Bakı, 19 fevral (AZƏRTAC). AZƏRTAC xəbər verir ki, fevralın 19-da Bakı şəhərinin rayonlarında əvvəlcədən müəyyən olunmuş yerlərdə kənd təsərrüfatı məhsullarının növbəti satış yarmarkaları keçirilmişdir. Şəhər əhalisinin kənd təsərrüfatı məhsullarına tələbatını ödəmək məqsədi ilə keçirilən yarmarkalara, mövsümə uyğun olaraq, əsasən meyvə-tərəvəz məhsulları çıxarılmışdı.

“Təzə bazar” MMC-nin həyətindəki yarmarkada alıcılara Sabirabad, Gədəbəy, Hacıqabul və digər rayonlardan gətirilmiş 9 tondan çox məhsul, o cümlədən 1,5 ton ət, 0,3 ton ağartı, 2 ton tərəvəz, 2,5 ton kartof, 1 ton bostan məhsulları, 2 ton meyvə təklif olunurdu. Paytaxt sakinləri təzə və keyfiyyətli məhsulları həvəslə alırdılar.

Kənd Təsərrüfatı Nazirliyinin nümayəndəsi Rövşən Əliyev dedi ki, yarmarkadakı qiymətlər bazardakından 20-25 faiz ucuzdur. Belə ki, qoyun ətinin kiloqramı 4 manat 50 qəpiyə, mal əti 4 manata, turp 30-40, kök 50-70, kələm 60-70, soğan və kartof 60-80, yumurtanın biri 14 qəpiyə və s. satılır.

Yasamal rayonunda, Bakı Rabitə və Nəqliyyat Kollecinin həyətində təşkil olunan yarmarkada, Kənd Təsərrüfatı Nazirliyinin nümayəndəsi Saleh Zərbəliyev bildirdi ki, buraya Salyan, Qusar, Astara, Şabran və Quba rayonlarından 67 ton meyvə-tərəvəz, ət, balıq gətirilmişdir. Bütün növ məhsullar bazarlardakından 25-30 faiz ucuz satılır.

Badamdar qəsəbəsinin mərkəzində, 239 nömrəli məktəbin yaxınlığındakı yarmarkaya Ağdaş, Salyan, Masallı və digər rayonlardan 12 tondan çox müxtəlif kənd təsərrüfatı məhsulu gətirilmişdi.

Kənd Təsərrüfatı Nazirliyinin nümayəndəsi Məmməd Həziyevin verdiyi məlumata görə, satıcı və alıcıların sayı gündən-günə çoxaldığı kimi, yarmarkalara gətirilən məhsulların çeşidi də artır. Burada ət, yağ, yumurta, pendir, müxtəlif növ konserv məhsulları, meyvə və tərəvəz almaq mümkündür. Bu məhsullar həm təzədir, həm də ucuz.

Alıcı, ağsaqqal Sərdar Əmirov qiymətlərdən razılığını bildirərək dedi ki, burada ürəyim istəyən hər şey var. Odur ki, bazarlığı yarmarkadan edirəm. Bu, mənə də sərfəlidir, qəsəbə sakinlərinə də.

Metronun “Əhmədli” stansiyasının yaxınlığında, “Azər” ticarət mərkəzindəki yarmarkada satışa Qax, Salyan, Biləsuvar, Qəbələ, Ağcabədi, Şəmkir, Kürdəmir, Quba, Astara rayonlarından gətirilmiş meyvə-tərəvəz, ət və süd məhsulları çıxarılmışdı.

Kənd Təsərrüfatı Nazirliyinin nümayəndəsi Oqtay Hüseynovun sözlərinə görə, yarmarkaya, ümumilikdə 170 ton məhsul gətirilmişdir. Satışa çıxarılan məhsulların qiymətləri bazarlardakından 20-25 faiz ucuzdur. Belə ki, qoyun ətinin kiloqramı 5 manata, mal əti 4 manat 50 qəpiyə, quş əti 2 manat 70 qəpik-3 manata, naringi 1 manat-1 manat 50 qəpiyə, kartof 60-80, soğan və kələm 70-80, kök 80, yumurtanın ədədi 15-16 qəpiyə satılırdı.

Kənd Təsərrüfatı Nazirliyinin nümayəndəsi Mustafa Rüstəmovun sözlərinə görə, Suraxanı rayonu ərazisində təşkil olunmuş yarmarkalarda - “Günəş” ticarət mərkəzində və “Suraxanı Maşınqayırma Zavodu” Açıq Törəmə Səhmdar Cəmiyyətinin ərazisində alıcılara Samux, Daşkəsən, Quba, Biləsuvar və Cəlilabad rayonlarından gətirilmiş 44,5 ton məhsul təklif olunur. Bazarlarla müqayisədə bütün məhsullar 25-30 faiz ucuz satılır. Məhsulların keyfiyyəti ciddi surətdə yoxlanılır, ət və süd məhsulları baytar müayinəsindən keçirilir.

Binəqədi rayonu 6 nömrəli Bakı Texniki Peşə Liseyinin qarşısındakı yarmarkada satışa Ağstafa, Bərdə, Goranboy və Siyəzəndən gətirilmiş 25 tona qədər nar, kələm, kartof, alma, kök, turp, çuğundur və digər meyvə-tərəvəz çıxarılmışdı. Fermerlər gətirdikləri məhsulları alıcılara ucuz qiymətlərə təklif edirdilər.

Kənd Təsərrüfatı Nazirliyinin nümayəndəsi Fəxrad Eminov bildirmişdir ki, Nərimanov rayonu Ə.Əliyev küçəsindəki yarmarkaya şənbə günü Xaçmaz, Tərtər, Daşkəsən, İmişli, Oğuz, Beyləqan rayonlarından 37,1 ton keyfiyyətli məhsul, Giləzi broyler fabrikindən 10 min ədəd yumurta gətirilmişdir.

Yarmarkada kartof, boranı, xurma 70 qəpiyə, soğan, kələm, yerkökü 80 qəpiyə, çuğundur 60 qəpiyə, pomidor 1 manat 30 qəpiyə, xiyar 1 manat 50 qəpiyə, nar 2 manata, qoz, fındıq 2 manat 50 qəpiyə, mal əti 4 manat 50 qəpiyə, qoyun əti 5 manata, toyuq əti və balıq 3 manata, bal 12 manata, yumurtanın 1 ədədi 16 qəpiyə təklif olunurdu.

Nərimanov rayon İcra hakimiyyətinin və Kənd Təsərrüfatı Nazirliyinin nümayəndələri yarmarkada qayda-qanuna nəzarət edirdilər.

######