MƏDƏNİYYƏT
Dünya şöhrətli müğənni Şakira Bakıda geniş konsert proqramı ilə çıxış etmişdir
Bakı, 15 oktyabr (AZƏRTAC). Oktyabrın 14-də dünya şöhrətli müğənni Şakira “Eurovision-2012” mahnı müsabiqəsinin keçirildiyi “Bakı Crystal Hall”un möhtəşəm səhnəsində geniş konsert proqramı ilə çıxış etmişdir.
AZƏRTAC xəbər verir ki, konsert Azərbaycan Respublikası Dövlət Neft Şirkətinin maliyyə dəstəyi, “Universal Music Group”un ölkəmizdəki nümayəndəsi olan “Omnikomo Music Group” şirkətinin təşkilatçılığı ilə baş tutmuşdur.
Şakira Bakı səhnəsində konsertinin yüksək səviyyədə keçməsi üçün ölkəmizə 75 nəfərlik heyətlə gəlmişdir. Proqramın hazırlıq işlərinə çoxlu sayda komanda üzvü cəlb olunmuşdur.
İlk olaraq konsertə qonaq qismində qatılan tanınmış müğənni, iki dəfə “Qremmi” mükafatı laureatı Meloni Fyona tamaşaçıların qarşısında öz repertuarından mahnılar ifa etmişdir.
Daha sonra səhnəyə çıxan Şakira Bakıdakı pərəstişkarları üçün misilsiz şou nümayiş etdirmişdir.
Müğənni “Bakı Crystal Hall”un səhnəsində azərbaycanlı pərəstişkarlarına müxtəlif albomlarında olan mahnılarını təqdim etmişdir. Dünya estradasının tanınmış ulduzunun ifası misilsiz lazer şousu ilə müşayiət olunmuşdur.
Səhnədə minlərlə insanı ələ almağı bacaran müğənni azərbaycanlı tamaşaçıları salamlayaraq demişdir: “Bu səhnədə çıxış etməyimdən çox məmnunam. Eyni zamanda, çox həyəcanlıyam”.
Müğənni Bakı səhnəsində ilk olaraq ən çox sevilən hitlərindən biri - “Whenever wherever” mahnısını ifa etmişdir. Möhtəşəm atəşfəşanlığın, mükəmməl akustikanın müşayiəti ilə daha sonra “Loca”, “La tortura””, “Hips don`t lie”, “Waka waka”, “Rabiosa” mahnıları səsləndirilmişdir.
Dünyanın bir çox şəhərlərində çıxış etdiyini xatırladan müğənni Bakıdakı konsertindən məmnunluğunu ifadə etmişdir. Anşlaqla keçən konsertdə ifa olunan hər mahnı tamaşaçıların sürəkli alqışları ilə qarşılanmışdır.
Müğənninin mahnılarını dinləmək üçün dünyanın bir çox ölkəsindən pərəstişkarları Bakıya gəlmişlər.
Nadir vokal qabiliyyətinə malik, pop musiqisinin qeyri-adi ifa üslubu ilə seçilən kolumbiyalı müğənni Şakira son illər beynəlxalq musiqi arenasının misilsiz incisi kimi məşhurlaşmışdır. Livan əsilli müğənni, eyni zamanda, bəstəkar, rəqqasə və aktrisadır.
Şakira ötən əsrin 90-cı illərinin sonlarından tanınmağa başlamışdır və hazırda müasir estrada janrının ən parlaq simalarından biridir. Müğənni iki “Qremmi”, yeddi “Latın Qremmi”, iyirmi iki “Billboard Latın Musiqi” mükafatları da daxil olmaqla, çoxsaylı uğurlara imza atmışdır.
Müğənninin müxtəlif vaxtlarda işıq üzü görmüş albomları dünya xit-paradlarında birinciliyə yüksəlmişdir.
Şakiranın hələ 13 yaşında olarkən işıq üzü görmüş “Magia” musiqi albomu onun dünyada məşhurlaşmasına səbəb olmuşdur.
Sadə studiyada lentə alınmış albomları dünyada 75 milyondan artıq pərəstişkarı tərəfindən alınmışdır. Şakiranın ABŞ-da satılan albomlarının sayı 10 milyona yaxındır. Müğənninin “Hips Don`t Lie” albomu son 10 ilin ən çox satılan musiqi albomudur. Albom onun 20 milyondan çox pərəstişkarı tərəfindən alınmışdır.
2010-cu ildə onun ifa etdiyi “Waka Waka” mahnısı dünya idman yarışlarında ən çox səslənən musiqi nömrəsi olmuşdur. Mahnıya çəkilmiş klipə “Youtube” sosial şəbəkəsində 495 milyondan çox tamaşaçı tərəfindən baxılmışdır.
Şakiranın dünya ulduzu kimi məşhurlaşmasında “Laundry Service” musiqi albomuna daxil olan “Whenever, Wherever” mahnısı böyük rol oynamışdır. Müğənninin bu ilin martında işıq üzü görmüş “Addicted to you” albomu “Billboard Latin Music”in 13 nominasiyasının 6-sında qalib sayılmışdır. Şakiranın müğənni Beyonce ilə ifa etdiyi “Beautiful liar” mahnısı “MTV Music awards”ın mükafatına layiq görülmüşdür.
Şakira 1994-cü ildə Kolumbiya kinematoqrafçılarının istehsalı olan “El Oasis” (Vahə) teleserialına çəkilmişdir.
UNİCEF-in xoşməramlı səfiri olan Şakira xeyriyyə işləri ilə də fəal məşğuldur. Müğənni Kolumbiya və bütövlükdə Latın Amerikasından olan aztəminatlı ailələrin uşaqlarının təhsil alması üçün “Fundación Pies Descalzos” (Çılpaq ayaqlar) xeyriyyə fondunu yaratmışdır. Şakira xeyriyyəçilik fəaliyyətinə görə 2010-cu ildə BMT-nin Cenevrədə keçirilən təltifetmə mərasimində təşkilatın xüsusi mükafatına layiq görülmüşdür.