Bakı, 19 yanvar (AZƏRTAC). Yanvarın 19-da Azərbaycan Respublikasının daxili işlər naziri Ramil Usubovun iştirakı ilə Baş Dövlət Yol Polisi İdarəsində 2012-ci il ərzində yol hərəkəti təhlükəsizliyinin təmini sahəsində görülən işlər və qarşıda duran vəzifələrə həsr olunmuş geniş əməliyyat müşavirəsi keçirilmişdir.

DİN-in mətbuat xidmətindən AZƏRTAC-a bildirmişlər ki, müşavirəni giriş sözü ilə açan R.Usubov demişdir ki, daxili işlər orqanlarının (DİO) mühüm xidmət sahəsi olan yol polisinin üzərinə düşən əsas vəzifələrdən biri yol hərəkətinin tənzimlənməsi, baş verə biləcək qəzaların qarşısının alınması, insanların həyat və sağlamlığının yol qəzalarından qorunması və ümumilikdə yol hərəkəti təhlükəsizliyinin təmin olunmasıdır. Təəssüf ki, görülən bütün tədbirlərə baxmayaraq, il ərzində baş vermiş ağır yol-nəqliyyat hadisələrində ölənlərin sayının artması ciddi narahatlıq doğurur.

Baş idarənin rəisi, polis general-mayoru Ramiz Zeynalov geniş məruzə ilə çıxış edərək Dövlət Yol Polisi (DYP) əməkdaşları tərəfindən ümumilikdə il ərzində 1 milyon 21 mindən çox yol hərəkəti qayda pozuntusu, o cümlədən sürət həddinin aşılması üzrə 133197, yolayrıcılarının keçilməsi qaydalarının pozulması üzrə 29466, ötmə qaydalarının pozulması üzrə 23101, nəqliyyat vasitələrinin sərxoş sürücülər tərəfindən idarə edilməsi üzrə 17912, sərnişindaşıma qaydalarının pozulması üzrə 5014 fakt aşkar edildiyini bildirmişdir.

Ötən il respublikanın avtomobil yollarında baş vermiş 2892 yol-nəqliyyat hadisəsi nəticəsində 1168 nəfər həlak olmuş, 2997 nəfər isə yaralanmışdır. Qeyd olunmuşdur ki, ötən il respublikada nəqliyyat vasitələrinin sayı 103 min artsa da, baş vermiş yol-nəqliyyat hadisələrinin sayı əvvəlki illə müqayisədə cəmi 2 fakt, həlak olanların sayı 152 nəfər artmış, yaralananların sayı isə 34 nəfər azalmışdır.

Məruzəçi demişdir ki, respublika üzrə qeydə alınmış yol-nəqliyyat hadisələrinin 86,3 faizi (2496) sürücülərin qayda pozmaları, o cümlədən 30,2 faizi (874) nəqliyyat vasitələrinin yüksək sürətlə idarə olunması, 26,1 faizi (757) ötmə və qarşıdan gələn nəqliyyatın yoluna çıхma, 8,3 faizi (242) yolayrıcılarını keçmə qaydalarının pozulması, 3,3 faizi (96) nəqliyyat vasitələrinin sərхoş vəziyyətdə idarə olunması səbəbindən baş vermişdir. Qəzaların 36,8 faizini (1065) piyadaların vurulması təşkil etmiş, nəticədə 393 piyada həlak olmuş, 749-u yaralanmışdır.

Müşavirədə çıxış edənlər görülmüş işlərdən, yol verilmiş nöqsanlardan və onların aradan qaldırılması üçün qarşıda duran vəzifələrdən danışmışlar.

Müşavirəyə yekun vuran daxili işlər naziri şəxsi heyətin diqqətini Azərbaycan Respublikası Prezidentinin “Yol-nəqliyyat hadisələri ilə əlaqədar təhlükəsizlik tədbirlərinin gücləndirilməsi və yol hərəkətinin tənzimlənməsi sahəsində idarəetmənin şəffaflığının artırılması ilə bağlı tədbirlər haqqında” 2012-ci il 26 dekabr tarixli Sərəncamına yönəltmiş və Sərəncamdan irəli gələn vəzifələrin diqqətlə öyrənilməsini və icrasını tələb etmişdir.

Nazir yol qəzalarında insan ölümünün qarşısının alınması məqsədilə hadisələrin əsas səbəblərinə, habelə nəqliyyatın təhlükəsiz və fasiləsiz hərəkətinin təmin edilməsində mühüm amillərdən olan yol hərəkətinin düzgün təşkilinə diqqət yetirilməsinin vacibliyini vurğulamışdır. Bu baxımdan sürət həddinin aşılması, yolayrıcılarının keçilməsi və ötmə qaydalarının pozulması hallarına yol verən, avtomobilləri sərxoş halda idarə edən sürücülərə qarşı daha ciddi mübarizənin aparılması və bu sahədə prinsipiallıq göstərilməsi müşavirə iştirakçılarının diqqətinə çatdırılmışdır.

Əməkdaşların iş şəraitinin və sosial problemlərinin həlli məsələlərinin daim nəzarətdə saxlanıldığını qeyd edən daxili işlər naziri hələ də bəzi əməkdaşlar tərəfindən xidmətdə neqativ hallara da yol verilməsinin mövcudluğundan narahatlığını bildirmişdir. Bunun nəticəsidir ki, təkcə ötən il ərzində 694 əməkdaş, o cümlədən 67-si korrupsiya hüquqpozmalarına görə cəzalandırılmış, 45 əməkdaş DİO-da xidmətdən xaric olunmuş, 17 nəfər isə tutduğu vəzifədən azad edilmişdir.

Eyni zamanda, general-polkovnik Ramil Usubov ağır xəsarətlə, xüsusən də ölümlə nəticələnən qəzaların daha az olması, onların sayının minimuma enməsi üçün bir daha bütün vətəndaşlara, hərəkət iştirakçılarına müraciət edərək yol hərəkəti qaydalarına riayət etmələrinin vacibliyini bildirmiş, bu sahədə maarifləndirmə və təbliğat işlərinin genişləndirilməsi ilə bağlı müvafiq tapşırıqlar vermişdir.