Siyəzən, 13 iyul, Elxan Yusifli, AZƏRTAC

Azərbaycanın çoxəsrlik dövlətçilik tarixində Heydər Əliyev epoxası bənzərsizdir. Ümummilli liderin Azərbaycanda birinci dəfə siyasi hakimiyyətə gəldiyi 1969-cu ilin 14 iyul günü xalqımızın tarixi taleyində oynadığı misilsiz rolu ilə daim xatırlanır. Bu tarix Azərbaycanın xilasının birinci mərhələsi, xalqın özünə qayıdış tarixidir.

AZƏRTAC-ın bölgə müxbiri xəbər verir ki, bu barədə Siyəzən rayon Heydər Əliyev Mərkəzinin təşəbbüsü ilə keçirilən "Tərəqqi yolunun başlanğıcı – əbədiyaşar lider Heydər Əliyev" mövzusunda videokonfransda bildirilib.

Videokonfransa Siyəzənlə yanaşı Sumqayıt, Qaradağ, Cəlilabad, Xızı, Qax, İsmayıllı, Bərdə və Ağdam rayon Heydər Əliyev mərkəzlərinin rəhbərləri də qoşulub.

Siyəzən Rayon Heydər Mərkəzinin direktoru İxtiyar İsayev bildirib ki, dünya şöhrətli siyasi xadim öz müdrik fəaliyyəti ilə müasir tariximizin ən şanlı və parlaq salnaməsini yaradıb. Buna görə də ümummilli liderimizin xalqa xidmətdə keçən parlaq və mənalı ömrünün hər anı siyasi təqvimimizdə özünəməxsus yerə malikdir. Ulu öndər Heydər Əliyevin nəsillərə nümunə olan həyat yolu xalqa təmənnasız xidmətdə keçib. Heydər Əliyev nəinki müstəqil Azərbaycan dövlətçiliyinin əbədiliyini təmin edib, həm də müstəqil, milli dövlətçiliyin əsasını qoyub, yeni idarəçilik məktəbi formalaşdırıb. Dahi şəxsiyyət özünün qurub-yaratdığı Azərbaycanın taleyini bu məktəbin layiqli davamçısı Prezidenti İlham Əliyevə əmanət edib.

Tədbirdə Milli Məclisin deputatı Sadiq Qurbanov çıxış edərək bildirib ki, 1969-cu ilin 14 iyul tarixə Azərbaycanın özünə qayıdışının, dirçəliş və inkişaf yolunun başlanğıcı kimi düşüb. Çünki məhz həmin tarixdən etibarən Azərbaycana rəhbərlik edən ulu öndər Heydər Əliyev qüdrətli dövlət xadimi, mahir siyasətçi kimi Azərbaycanı nəinki keçmiş SSRİ-də və dünyada tanıdıb, həm də milli varlığımızı qoruyub saxlayıb. O illərin rəşadəti və şöhrəti XX əsr tariximizə qızıl hərflərlə yazılıb. Buna görə də 14 iyul tarixi xalqımızın qəlbində həm də milliliyin, azərbaycançılığın, tarix səhifəsində milli dövlətçiliyimizin əbədi mövcudiyyət günü kimi qəbul edilir.

Videokonfransda mərkəz direktorları Arifət Əhmədova, Ofeliya Qəhrəmanova, Nərminə Omarova, Əzət Qarayeva və Vüsalə Qurbanova çıxış edərək ulu öndər Heydər Əliyevin həyata keçirdiyi məqsədyönlü iqtisadi siyasət nəticəsində Azərbaycanın 1969-cu ildən sonra inkişaf etmiş sənaye ölkəsinə, elmi-texniki tərəqqinin geniş şəkildə tətbiq olunduğu respublikaya, yüksək mədəniyyəti ilə bütün dünyada tanınan diyara çevrildiyini qeyd ediblər. Müstəqilliyə qovuşmaq məqsədilə reallaşdırılan həmin tədbirlər nəticəsində 1969-1985-ci illərdə Azərbaycanda 213 yeni iri sənaye müəssisəsi istismara verilib, dünyanın 65 ölkəsinə 350 adda məhsul ixrac olunub. Həmin illər ərzində Azərbaycanın milli gəlirinin ümumi həcmi 2,5 dəfə artıb. Moskvanın, eləcə də keçmiş SSRİ-nin digər şəhərlərinin 170 aparıcı elm və təhsil ocağına 10 mindən çox azərbaycanlı oğlan və qız təhsil almağa göndərilib. Bütün bu işlər ümummilli lider Heydər Əliyevin siyasi müdrikliyinin və uzaqgörənliyinin göstəricisidir.