REGİONLAR
Bakıda kənd təsərrüfatı məhsullarının növbəti satış yarmarkaları keçirilmişdir
Bakı, 21 fevral (AZƏRTAC). AZƏRTAC xəbər verir ki, fevralın 20-də Bakı şəhərinin rayonlarında əvvəlcədən müəyyən olunmuş yerlərdə kənd təsərrüfatı məhsullarının növbəti satış yarmarkaları keçirilmişdir. Şəhər əhalisinin kənd təsərrüfatı məhsullarına tələbatını ödəmək məqsədi ilə keçirilən yarmarkalara, mövsümə uyğun olaraq, əsasən meyvə-tərəvəz məhsulları çıxarılmışdı.
“Təzə bazar” MMC-nin həyətindəki yarmarkada şənbə və bazar günləri alıcılara Sabirabad, Gədəbəy, Hacıqabul və digər rayonlardan gətirilmiş 9 tondan çox məhsul, o cümlədən 1,5 ton ət, 0,3 ton ağartı, 2 ton tərəvəz, 2,5 ton kartof, 1 ton bostan məhsulları, 2 ton meyvə satılmışdır. Paytaxt sakinləri təzə və keyfiyyətli məhsulları həvəslə almışlar.
Kənd Təsərrüfatı Nazirliyinin nümayəndəsi Rövşən Əliyevin verdiyi məlumata görə, yarmarkadakı qiymətlər bazardakından 20-25 faiz ucuz olmuşdur.
Yasamal rayonunda, Bakı Rabitə və Nəqliyyat Kollecinin həyətində təşkil olunan yarmarkada iki gün ərzində Salyan, Qusar, Astara, Şabran və Quba rayonlarından gətirilmiş 67 ton meyvə-tərəvəz, ət, balıq satılmışdır. Bütün məhsullar bazarlardakından 25-30 faiz ucuz təklif olunmuşdur.
Metronun “Əhmədli” stansiyasının yaxınlığında, “Azər” ticarət mərkəzindəki yarmarkada istirahət günləri Qax, Salyan, Biləsuvar, Qəbələ, Ağcabədi, Şəmkir, Kürdəmir, Quba, Astara rayonlarından gətirilmiş 170 ton meyvə-tərəvəz, ət və süd məhsulları satılmışdır.
Kənd Təsərrüfatı Nazirliyinin nümayəndəsi Oqtay Hüseynovun sözlərinə görə, satışa çıxarılan məhsulların qiymətləri bazarlardakından 20-25 faiz ucuz olmuşdur.
Kənd Təsərrüfatı Nazirliyinin nümayəndəsi Mustafa Rüstəmovun verdiyi məlumata görə, Suraxanı rayonu ərazisində təşkil olunmuş yarmarkalarda - “Günəş” ticarət mərkəzində və “Suraxanı Maşınqayırma Zavodu” Açıq Törəmə Səhmdar Cəmiyyətinin ərazisində şənbə və bazar günləri Samux, Daşkəsən, Quba, Biləsuvar və Cəlilabad rayonlarından gətirilmiş 44,5 ton məhsul satılmışdır. Bazarlarla müqayisədə bütün məhsullar 25-30 faiz ucuz təklif olunmuşdur. Məhsulların keyfiyyəti ciddi surətdə yoxlanılmış, ət və süd məhsulları baytar müayinəsindən keçirilmişdir.
Binəqədi rayonu 6 nömrəli Bakı Texniki Peşə Liseyinin qarşısındakı yarmarkada iki gün ərzində Ağstafa, Bərdə, Goranboy və Siyəzəndən gətirilmiş 25 tona qədər nar, kələm, kartof, alma, kök, turp, çuğundur və digər meyvə-tərəvəz satılmışdır. Fermerlər gətirdikləri məhsulları alıcılara bazarlardakından ucuz qiymətlərə təklif etmişlər.
Kənd Təsərrüfatı Nazirliyinin nümayəndəsi Fəxrad Eminovun sözlərinə görə, Nərimanov rayonu Ə.Əliyev küçəsindəki yarmarkada şənbə və bazar günləri Xaçmaz, Tərtər, Daşkəsən, İmişli, Oğuz, Beyləqan rayonlarından gətirilmiş 37,1 ton keyfiyyətli məhsul, Giləzi broyler fabrikindən gətirilmiş 10 min ədəd yumurta satılmışdır.
Nərimanov Rayon İcra Hakimiyyətinin və Kənd Təsərrüfatı Nazirliyinin nümayəndələri yarmarkada qayda-qanuna nəzarət etmişlər.