Bakı, 14 fevral, AZƏRTAC

Azərbaycan Milli Elmlər Akademiyasının (AMEA) Mərkəzi Elmi Kitabxanasında (MEK) beynəlxalq və ictimaiyyətlə əlaqələr sahəsində görülmüş işlərin təqdimatı keçirilib.

Kitabxanadan AZƏRTAC-a bildirilib ki, MEK-in direktoru Leyla İmanova qurumun 5 illik strateji hədəflərindən olan beynəlxalq münasibətlərin, ictimaiyyətlə əlaqələrin formalaşdırılması, informasiya təhlükəsizliyi və informasiyanın paylaşılması məsələlərindən danışıb. O, 2018-ci ildə MEK fəaliyyətinin beynəlxalq müstəvidə qiymət almasına nümunə olaraq kitabxananın Macarıstan Prezidenti tərəfindən “Qızıl xaç” ordeninə layiq görüldüyünü, UNESCO-nun İşçi Qrupu tərəfindən MEK-in müəllifi olduğu elektron kataloqun tarixi abidələrin sistemli şəkildə qeydiyyata alınması üçün etibarlı format kimi təsdiq edildiyini söyləyib. Bildirilib ki, Almaniyanın Berlin Humboldt Universitetinin fəxri professoru Klaudia Lyuks tərəfindən MEK fəaliyyətinə ekspert baxışı keçirilib və fəaliyyətin beynəlxalq standartlara uyğun olması, bir sıra fəaliyyətlərə isə dünyanın heç bir kitabxanasında rast gəlinmədiyi təsdiqlənib.

MEK-in beynəlxalq və ictimaiyyətlə əlaqələr şöbəsinin müdiri Mübariz Göyüşlü 2018-ci ildə görülmüş işlərin hesabatını təqdim edib. Bildirib ki, kitabxananın 2015-ci ildən etibarən Azərbaycan, rus və ingilis dillərində saytı fəaliyyət göstərir və buradakı informasiyalar gün ərzində yenilənir. O, həmçinin Azərbaycanda fəaliyyət göstərən 80-ə yaxın media orqanı ilə fəal əməkdaşlıq etdiklərini, Mətbuat Şurası və bir sıra qurumlarla tərəfdaşlığa dair memorandum imzaladıqlarını qeyd edib. M.Göyüşlü MEK-in beynəlxalq kitab mübadiləsi çərçivəsində 37 ölkənin 105 elmlər akademiyaları, universitetləri, cəmiyyətləri, muzeyləri, ayrı-ayrı şəxslərilə mübadilə apardığını qeyd edib. Mübadilə aparılan ölkələr sırasında ABŞ, Türkiyə, Böyük Britaniya, Yaponiya, Çin, Fransa, Almaniya, Rusiya, Belarus, Ukrayna, Norveç, Qazaxıstan, İran, Misir, Avstriya, İsveçrə, Çex, Rumıniya və digər ölkələr də var. MEK-in “Azərbaycan Xalq Cümhuriyyəti İli”nə bir sıra istiqamətlərdə töhfə verdiyini deyən M.Göyüşlü Cümhuriyyət dövründə çap olunan qəzetlərin “Vikipediya”da səhifələrinin yaradıldığını vurğulayıb.

Sonra Mətbuat Şurasının sədr müavini Müşfiq Ələsgərli və şuranın idarə heyətinin üzvü Azər Həsrət, AMEA Rəyasət Heyəti aparatının mətbuat və informasiya idarəsinin rəis müavini Ülviyyə Rzayeva MEK fəaliyyətinin şəffaflıq, hesabatlılıq, açıqlıq prinsipləri əsasında qurulmasını xüsusi vurğulayıb, 2018-ci il ərzində akademiya institutlarının saytlarına edilən müraciətlər və yerləşdirilən xəbərlərlə bağlı statistikanı diqqətə çatdırıblar. Çıxış edənlər MEK-in beynəlxalq və ictimaiyyətlə əlaqələr şöbəsinin fəaliyyətini yüksək dəyərləndirib, kitabxananın informasiyanın mühafizə olunması və ötürülməsi, media arxivinin qorunması sahəsində çalışmalarının təqdirəlayiq olduğunu qeyd ediblər.

Tədbirdə, həmçinin MEK-in kitabxana-xidmət şöbəsinin müdiri Aygün Səfərova və şöbənin əməkdaşı Aytən Rəhimova Beynəlxalq Kitab Bağışlama Günü münasibətilə təqdimatla çıxış edib, bu günün mahiyyəti, MEK tərəfindən həyata keçirilən “Açıq kitabxana” layihəsi, kitab aksiyası, tədbirlər haqqında məlumatları iştirakçıların diqqətinə çatdırıblar.

Sonda qonaqlar tərəfindən MEK-in beynəlxalq və ictimaiyyətlə əlaqələr şöbəsinin fəal əməkdaşları İlahə Feyziyeva, Şəlalə Məhyəddinqızı, Röya İsrafilova və başqalarına işlərində təşəbbüs və yüksək göstəricilərə görə dəyərli kitablar hədiyyə edilib.