Bakı, 14 iyun, AZƏRTAC

Azərbaycan xalqının tarixində faciəli anlar, sarsıntılar az olmayıb. Xalqımız dəfələrlə milli faciə miqyaslı təhlükələrlə üzləşib. 1990-cı illərin əvvəli ölkəmiz və xalqımız üçün ən faciəli dövrlərdən biri idi. Söhbət bizim bir millət kimi varlığımızdan gedirdi. Azərbaycan dünyanın siyasi xəritəsindən silinmək, parçalanaraq məhv olmaq təhlükəsi ilə üzləşmişdi. Bir tərəfdən havadarlarının köməyinə arxalanan Ermənistanla aparılan müharibə, digər tərəfdən iqtisadiyyatın iflic vəziyyətə düşməsi, hakimiyyətdə olanların təcrübəsizliyi və səriştəsizliyi Azərbaycanın müstəqilliyini təhlükə qarşısında qoymuşdu. Vəziyyətin getdikcə daha da kəskinləşməsi ölkədə hakimiyyət dəyişikliyini və rəhbərliyə təcrübəli, dövlət quruculuğunda səriştəli, əhali arasında və xarici aləmdə tanınan və nüfuzu olan şəxsin gəlməsini zəruri edirdi. Bu şəxs həmin vaxt Naxçıvan Muxtar Respublikasının Ali Məclisinin sədri işləyən Heydər Əliyev idi.

Bu fikirləri AZƏRTAC-a müsahibəsində Yeni Azərbaycan Partiyası (YAP) Gənclər Birliyinin əməkdaşı Elmar Məmmədov bildirib.

Elmar Məmmədov qeyd edib ki, o vaxt hakimiyyətsizlik, iqtisadi və siyasi böhranın baş alıb getməsi, Azərbaycan ərazilərinin bir-birinin ardınca işğalı, əhalinin sosial vəziyyətinin günbəgün ağırlaşması “Müsavat”–“AXC” hakimiyyətinə etimadsızlığı gücləndirirdi. Heydər Əliyevin Naxçıvanda əldə etdiyi uğurları gözü götürməyən Xalq Cəbhəsi 1992-ci il oktyabrın 24–də Naxçıvanda silahlı çevriliş edib Heydər Əliyevi tutduğu vəzifədən devirməyə cəhd göstərsə də buna nail ola bilmədi. Çünki Heydər Əliyevin arxasında xalq dayanmışdı.

“Bununla yanaşı, Azərbaycan Respublikasına səriştəsiz rəhbərlik, getdikcə artan özbaşınalıq, cəbhədə yaranmış gərgin vəziyyət hakimiyyətə qarşı narazılığı gücləndirirdi. Bunun məntiqi nəticəsi kimi 1993–cü il iyunun 4–də Gəncədə qiyam baş verdi, qardaş qanı axıdıldı, vətəndaş müharibəsi başlandı. Vəziyyətin daha kəskin xarakter alacağından qorxuya düşən və heç bir əməli tədbir görməyi bacarmayan iqtidar məsuliyyətdən yayınmaq üçün Heydər Əliyevi Azərbaycana rəhbərliyə dəvət etməyə məcbur oldu. Azərbaycan xalqı böyük dövlətçilik təcrübəsi olan, tanınmış siyasi xadim Heydər Əliyevi təkidlə yenidən respublika rəhbərliyinə dəvət etdi. Xalq özünün sevimli oğluna etimad edir və inanırdı ki, yalnız Heydər Əliyev bu vəziyyətdən çıxış yolu tapa bilər və Azərbaycanın müstəqilliyini qoruyub saxlaya və ölkəni inkişaf yoluna çıxara bilər”, – deyə YAP Gənclər Birliyinin əməkdaşı E.Məmmədov vurğulayıb.

E.Məmmədov deyib ki, xalqın çağırışını qəbul edən Heydər Əliyev 1993–cü il iyunun 15–də Ali Sovetin sədri, bir müddət sonra isə Azərbaycan Respublikasının Prezidenti seçildi. Ölkədə baş vermiş tarixi hadisələr, faciələrimiz çox keçmədən parlamentin müzakirəsinə çıxarıldı, onlara hüquqi–siyasi qiymət verildi. Separatçı ermənilər tərəfindən başlanmış Ermənistan–Azərbaycan müharibəsində 1994–cü il mayın 12–də atəşkəsə nail olundu. Bundan sonra ölkədə siyasi-iqtisadi sabitlik bərqərar oldu, dövlət quruculuğu istiqamətində mühüm addımlar atıldı və müstəqil Azərbaycan Respublikasının yeni Konstitusiyası qəbul olundu. Ulu Öndərin rəhbərliyi ilə həyata keçirilən düşünülmüş tədbirlər nəticəsində əvvəlki iqtidarların dövründən başlayan sosial–iqtisadi tənəzzülün qarşısı alındı. Təbii ki, bütün bunlar elə də asan başa gəlmədi. Azərbaycanın inkişafını, Heydər Əliyevin hakimiyyətdə olmasını istəməyən qüvvələr 1994 və 1995–ci illərdə dövlət çevrilişinə cəhd etdi. Lakin Azərbaycan xalqının və onun liderinin əleyhinə yönəlmiş antimilli hərəkətlərin qarşısı vaxtında və yüksək peşəkarlıqla alındı.

YAP Gənclər Birliyinin əməkdaşı qeyd edib ki, bu gün Ümummilli Liderin bizə ərməğan qoyduğu dövlətimiz möhkəm təməllərə əsaslanır. Biz gənclər həm də ona görə xoşbəxtik ki, məhz Heydər Əliyevin zəngin ideyalarının davamçısı olan Prezident İlham Əliyevin rəhbərliyi ilə gələcəyə inamla addımlayırıq. Bu gün ulu öndər Heydər Əliyev siyasətinin dövlətimizin başçısı tərəfindən layiqincə davam etdirilməsi və zənginləşdirilməsi nəticəsində Azərbaycan bütün sahələrdə yüksək sürətlə inkişaf edir, dünya dövlətləri arasında öz mövqeyini daha da möhkəmləndirir. Prezident İlham Əliyevin rəhbərliyi ilə ölkəmizin dinamik inkişafı, həyata keçirilən əzəmətli layihələr, reallaşdırılan inqilabi islahatlar Azərbaycanın hərtərəfli yeniləşməsi, modernləşməsi, doğma vətənimizi dünyaya yeni formada təqdim etməyə imkan yaradan müsbət dəyişikliklər Ulu Öndərin ideyalarının təntənəsidir.