CƏMİYYƏT
Fövqəladə Hallar Nazirliyinin Xüsusi Riskli Xilasetmə Xidməti xüsusi təlim keçirib
Bakı, 7 avqust (AZƏRTAC). Fövqəladə Hallar Nazirliyinin (FHN) Xüsusi Riskli Xilasetmə Xidmətinin bu il “Hazırlıq” planına əsasən, Qəbələ rayonunun Vəndam kəndi yaxınlığında çətin keçidli meşə massivində “Dağlıq və mürəkkəb relyefə malik ərazilərdə axtarış-xilasetmə əməliyyatlarının təşkili və keçirilməsi” mövzusunda səhra çıxışı keçirilib.
FHN-in mətbuat xidmətindən AZƏRTAC-a bildiriblər ki, təlimə ümumilikdə 71 nəfər, o cümlədən nazirliyin Şimal-Qərb Regional Mərkəzinin 10 xilasedicisi, Xidmətin 59 nəfərdən ibarət şəxsi heyəti, eləcə də doqquz texnikası, xüsusi təlim keçmiş üç iti cəlb edilib.
Təlimin məqsədi komandir və rəis heyətinin dağ-meşə massivlərində axtarış və qəza-xilasetmə işlərinin təşkil etmək və rəhbərlik sahəsində təcrübəsini artırmaq, mürəkkəb relyefə malik ərazilərdə təbii xarakterli fövqəladə halların nəticələrinin aradan qaldırılması tədbirlərinin yerinə yetirilməsi üzrə iştirakçıların vərdişlərini və praktiki bacarıqlarını təkmilləşdirməkdir. Eyni zamanda, hərbi hissələrin və bölmələrin çətin keçilən ərazilərdə fövqəladə hadisə rayonuna yürüşü zamanı, həmçinin ərazi üzrə regional mərkəzlərin qüvvələri ilə qarşılıqlı fəaliyyətin təşkili üzrə praktiki vərdişləri təkmilləşdirmək, şəxsi heyətə yüksək mənəvi-psixoloji keyfiyyətləri aşılamaq və onun ağır fiziki yük aldığı zaman, ekstremal şəraitdə dözümlülüyünü artırmaqdır.
Çıxış zamanı şəxsi heyət üçün 13 elementdən ibarət səhra düşərgəsi açılıb. Düşərgə üzrə sutkalıq növbətçilik xidməti təşkil olunub. Dağ hazırlığı üzrə praktiki məşğələlərin keçirilməsi üçün düşərgədən dörd kilometr məsafədə dağ-meşə massivlərində təlim nöqtələri seçilərək təyin edilib. Praktiki məşğələlərin gedişatında Xidmətin struktur bölmələri və təlimlərə cəlb edilən regional mərkəzlər arasında fövqəladə hallar (hadisələr) zamanı qarşılıqlı fəaliyyətin yaradılması məqsədilə təlimin rəhbərliyi tərəfindən müxtəlif xarakterli şərti komandalar verilib və dağ-meşə massivlərində birgə axtarış-xilasetmə əməliyyatları keçirilib.
Səhra çıxışı zamanı xilasedicilərə düşərgənin qurulması, mürəkkəb şəraitdə (dağ, yarğan, meşə və s.) gecə və gündüz axtarış cihazları və xüsusi təlim keçmiş itlərlə axtarış-xilasetmə işlərinin yerinə yetirilməsi, zərərçəkmişlərin təxliyə edilməsi üçün müvafiq xilasetmə alət və avadanlığından istifadə edərək dağ çayları üzərindən keçidlərin qurulması, alpinist ləvazimatından və əlaltı vasitələrdən istifadə olunaraq yüksəklikdən və yarğandan zərərçəkmişlərin təxliyəsi, onlara ilkin və təxirəsalınmaz tibbi yardım göstərilməsi sahələri üzrə praktiki məşğələlər keçirilib. Xilasedicilərin axtarış-xilasetmə işlərində fiziki və psixoloji dözümlülüyünün artırılması məqsədilə təlim nöqtələri düşərgədən uzaqlıqda çətin keçidli dağ-meşə massivlərində seçilib.
Praktiki məşğələlərin keçirilməsi başa çatdıqdan sonra təlim rəhbərliyi tərəfindən səhra düşərgəsində ilkin yekunlar dəyərləndirilib.