COP29 Sədri: Kənd təsərrüfatı və su iqlim dəyişikliyinə qarşı mübarizədə əsas prioritetlərimizdəndir
Bakı, 1 oktyabr, AZƏRTAC
Kənd təsərrüfatı iqlim dəyişikliyindən ən çox təsirlənən sahələrdən biridir. Bu səbəbdən kənd təsərrüfatı su, nəqliyyat və şəhərlərlə yanaşı, bugünkü gündəliyimizin əsas mövzularından biridir. Çünki bütün bu sahələr Azərbaycan cəmiyyəti və iqtisadiyyatı üçün həyati sütunlardır və onların davamlı olması, ətraf mühitə təsirlərinin azaldılması vacibdir.
AZƏRTAC xəbər verir ki, bu fikirləri COP29 Prezidenti Muxtar Babayev Bakı İqlim Fəaliyyəti Həftəsinin üçüncü günü tədbirin açılış sessiyasında söyləyib.
Muxtar Babayev qeyd edib ki, səhər sessiyası kənd təsərrüfatı və qida təhlükəsizliyinə həsr olunub: “Bunlar ötən il COP29-un Fəaliyyət Gündəliyində də Sədrliyin prioritetləri kimi qeyd olunmuşdu. Ev sahibi ölkə olaraq biz bu istiqamətdə öz təcrübəmizi bölüşmək və səylərimizi daha da gücləndirmək niyyətindəyik. Yüksək su çatışmazlığı kənd təsərrüfatı icmalarımıza ciddi təsir göstərir. Buna görə də biz COP29 Sədrliyinin Təşəbbüslərini “Fəaliyyət Gündəliyi”nin bir hissəsi kimi “İqlim Fəaliyyəti üçün Su Bəyannaməsi’ni təqdim etdik. Artıq 60-dan çox ölkə tərəfdaşlığı gücləndirmək, tədqiqatları inkişaf etdirmək və su ilə bağlı iqlim məsələlərinin səsini artırmaq öhdəliyini götürüb”.
O əlavə edib ki, Azərbaycan bu məqsədlə “Bakı Su və İqlim Dialoqunu” da təsis edib: “Bu təşəbbüs ölkələr arasında əməkdaşlığı dərinləşdirməyə, iqlim idarəçiliyini təkmilləşdirməyə və transsərhəd su hövzələrinin birgə idarə olunmasına xidmət edir. Çaylar sərhəd tanımadığı kimi, su üzrə məsuliyyətimiz də sərhədlərdən kənara çıxmalıdır. Təəssüf ki, bölgəmizdə müşahidə olunan kəskin azalma bu gün ən ciddi ekoloji çağırışlardan birinə çevrilib. Bunun əsas səbəbi yalnız iqlim dəyişikliyi deyil, eyni zamanda, həssas ekosistemlərə müxtəlif təzyiqlərin artmasıdır. Əgər buna vaxtında reaksiya göstərilməsə, nəticələri fəlakətli ola bilər”.
Muxtar Babayev Azərbaycanın bu sahədə BMT ilə sıx əməkdaşlığa hazır olduğunu vurğulayıb. O qeyd edib ki, kənd təsərrüfatı və kənd icmalarını dəstəkləyən müxtəlif proqramlar mövcuddur: “Əsl çətinlik fermerlərin bu imkanlara çıxışını asanlaşdırmaqdır. Bu səbəbdən biz COP29 çərçivəsində "Fermerlər üçün Bakı Harmoniya İqlim Təşəbbüsünün işə salınması: fermerlərin iqlim dəyişikliyinə qarşı dayanıqlığının artırılması üçün imkanların genişləndirilməsi"ni rəsmi elan etdik. Bu platforma fermerlərin ehtiyac duyduqları dəstəyə daha rahat çıxmasına, siyasətçilərin isə maliyyələşmədəki boşluqları görməsinə imkan yaradacaq”.
Sonda Muxtar Babayev bildirib: “Əziz dostlar və həmkarlar, bu gün biz COP prosesində qəbul olunan beynəlxalq razılaşmaları ölkə daxilində real nəticələrə çevirmək üçün yeni imkanlar qazanırıq. Sizinlə birlikdə bunun necə daha səmərəli həyata keçiriləcəyini müzakirə etməyi səbirsizliklə gözləyirəm”.
Qeyd edək ki, Bakı İqlim Fəaliyyəti Həftəsinin üçüncü gününün mövzusu “Sektorlar üzrə iqlim davamlılığının gücləndirilməsi – kənd təsərrüfatı, su, nəqliyyat, ağıllı şəhərlər: İqlim fəaliyyətində qadın liderliyi”nə həsr olunub.
Bölmənin digər xəbərləri
