İQTİSADİYYAT
Gəncə və Şəkidə almaniyalı mütəxəssislərin iştirakı ilə “Kadastr və daşınmaz əmlakın qeydiyyatı” layihəsinin icrasına başlanılmışdır
Bakı, 12 yanvar (AZƏRTAC). Əmlak Məsələləri Dövlət Komitəsinin, Almaniyanın KfW Bankının və cəlb edilmiş GFA/GCİ Consortium məsləhətçi şirkətinin birgə iştirakı ilə Gəncədə “Kadastr və daşınmaz əmlakın qeydiyyatı” layihəsinin icrasına başlanılması ilə bağlı təqdimat keçirilmişdir.
Komitənin mətbuat xidmətindən AZƏRTAC-a verilən məlumata görə, layihənin başlıca məqsədi Gəncə şəhəri və Şəki rayonlarında daşınmaz əmlaka dair hüquqların dövlət qeydiyyatı və kadastrı sisteminin daha da inkişaf etdirilməsi, daşınmaz əmlak üzərində hüquqların qeydiyyatı ilə bağlı xidmətlərin səviyyəsinin yüksəldilməsi və çevikliyin daha da artırılmasıdır.
Bundan əlavə, layihə çərçivəsində daşınmaz əmlak obyektlərindən daha səmərəli istifadə edilməsi ilə bağlı Gəncə və Şəkinin mükəmməl rəqəmsal kadastr xəritələri yaradılacaqdır.
Layihə nəticəsində Gəncə şəhəri və Şəki rayonu əhalisi üçün özəlləşdirilmiş torpaq və daşınmaz əmlakdan daha yaxşı istifadə etmək imkanı yaratmaq, eləcə də şəffaf və səmərəli fəaliyyət göstərən daşınmaz əmlak bazarının inkişafı və stimullaşdırılması nəzərdə tutulur. Layihə nəticəsində əldə edilən məlumatlar dövlət və bələdiyyələr tərəfindən daşınmaz əmlakın, o cümlədən torpaq sahələrinin inzibatçılığı və idarə edilməsi istiqamətində əlverişli mexanizmin yaradılmasına şərait yaradacaqdır.
Layihənin həyata keçirilməsi məqsədi ilə Azərbaycan Respublikası Hökuməti və Almaniya Federativ Respublikası Hökuməti arasında Maliyyə Əməkdaşlığı haqqında Saziş imzalanmışdır. Layihəyə əsasən Nazirlər Kabinetinin müvafiq Sərəncamı ilə “Azərbaycan Respublikasının Əmlak Məsələləri Dövlət Komitəsi ilə KfW, Frankfurt am Main (“KfW”) arasında “Kadastr və daşınmaz əmlakın qeydiyyatı” layihəsinin həyata keçirilməsi üzrə Maliyyələşdirmə Müqaviləsi” təsdiq edilmişdir.
Layihənin iki mərhələdə həyata keçirilməsi nəzərdə tutulmuşdur.
Əmlak Məsələləri Dövlət Komitəsi tərəfindən layihənin səmərəli icrası məqsədi ilə bu layihə üzrə görüləcək işlərin digər beynəlxalq layihələrlə, o cümlədən Dünya Bankı tərəfindən həyata keçirilən “Daşınmaz Əmlakın Qeydiyyatı” layihəsi ilə əlaqələndirilməsi istiqamətində tədbirlər görülməkdədir. Bu layihənin icrası istiqamətində pilot işlərin Gəncə və Şəki rayonları ərazisində görülməsinin planlaşdırıldığı nəzərə alınaraq komitə tərəfindən həmin ərazilərdə pilot bələdiyyələrin və layihə üzrə işlərin aparılacağı konkret pay torpaqlarının müəyyənləşdirilməsi istiqamətində işlərin icrasına başlanılmışdır.
Layihə, həmçinin, dövlət və özəl sektor arasında əməkdaşlıq əlaqələrinin inkişaf etdirilməsini nəzərdə tutur. Belə ki, kadastr məlumatlarının yeniləşməsi üçün aparılacaq mərzçəkmə işlərinin özəl sektorla birgə həyata keçirilməsi planlaşdırılır. Həmçinin özəl torpaq sahiblərinin və bələdiyyələrin məlumat bazasının qeydiyyatı və kadastr xəritələri tamamilə yeniləşdiriləcək, onların mütəmadi tənzimlənməsi üçün sistemli yanaşmalardan istifadə ediləcək, torpaq islahatı zamanı torpaq hissələri üzərində atributların böyük hissəsində yaranan problemlər aradan qaldırılacaq, dövlət, bələdiyyə, özəl torpaqların və bələdiyyələrin digər hər hansı qeyri-dövlət torpağı kimi qeydiyyata alınacağı torpaqların sərhədlərinin sistemli və dəqiq müəyyən edilməsi işləri reallaşacaqdır.