Bakı, 21 fevral, Günel Məlikova, AZƏRTAC 

Bir sıra elmi sahələrdə olduğu kimi, tibbin də məhz Şərqdən Avropaya yayıldığı bilinir. Şərqin İbn Sina, Əbu Reyhan Biruni, Zəkəriyyə Əl Razi, İbn Təlmis, ən Nəfis, İbn al-Baytar və bir sıra dünya şöhrətli təbibləri olub. Adları çəkilən alimlər özlərindən sonra yüzlərlə qiymətli əsərlər yadigar qoyublar. Hazırda Şərq təbabətinin dünyada xüsusi və əvəzsiz yeri var.

Qədim tarixə malik Koreya təbabəti klassik Şərq müalicə üslublarını özündə əks etdirir. Bu təbabəti fərqləndirən əsas cəhət insan bədənini dörd tipə ayıran Susanq konstitusiyasıdır. Bu nəzəriyyənin əsasında hər bir insanın müxtəlif bədən üzvlərinin tam özünəməxsus quruluşa malik olması və ümumi müalicə üsullarından qaçınmaqla pasiyentlərə fərdi yanaşma fikri dayanır. Bu prinsip əsasında çalışan həkim müalicəyə başlamazdan əvvəl mütləq pasiyentlə onun şikayəti, ağrıları, qidalanması, həyat tərzi, xəstəliyinin yaranma səbəbləri haqqında soruşur. Koreya Şərq təbabəti metodları ilə aparılan müalicənin ən üstün cəhətlərindən biri də onun əks təsirə malik olmamasıdır.

Bu elmin Azərbaycanda da tətbiqi istiqamətində 2006-cı ildən etibarən SEBA (Seul-Bakı) Assosiasiyası və Koreya Kyung Hee Universitetinin birgə əməkdaşlığı nəticəsində adıgedən universitetinin Bakıda Şərq Təbabəti Klinikasının şöbəsi fəaliyyətə başlayıb. Klinika Azərbaycan-Koreya Mədəniyyət Mübadiləsi Assosiasiyasının tərkibində təşkil edilib. Müasir Koreya təhsil sahəsinin ali təhsil ocaqlarından biri olan Kyung Hee Universitetində tibb mərkəzi 1971-ci ildən etibarən fəaliyyət göstərir.

AZƏRTAC-a məxsusi müsahibəsində klinikanın baş həkimi Zərifə Quliyeva bu tibb müəssisəsi barədə məlumat verib.

Z.Quliyeva bildirib: “Qərb təbabətinin bir o qədər də təsir etmədiyi bəzi xəstəliklər məhz Şərq təbabəti yolu ilə edilən müalicəyə daha yaxşı cavab verir. Klinikamızda müalicə istiqamətlərindən biri, bəlkə də əsası fitoterapiyadır.

Müqaviləyə əsasən klinikamızda hər biri müəyyən müddətə gələn koreyalı professor və fizioterapevtlər tərəfindən oynaq-əzələ, ürək-qan-damar, allergik, dermatoloji, mədə-bağırsaq, tənəffüs, nevroloji və psixomatik xəstəliklər müalicə olunur. Həkimlərimiz hər il dəyişir. Bəzən isə həkimə tələbatın yüksək olduğu nəzərə alınaraq bu mütəxəssis yazışma əlaqəli iki il müddətinə saxlanılır. Klinikamız demək olar ki, səhiyyənin hər bir sahəsini əhatə edir. Burada müayinələr Azərbaycanda analoqu olmayan cihazlarla aparılır, xəstəliklər müxtəlif üsullarla müalicə olunur. Bu üsullara akupunktura, moksibişn, vakuum, autotens terapiyaları, nöqtə masajı, infraqırmızı işıq və bitki mənşəli dərmanlar aiddir. Onu da qeyd edim ki, müalicədə məhz bizim müəssisə üçün xüsusi olaraq Koreyadan gətirilmiş kimyəvi qatqısız, bitki mənşəli dərmanlardan istifadə edilir. Bu dərmanlar Kyung Hee Universitetinin mütəxəssisləri tərəfindən hazırlanır. Bu preparatlardan müalicədə həm dərman, həm də bioəlavə kimi istifadə edilir.

Klinikamızda həkim kosmetoloq da fəaliyyət göstərir. Kosmetologiya dedikdə bizim ağlımıza ilk gələn kosmetoloji prosedurlar və ya dəriyə qulluq vasitələridir. Lakin bizim həkim üzün müxtəlif səbəblərdən deformasiyasının aradan qaldırılmasına kömək edir, əzələ sallanmaları və qırışları aradan qaldırır, sinirlərin funksiyalarını artırılmasına kömək edir. Xüsusi cihaz vasitəsilə dəridə olan ləkələr demək olar ki tam aradan qaldırılır. Burada müasir kosmetologiyaya məxsus vasitələrdən fərqli olaraq sırf təbii maddələr əsasında hazırlanmış maska və kremlərdən istifadə edilir. Klinikada böyüklərlə yanaşı uşaqlara da tibbin müxtəlif sahələrində xidmət göstərilir”.

Klinikanın həkimləri, Kyung Hee Universitetinin professorları Qaya Çoi və Von Seok-Çang fəaliyyət istiqamətləri haqqında ümumi məlumat veriblər. Bildirilib ki, insan bədənində müxtəlif orqanların fəaliyyətinə cavabdeh 365 nöqtə var. Şərq təbabətində bir hissə ağrıdıqda bütün bədən müalicə olunur. Bu da o deməkdir ki, əgər insanın hansısa bir nahiyəsi ağrıyırsa bu müalicə yalnız ora deyil bütün bədənə tətbiq olunur. Bu üsulla ilk olaraq bədənin enerji balansı nəzarətdə saxlanılır. Hər ölkənin öz hava şəraitinə uyğun xəstəlikləri var. Bakı küləklər şəhəridir və burada da iqlimə xarakterik xəstəliklər mövcuddur. Bunlardan artrit, artroz, revmatizm, sümüklərin iltihabı, əzələ gərginliyi kimi xəstəlikləri misal çəkmək olar. Müalicələrimiz müxtəlif istiqamətlidir. Yalnız təbii maddələrdən istifadə edirik. Dərmanların qəbulu qısamüddətli təyin edilir. Dərman preparatları ilə yanaşı arı zəhərindən də istifadə edilir. Bu maddə artroz, artritdə, revmatizm və ümumiyyətlə oynaq xəstəliklərində çox effektiv təsir göstərir.