SİYASƏT
“Azərbaycan tarixinə şərəf, ləyaqət, qürur səhifəsi yazan Ali Baş Komandan – İlham Əliyev” mövzusunda videokonfrans keçirilib
![“Azərbaycan tarixinə şərəf, ləyaqət, qürur səhifəsi yazan Ali Baş Komandan – İlham Əliyev” mövzusunda videokonfrans keçirilib](/files/2020/3/1200x630/160878740445698279_1200x630.jpg)
Bakı, 24 dekabr, AZƏRTAC
YAP Səbail rayon təşkilatında, Vətən müharibəsində Azərbaycan xalqının möhtəşəm tarixi qələbəsinin memarı, görkəmli dövlət xadimi, möhtərəm Prezident və Müzəffər Ali Baş Komandan İlham Əliyevin şərəfli tarixi ənənələrə söykənən siyasi fəaliyyətinə həsr olunan “Azərbaycan tarixinə Şərəf, Ləyaqət, Qürur səhifəsi yazan Ali Baş Komandan - İlham Əliyev” mövzusunda videokonfrans keçirilib.
YAP Səbail rayon təşkilatından AZƏRTAC-a bildirilib ki, rayon ictimaiyyəti nümayəndələrinin, ziyalıların, partiya veteranlarının və gənc fəalların iştirak etdiyi videokonfransda YAP Səbail rayon təşkilatının sədri Şəmsəddin Hacıyev, Azərbaycan Milli Kitabxanasının direktoru Kərim Tahirov, sədr müavini Mehman İsmayılov, aparat rəhbəri Zəfər Bayramov, İdarə Heyətinin üzvləri - “Səs” media qrupunun rəhbəri Bəhruz Quliyev, 132-134 saylı Təhsil Kompleksinin direktoru Sara Xanlarova, habelə Adilə Abbasova, Rayon Şurasının üzvləri - 6 nömrəli məktəb-liseyin direktoru Gülşən Orucova, 239 nömrəli orta məktəbin direktoru Sədaqət Əzimova, 50 nömrəli orta məktəbin direktoru Sədaqət Həsənova, Azərbaycan Respblikasının Prezidenti yanında Dövlət İdarəçilik Akademiyasının dekanı Elçin Əhmədov, “Təhsil tədqiqatçıları” (Azərbaycan Respublikasının Təhsil İnstitutu) ərazi ilk partiya təşkilatının sədri Piralı Əliyev, Qadınlar Şurasının sədri Təranə Kərimova, Gənclər Birliyinin sədri Riyad Rüstəmli, fəal gənclər Bəyim Nəbiyeva və Fuad Heydərli çıxış ediblər. Natiqlər, adını müasir Azərbaycan tarixinə qızıl hərflərlə həkk edən Prezident İlham Əliyevin müstəqil daxili və xarici siyasətinin mühüm tərkib elementlərini, o cümlədən Vətən müharibəsində həm döyüş meydanında, həm də diplomatik masada əzəli düşmənimiz üzərində qazanılmış inamlı, parlaq qələbəmizi təmin edən güclü, müasir ordu quruculuğunun və dinamik, dayanıqlı iqtisadi inkişafın Azərbaycan modelinin müxtəlif aspektlərini geniş təhlil ediblər.
YAP Səbail rayon təşkilatının sədri Şəmsəddin Hacıyev partiya təşkilatının çoxminli üzvləri adından Prezident, Ali Baş Komandan, Yeni Azərbaycan Partiyasının Sədri İlham Əliyevi doğum günü münasibətilə təbrik edərək ən səmimi arzularını bildirib, ölkə başçısına möhkəm cansağlığı, sağlam uzun ömür, Azərbaycanın gələcək inkişafı naminə şərəfli fəaliyyətində yeni-yeni uğurlar, ailəsinə xoşbəxtlik, səadət arzulayıb. Azərbaycan xalqının 30 ilə yaxındır ki, həsrətində olduğu Dağlıq Qarabağ və ətrafındakı yeddi rayonun düşmən tapdağından azad edilməsi və Azərbaycanın ərazi bütövlüyünün, dövlət sərhədlərinin, suverenliyinin tam bərpa edilməsi münasibətilə Müzəffər Ali Baş Komandanımız İlham Əliyev başda olmaqla Azərbaycan Ordusunu, bütün xalqımızı təbrik edən Ş.Hacıyev diqqətə çatdırıb ki, Azərbaycan xalqı möhtərəm Prezidentimizlə sözün əsl mənasında qürur duyur, fəxr edir. Bütün Türk dünyası, eləcə də Azərbaycan xalqına dost-qardaş olan dövlətlərin vətəndaşları, sülhsevər dünya ictimaiyyəti Azərbaycanın Vətən müharibəsində əldə etdiyi möhtəşəm qələbə sevincini bölüşür. Qeyd olunub ki, 44 günlük Vətən müharibəsi dövründə Prezident İlham Əliyev döyüş meydanında, siyasi arenada, beynəlxalq