər naziri Vilayət Quliyev, iqtisadi siyasət üzrə dövlət müşaviri Vahid Axundov, Prezidentin İcra Aparatının şöbə müdiri Novruz Məmmədov, Azərbaycanın ABŞ-dakı səfiri Hafiz Paşayev və digər rəsmi şəxslər iştirak edirdilər.

X X X

Görüş başa çatdıqdan sonra Azərbaycan Prezidenti Heydər Əliyev Ağ evin fəxri qonaqlar kitabına ürək sözlərini yazdı:

“Mən məmnunam ki, yenə də Ağ evdə, Ruzvelt otağındayam. Təşəkkür edirəm”.

Heydər Əliyev

Azərbaycan Respublikasının Prezidenti

26.02.2003-cü il”.