İQTİSADİYYAT
BAKIDA “CƏNUBİ XƏZƏR ÇÖKƏKLİYİ TİMSALINDA AKTİV GEODİNAMİK ŞƏRAİTLƏRDƏ GEOFİZİKİ TƏDQİQATLARIN SƏMƏRƏLİLİYİNİN ARTIRILMASI YOLLARI” MÖVZUSUNDA VII AZƏRBAYCAN BEYNƏLXALQ GEOFİZİKA KONFRANSI KEÇİRİLİR
Bakı, 11 may (AZƏRTAC). Mayın 11-də “Avropa” mehmanxanasında Azərbaycan Respublikası Dövlət Neft Şirkəti (ARDNŞ) Geofizika və Geologiya İdarəsinin və Azərbaycan Milli Geofizika Komitəsinin (AMGK) birgə təşkilatçılığı ilə “Cənubi Xəzər çökəkliyi timsalında aktiv geodinamik şəraitlərdə geofiziki tədqiqatların səmərəliliyinin artırılması yolları” mövzusunda VII Azərbaycan Beynəlxalq geofizika konfransı işə başlamışdır.
Tədbiri giriş sözü ilə açan AMGK-nin prezidenti Vaqif Abdullayev bildirmişdir ki, VI Azərbaycan Beynəlxalq geofizika konfransının keçirilməsindən iki il yarımdan çox vaxt ötmüşdür. Bu dövrdə istər Azərbaycanda, istərsə də beynəlxalq geofizika aləmində bir sıra əlamətdar hadisələr baş vermiş, yeni metodika, texnika və texnologiyalar işlənib hazırlanmış, tətbiq edilmişdir. AMGK, ABŞ-ın Kəşfiyyatçı Geofiziklər Cəmiyyəti (SEG), Rusiyanın Geofiziki tədqiqatlar və qazılmaqda olan neft və qaz quyularında işlər üzrə Beynəlxalq Elmi-Texniki və İşgüzar Əməkdaşlıq Assosiasiyasının (AİS) fəaliyyəti çərçivəsində bir sıra beynəlxalq və yerli tədbirlər keçirilmişdir. Əhəmiyyətli faktlardan biri də Azərbaycan geofiziklərinin ilk dəfə SEG-in ABŞ-ın Hyuston şəhərində keçirdiyi 79-cu sərgi-konfransında öz köşkü ilə iştirak etməsidir. Bu görüşlərin nəticəsi olaraq Bakıda həm tələbələr, həm də mütəxəssislər üçün dünya şöhrətli alimlərin mühazirələri təşkil olunmuşdur.
Konfrans haqqında məlumat verən V.Abdullayev demişdir ki, tədbirdə dünyanın 11, o cümlədən Azərbaycan, Rusiya, ABŞ, Türkiyə, Fransa, Almaniya, Ukrayna, Qazaxıstan, Yəmən və s. ölkələrdən 36 müəssisə və şirkətin 200-dək nümayəndəsi iştirak edir. Məruzələr demək olar ki, müasir geofizikanın bütün sahələrini əhatə edir və yeddi seksiyada aparılacaqdır. Seksiyalarda kəşfiyyat və mədən geofizikası, geofiziki məlumatların geoloji interpretasiyası, seysmologiya və geodinamika, müasir emal və interpretasiya texnologiyaları və s. mövzularda məruzələr dinləniləcəkdir. Tələbə seksiyasının təşkili sahə üzrə gənc geofizik və geoloq kadrların yetişdirilməsi baxımından çox vacibdir.
Məlumat verilmişdir ki, son 2-3 ildə Azərbaycan geofizikləri Rusiya, Gürcüstan, Ukrayna, Amerika və Avropa ölkələrinin geofiziki xidmətlər göstərən qabaqcıl serviz təşkilatları və neft şirkətləri ilə işgüzar münasibətlər qurmuş, texniki və texnoloji yeniləşmə sahəsində xeyli iş görmüşlər. Bu gün ölkədə mədən və kəşfiyyat geofizikası, eləcə də mühəndis geologiya işləri Qərb standartlarına cavab verən cihaz və avadanlıqla təmin edilmişdir.
Hazırda Azərbaycan neft geofizikasının qarşısında bir sıra mühüm problemlər durur. Daha çox metodik və texnoloji tədqiqatlar tələb edən bu problemlərin həllində geofiziklər və geoloqların səylərinin birləşdirilməsi, beynəlxalq miqyasda inteqrasiyası olduqca vacibdir.
Tədbirdə ARDNŞ-in birinci vitse-prezidenti, akademik Xoşbəxt Yusifzadə, AİS-in prezidenti Nikolay Berezovski, AMEA-nın vitse-prezidenti, akademik Akif Əlizadə, SEG-in təmsilçisi Səid Sadıqov və “bp-Azərbaycan” şirkətinin nümayəndəsi Q.Rayli çıxış etmişlər. Natiqlər 1994-cü il sentyabrın 20-də imzalanmış “Əsrin müqaviləsi”ndən ötən dövrdə Azərbaycanda neft-qaz sektorunda həyata keçirilmiş regional və qlobal layihələr barədə danışmış, Xəzər dənizində kəşf olunmuş onlarla neft-qaz yatağının məhz geoloq və geofiziklərin gərgin, məhsuldar tədqiqatları əsasında işlənilməyə başlandığını diqqətə çatdırmışlar. Bildirilmişdir ki, geofizika, geologiya elə elm və təcrübə sahələrindəndir ki, burada daha böyük nailiyyətlərə nail olmaq üçün beynəlxalq əməkdaşlıq və elmi mübadiləyə həmişə böyük ehtiyac vardır. Konfransda müzakirə olunacaq mövzular, aparılacaq diskussiyalar, qarşılıqlı təcrübə mübadiləsi kəşfiyyat və mədən geofizikasının, ümumilikdə neft elminin inkişafına, neft və qaz yataqlarının işlənilməsində yeni metod və texnologiyaların tətbiqi işinə xidmət edəcəkdir.
Sonra tədbir bölmə iclaslarında davam etmişdir.
Konfrans mayın 13-dək davam edəcəkdir.
######