informasiya mübarizəsində misilsiz uğurlara imza atdı, işğalçı Ermənistanın uydurmalarını, erməni miflərini dağıdıb, Azərbaycan xalqını məğlubiyyət, fəlakət, müsibət nisgilindən xilas edib, Azərbaycan xalqının qəhrəmanlığını, məğlubedilməzliyini, qələbə əzmini, döyüşkənliyini və işğalla heç bir zaman barışmadığını bütün dünyaya nümayiş etdirib. İlham Əliyevin memarı olduğu bu tarixi qələbə nəticəsində Azərbaycan, düşmən tapdağı altında olan torpaqlarını işğaldan azad etməklə yanaşı, müstəqillik tarixinin yeni, möhtəşəm, şərəfli tarixini yazıb. Ş.Hacıyev vurğulayıb ki, bu qələbə Prezident İlham Əliyevin rəhbəliyi ilə Azərbaycanın ötən 17 il ərzində əldə etdiyi misilsiz iqtisadi, siyasi, diplomatik uğurların, gərgin əməyin nəticəsidir. İlham Əliyevin Azərbaycan xalqının milli maraqlarına xidmət edən fəaliyyəti ulu öndər Heydər Əliyevin siyasi kursunun uğurlu davamıdır: “Dövlətimizin başçısı Azərbaycan üçün mümkünsüz görünənləri reallaşdırdı. “Ölkəmizin hazırkı iqtisadi, hərbi qüdrəti, müsbət beynəlxalq imici və dünya ictimaiyyətinin diplomatik dəstəyi olmasaydı Azərbaycan təkbaşına bu münaqişəni həll edə bilməzdi. Lakin Prezident İlham Əliyevin görkəmli dövlət xadimi, əsl Liderə xas şəxsi keyfiyyətləri, cəsarəti, intellekti, uzaqgörənliyi, situasiyanı düzgün qiymətləndirmə, adekvat, optimal qərar qəbul etmə qabiliyyəti və Xalq-İqtidar-Ordu birliyinə arxalanması nəticəsində Azərbaycan bu gün regionun Lider ölkəsinə, yeni geo-siyasi və geo-iqtisadi reallıqlar yaradan güc mərkəzinə, güclü iqtisadiyyata malik qüdrətli, demokratik, müstəqil, dünyəvi dövlətə çevrilib. İlham Əliyev yeni dövrdə Türk dünyasının yeni Lideridir. Müzəffər Ali Baş Komandanımız 44 günlük Vətən müharibəsi dövründə dünyanın nüfuzlu telekanallarına, aparıcı informasiya agentliklərinə verdiyi çoxsaylı müsahibələrində ölkəmizi, xalqımızı bütün dünyaya yenidən təqdim etdi. Azərbaycan, İlham Əliyevin rəhbərliyi ilə döyüş meydanında və diplomatik masada əldə etdiyi misilsiz nailiyyətlər nəticəsində uzun illərdən sonra məğrur, qalib dövlətə çevrildi. İndi isə Azərbaycan üçün tamamilə yeni, möhtəşəm inkişaf dövrü başlayır. Xalqımız, illərdir düşmənin viran qoyduğu torpaqlarımızı İlham Əliyevin rəhbərliyi altında qısa müddətdə yenidən quracaq, o bölgələrimizə məxsus zəngin tarixi, mədəni, dini irsimizi bərpa edəcək, Qarabağı və ətraf rayonları cənnət məkana, beynəlxalq əhəmiyyətli turizm mərkəzinə çevirəcək. Azərbaycan dünyanın ən inkişaf etmiş, əhalinin yüksək rifahının təmin olunduğu ölkələrdən birinə çevriləcək. Bu şərəfli vəzifələrin icrasında sözsüz ki, Yeni Azərbaycan Partiyasının üzvlərinin mühüm töhfələri olacaq. Yeni Azərbaycan Partiyasının hər bir üzvü ölkə başçısı İlham Əliyevin müsəlləh əsgəridir. Bizim yolumuz ulu öndər Heydər Əliyev yolu, siyasətimiz İlham Əliyev siyasətidir.”
Konfransda çıxış edən digər natiqlər İlham Əliyev şəxsiyyətini, zəngin dövlətçilik təcrübəsini, liderlik xüsusiyyətlərini və siyasi uğurlarını geniş şərh edərək, müasir müstəqil Azərbaycan dövlətçiliyinin tarixi nailiyyətlərindən və inkişaf perspektivlərindən, dövlətimizin başçısının Azərbaycanın siyasi maraqlarını yüksək səviyyədə layiqincə qorumasından və Vətən müharibəsində xalqımıza bəxş etdiyi möhtəşəm Qələbə sevincindən danışıblar.
Konfrans iştirakçıları Prezident, Ali Baş Komandan, Yeni Azərbaycan Partiyasının Sədri İlham Əliyevə “Xalqın Qəhrəmanı” Fəxri adının verilməsi təklifini yekdilliklə dəstəkləyiblər.