CƏMİYYƏT
Maarifləndirici kurslar bələdiyyə seçkilərinin daha şəffaf və qanunamüvafiq keçirilməsi baxımından önəm kəsb edir
Bakı, 17 oktyabr, AZƏRTAC
Otuz altı saylı Xətai dördüncü seçki dairəsi dairə seçki komissiyasında aşağı seçki komissiyalarının katibləri, üzvləri və məntəqə seçki komissiyalarının sədrləri üçün seçki hüququ üzrə ixtisaslaşdırılmış kurslar başa çatıb.
AZƏRTAC xəbər verir ki, dairə seçki komissiyasının sədri Tahir Süleymanov çıxış edərək bu kursların Azərbaycan Prezidentinin 2011-ci il 27 dekabr tarixli Sərəncamı ilə təsdiq edilmiş “Azərbaycan Respublikasında insan hüquq və azadlıqlarının müdafiəsinin səmərəliliyini artırmaq sahəsində Milli Fəaliyyət Proqramı”na əsasən aşağı seçki komissiyalarının üzvlərinin maarifləndirilməsi məqsədilə təşkil edildiyini bildirib. O qeyd edib ki, kurslarda iştirakçılara bələdiyyə seçkilərinə hazırlıq, onun keçirilməsi, səslərin hesablanması və nəticələrin rəsmiləşdirilməsi işində məntəqə seçki komissiyalarının vəzifələri və fəaliyyətlərinin təşkili ilə bağlı məlumat verilir. Bununla bağlı aşağı seçki komissiyalarının üzərinə düşən vəzifələr şərh olunur. Belə maarifləndirici kurslar bələdiyyə seçkilərinin daha şəffaf və qanunamüvafiq keçirilməsi, həmçinin Seçki Məcəlləsində nəzərdə tutulan məsələlərin öyrənilməsi və şəffaf yerinə yetirilməsi baxımından böyük önəmə malikdir. İnanırıq ki, səsvermə prosesində heç bir problem olmayacaq və seçkilərin tam ədalətli keçirilməsini təmin edəcəyik. Xətai dördüncü seçki dairəsinin əhatə etdiyi məntəqə seçki komissiyalarının sədrləri təcrübələrindən istifadə edərək bu istiqamətdə bacarıqlarını əsirgəməyəcəklər.
Diqqətə çatdırılıb ki, 36 saylı Xətai dördüncü seçki dairəsinin ərazisində 36 daimi seçki məntəqəsi fəaliyyət göstərir və 44 min 476 seçici var. Zəruri texniki avadanlıqlarla təchiz edilən məntəqələrdən 10-da veb-kameralar quraşdırılıb.
Sonra Xətai rayon məhkəməsinin hakimi Əminə Abbasovanın “Seçki hüququ və onun təminatının qanunvericilik əsasları, aşağı seçki komissiyaları və məhkəmələr tərəfindən seçki hüququnun qorunması mexanizmləri” mövzusunda məruzəsi dinlənilib.
Mərkəzi Seçki Komissiyasının katibi Mikayıl Rəhimov seçki prosesində KİV-lərin rolu, yerli və xarici müşahidəçilərin hüquq və vəzifələrinin praktiki tərəfləri və digər məsələlər barədə danışıb. O, seçki qanunvericiliyinin məhz bu iki subyektlə necə davranmaqla bağlı müəyyənləşdirdiyi qaydalar barədə iştirakçılara məlumat verib. Eləcə də bələdiyyə seçkilərinin keçirilməsinin təmin edilməsi ilə bağlı MSK tərəfindən həyata keçirilən tədbirlər və qarşıda duran vəzifələrdən söhbət açıb. Qeyd edib ki, 36 saylı Xətai dördüncü seçki dairəsi dairə seçki komissiyasının binasında məcburi köçkün rayonlarından olan məntəqə seçki komissiyasının sədrləri də iştirak edirlər. Ümumiyyətlə, bu təlimlər və müzakirələr bələdiyyə seçkilərinin yüksək səviyyədə təşkili üçün yaxşı imkanlar yaradır.
MSK katibi jurnalistlərə müsahibəsində deyib ki, təxminən altı mindən çox komissiya üzvü təlimlərə cəlb olunub. Bu gün kursların sonuncu günüdür. MSK maarifləndirici tədbirlərə xüsusi önəm verir. Bu baxımdan kurslar aşağı seçki komissiyalarının üzvlərinin və məntəqə seçki komissiyaları sədrlərinin maarifləndirilməsində, onların peşəkarlığının yüksəldilməsində, hüquqi biliklərinin təkmilləşdirilməsində mühüm əhəmiyyətə malikdir. Bələdiyyə seçkilərinədək müxtəlif dövlət orqanları ilə birgə çoxsaylı maarifləndirmə tədbirlərinin keçirilməsi də nəzərdə tutulur.
Qeyd edək ki, belə kurslar 33 saylı Xətai birinci, 34 saylı Xətai ikinci, 35 saylı Xətai üçüncü seçki dairələri dairə seçki komissiyalarında da təşkil olunub.
Kurslarda MSK-nın nümayəndələri və dairə seçki komissiyalarının üzvləri, rayon prokurorluğunun və polis idarəsinin, rayon icra hakimiyyətinin əməkdaşları seçici siyahıları ilə işin aparılması, seçkiqabağı təşviqatın aparılmasına şərait yaradılması, bildirişlərin seçicilərə çatdırılması və sair bu kimi istiqamətlərdə yerli icra və bələdiyyə qurumlarının rolu və onların seçki komissiyaları ilə səmərəli qarşılıqlı əlaqələrinin qurulması məsələləri ilə əlaqədar çıxışlar ediblər.
Habelə seçici siyahılarının təkmilləşdirilməsi, rəsmi seçki sənədlərinin daşınması və saxlanılmasının təhlükəsizliyinin təmin edilməsi, seçki hüquqlarının pozulmasına görə məsuliyyət nəzərdə tutan qanunvericilik aktları və məsuliyyət növlərinə dair çıxışlar olub.
Seçici siyahıları ilə iş qaydası ilə bağlı seminar da keçirilib.