REGİONLAR
Gəncədə içməli su təchizatı və kanalizasiya infrastrukturu yenidən qurulur
![](/files/galleryphoto/2019/2/1200x630/1564754695880113397_1200x630.jpg)
![](/files/galleryphoto/2019/2/1200x630/15647546953019417895_1200x630.jpg)
![](/files/galleryphoto/2019/2/1200x630/15647546952365144606_1200x630.jpg)
![](/files/galleryphoto/2019/2/1200x630/15647546955984819764_1200x630.jpg)
![](/files/galleryphoto/2019/2/1200x630/15647546953555252193_1200x630.jpg)
![](/files/galleryphoto/2019/2/1200x630/15647546953245155360_1200x630.jpg)
![](/files/galleryphoto/2019/2/1200x630/15647546953273038865_1200x630.jpg)
![](/files/galleryphoto/2019/2/1200x630/15647546953951615013_1200x630.jpg)
Bakı, 2 avqust, AZƏRTAC
Azərbaycan Respublikası regionlarının sosial-iqtisadi inkişafı Dövlət Proqramı çərçivəsində ölkənin ikinci böyük şəhəri, qədim tarixə və böyük sənaye potensialına malik Gəncədə içməli su təchizatı və kanalizasiya infrastrukturu yenidən qurulur.
“Azərsu” Açıq Səhmdar Cəmiyyətinin İctimaiyyətlə əlaqələr şöbəsindən AZƏRTAC-a bildirilib ki, Gəncə şəhərinin içməli su təchizatı və kanalizasiya sistemlərinin yenidən qurulması Azərbaycan Hökuməti və Almaniya İnkişaf Bankının (“KFW bankı”) birgə maliyyələşdirdiyi “II Açıq Kommunal İnfrastruktur Proqramı” çərçivəsində həyata keçirilir.
Gəncə şəhərini dayanıqlı və keyfiyyətli içməli su ilə təmin etmək üçün Göygöl, Qızılqaya mənbələri və Şəmkirçay su anbarının ehtiyatlarından istifadə olunması qərara alınıb. Bu məqsədlə ötən müddətdə Göygöl su mənbəyində məhsuldarlığı saniyədə 200 litr olan yeni drenaj sistemi yaradılıb. Gəncə şəhərində həcmi 4 min kubmetr olan su anbarı tikilib və mənbədən anbara qədər 24,3 kilometrlik magistral su kəməri çəkilib. Qızılqaya su mənbəyində bərpa-yenidənqurma işləri aparılıb, ümumi tutumu 12 min kubmetr olan 3 su anbarı, 11 kilometr magistral su xətləri inşa edilib. Ötən müddətdə Göygöl və Qızılqaya mənbələrindən şəhərə suyun verilməsi təmin edilib. Gəncə şəhərinin içməli su tələbatının böyük hissəsi Şəmkirçay su anbarı hesabına təmin olunacaq. Məhsuldarlığı sutkada 140 min kubmetr olan sutəmizləyici qurğunun inşası yekunlaşmaq üzrədir. Sutəmizləyici qurğudan şəhərə suyun verilməsi üçün 27,5 kilometr Şəmkirçay-Gəncə magistral su kəməri tikilib.
Ümumilikdə, Gəncədə 855 kilometr içməli su şəbəkəsinin tikintisi nəzərdə tutulur. Şəhərin böyüklüyü nəzərə alınaraq içməli su təchizatı və kanalizasiya şəbəkələrinin yenidən qurulması işləri mərhələli şəkildə həyata keçirilir. İndiyədək 260 kilometr içməli su şəbəkəsi yaradılıb, 144 çoxmənzilli yaşayış binasının daxili şəbəkəsi yenidən qurulub, 11 min 620 su sayğacı quraşdırılıb. Gəncə şəhərində inşası nəzərdə tutulan 813 kilometr kanalizasiya şəbəkəsinin 175 kilometrlik hissəsi tikilib. Tullantı sularının təmizləyici qurğulara ötürülməsi məqsədilə 55 kilometr kanalizasiya kollektorunun 48 kilometrlik hissəsi inşa edilib. Gəncədə yaranacaq tullantı suları gələcəkdə Samux rayonu ərazisində inşa ediləcək və məhsuldarlığı sutkada 120 min kubmetr layihələndirilən təmizləyici qurğuda təmizlənib kənarlaşdırılacaq.
Qeyd edək ki, Gəncə şəhərində icra olunan layihədən 2035-ci ilədək perspektiv inkişaf nəzərə alınmaqla 450 min nəfər faydalanacaq. Layihə çərçivəsində gələcəkdə Göygöl rayonunun Murovdağ qəsəbəsi, Hacıməlik və Mollacəlilli kəndlərinin də içməli su təchizatı yaxşılaşdırılacaq.