Bakı, 14 noyabr (AZƏRTAC). Noyabrın 14-də Bakıda Azərbaycan Respublikası Sahibkarlar (İşəgötürənlər) Təşkilatları Milli Konfederasiyasının (ASK) və Alman-Azərbaycan Məsləhət Şirkətinin (AAMŞ) təşkilatçılığı ilə “Azərbaycanın aqrar təsərrüfatında, bağçılıq və qida sənayesində investisiyalar, biznes və maliyyələşmə imkanları” mövzusunda aqrar biznes forumu keçirilmişdir.

AZƏRTAC xəbər verir ki, biznes forumda Azərbaycanın Kənd Təsərrüfatı və İqtisadi İnkişaf nazirliklərinin təmsilçiləri, Almaniya, İngiltərə, Belçika, Fransa və İtaliyanın aqrar sahə ilə məşğul olan 10 şirkətinin nümayəndələri və fərdi sahibkarlar iştirak etmişlər.

Forumun açılışında ASK-nın prezidenti Məmməd Musayev, İqtisadi İnkişaf Nazirliyinin nümayəndəsi Zaur Qasımov, AAMŞ-nin rəhbəri Nahidə Əhmədova çıxış edərək Azərbaycanda əlverişli biznes mühitinin olması, sahibkarlığın inkişafı və ölkə iqtisadiyyatında özəl sektorun xüsusi çəkisinin artımı, aqrar sahənin tərəqqisi, əməkdaşlıq perspektivləri, ikitərəfli görüşlərin əhəmiyyəti barədə danışmışlar.

Bildirilmişdir ki, azərbaycanlı iş adamları avropalı həmkarları ilə əməkdaşlıqda maraqlıdır. Azərbaycanda biznes mühitinin daim yaxşılaşdırılması və sahibkarlara dəstək dövlətin diqqət mərkəzindədir. Hazırda 5 mindən çox sahibkarlıq subyekti ASK-nın üzvüdür.

Aqrar sahədəki uğurlar nəticəsində cari ilin 9 ayında ötən ilin müvafiq dövrünə nisbətən kənd təsərrüfatının ümumi məhsulu 7,6 faiz, o cümlədən bitkiçilik məhsulları istehsalı 10,6 faiz, heyvandarlıq məhsulları istehsalı isə 3,7 faiz artmışdır.

Diqqətə çatdırılmışdır ki, avropalı şirkətlər ilə əsasən yem zavodu, istixanaların havalandırma sistemi, meyvə-tərəvəzi üçün soyuducu anbar, bağsalma texnikası avadanlığının alınması mövzusunda danışıqlar aparılır.

Biznes forumda “Kənd təsərrüfatı və qida sənayesində investisiyalar və layihələrin maliyyələşdirilməsi”, “Aqrar sahədə Avropa texnologiyaları və Nou-hau (ixtira, orijinal texnologiya, bilik, bacarıq və s.)”, “Bağçılıqda Avropa texnologiyaları və Nou-hau” və digər mövzularda çıxışlar olmuş, təqdimatlar keçirilmişdir.

Tədbirdə Almaniyada və digər Avropa ölkələrində kənd təsərrüfatının vəziyyəti, ikitərəfli əməkdaşlıq, investisiya layihələri və digər məsələlər barədə müzakirələr aparılmışdır.

Forum çərçivəsində ikitərəfli görüşlər olmuşdur.