AZƏRTAC xəbər verir ki, aprelin 4-də Gəncənin ictimai-ədəbi həyatında əsl bayram əhval-ruhiyyəsi yaşanmışdır. İstər ədəbi yaradıcılığında və istərsə də elmi-pedaqoji fəaliyyətində əhəmiyyətli rol oynayan Gəncədə görkəmli ədəbiyyatşünas alim və yazıçı Mir Cəlal Paşayevin anadan olmasının 100 illiyi təntənə ilə qeyd edilmişdir.

Respublikamızın tanınmış alim və yazıçılarının, görkəmli elm adamlarının iştirakı ilə keçirilən yubiley mərasimində iştirakçılar əvvəlcə ümummilli liderimiz Heydər Əliyevin abidəsinin önünə əklil qoyaraq ulu öndərin xatirəsinə ehtiramlarını bildirmiş, sonra dahi söz ustası Nizami Gəncəvinin məqbərəsini ziyarət etmişlər.

Gəncə Şəhər İcra Hakimiyyətinin iclas salonunda keçirilən yubiley mərasimini şəhər icra hakimiyyətinin başçısı Eldar Əzizov açaraq qonaqları salamlamış və Mir Cəlal Paşayevin anadan olmasının 100 illik yubileyinin təntənə ilə keçirilməsini şəhər sakinlərinin görkəmli ədib və alimin xatirəsinə və ədəbi irsinə məhəbbətlərinin təzahürü olduğunu söyləmişdir.

Sonra yerli televiziya kanalının hazırladığı videofilm nümayiş etdirilmişdir. Filmdə ədibin Gəncə həyatı və həmin dövrdə yaratdığı əsərlər, habelə Gəncə ədəbi mühitinin formalaşmasında Mir Cəlal Paşayevin xidmətləri barədə şəhər ziyalılarının fikirləri dinlənilmiş və alqışlarla qarşılanmışdır. Sonra Azərbaycan Yazıçılar Birliyi Gəncəbasar şöbəsinin sədri, əməkdar incəsənət xadimi, şair Məmməd Alim çıxış edərək Mir Cəlal Paşayevin “Dirilən adam” və “Bir gəncin manifesti” əsərlərində yaratdığı obrazları təhlil etmiş, gənclik illərində yazıçı ilə olan görüşünü yada salmış və o vaxt ədibə həsr etdiyi şeirini təkrar olaraq yubiley iştirakçılarının nəzərinə çatdırmışdır.

Gəncə şəhər Təhsil İdarəsinin rəisi Mahal Əliyev ədəbiyyatşünas alim Mir Cəlal Paşayevin pedaqoji fəaliyyətindən danışmış, ədibin bu sahədə zəngin təcrübəsindən indi də bəhrələndiyini qeyd etmiş və şəhərin ümumtəhsil məktəblərində görkəmli alimin yubileyi ilə əlaqədar keçirilən tədbirləri diqqətə çatdırmışdır.

Yazıçılar Birliyinin sədri, xalq yazıçısı Anarın da çıxışı mərasim iştirakçılarının alqışlarına səbəb olmuşdur. Natiq Mir Cəlal Paşayevin anadan olmasının 100 illik yubileyinin YUNESKO səviyyəsində qeyd olunması barədə Prezident İlham Əliyevin Sərəncamının əhəmiyyətindən danışmış, sənədin dövlətimizin başçısının ədəbi və mədəni irsimizə göstərdiyi diqqət və qayğının parlaq nümunəsi olduğunu söyləmiş, sonra ədibin yaradıcılığını, elmi-pedaqoji fəaliyyətini təhlil etmiş, göstərdikləri ehtiram və diqqətə görə gəncəlilərə minnətdarlığını bildirmişdir.

Yubiley mərasimində AMEA-nın Ədəbiyyat İnstitutunun direktoru akademik Bəkir Nəbiyev Mir Cəlal Paşayevin elmi əsərlərinin əhəmiyyətindən danışmış, bu gün də ali təhsil ocaqlarında ədəbiyyatşünaslıqla məşğul olan tədqiqatçıların görkəmli alimin elmi irsindən bəhrələndiklərini fəxrlə vurğulamışdır. Qeyd etmişdir ki, təkcə “Füzulinin poetik xüsusiyyətləri” elmi əsəri kifayətdir ki, bütün Azərbaycanın müasir ədəbiyyatşünaslıq elmi Mir Cəlal Paşayevə minnətdar olsun.

Bakı Dövlət Universitetinin professorları, alimin yetirmələri Təhsin Mütəllibov və Vasim Məmmədəliyev isə Mir Cəlal Paşayevin elmi-pedaqoji fəaliyyəti ilə yanaşı, onun yüksək insani keyfiyyətləri barədə maraqlı xatirələrini danışmışlar. Böyük alim və ədibin nəcib insani keyfiyyətlərinin bu gün Mir Cəlal ocağının üzvlərində təcəssüm olduğunu qeyd edən natiqlər öz xeyirxahlıq əməlləri ilə YUNESKO-nun və İSESKO-nun xoşməramlı səfiri seçilmiş, Heydər Əliyev Fondunun prezidenti, Milli Məclisin deputatı Mehriban xanım Əliyevanın xidmətlərindən danışmışlar.

Bakı Dövlət Universitetinin prorektoru, professor, yazıçının nəvəsi Nərgiz Paşayevanın çıxışı yubiley iştirakçılarnın daha çox alqışlarına səbəb olmuşdur. Professor N.Paşayeva Mir Cəlalın yaratdığı obrazların həmişə müasir olmasından, onun əsərlərinin indi də sevilə-sevilə mütaliə edildiyindən söhbət açmış və elə buna görə də XX əsr Azərbaycan ədəbiyyatında özünə layiqli yer tutmasından bəhs edən maraqlı fikirlər söyləmişdir.

Axırda ədibin oğlu, Milli Aviasiya Akademiyasının rektoru, akademik Arıf Paşayev çıxış edərək, atasına göstərilən el məhəbbətinə görə gəncəlilərə minnətdarlığını bildirmiş və şəhər icra hakimiyyətinə xalça hədiyyə etmişdir.

######