REGİONLAR
MİNGƏÇEVİRDƏN BAKIYA SÜRƏT QATARI İŞLƏYƏCƏK
Yaxın günlərdə Mingəçevir-Bakı, Bakı-Mingəçevir sürət qatarı ilə sərnişin daşınmasına başlanacaqdır. Bu məqsədlə Yevlax dəmir yolu stansiyasından şəhərə qədər olan xəttin yenidən qurulması başa çatdırılmışdır. Müasir tələblərə cavab verən, milli memarlıq elementləri ilə bəzədilmiş vağzal binasında son tamamlama işləri görülür. Tikinti- quraşdırma işlərini Azərbaycan Dövlət Dəmir Yolunun inşaatçılar dəstəsi aparır. Yeni marşrut respublikamızın bir sıra şəhər və rayonları ilə paytaxt arasında sərnişin daşınmasını xeyli yaxşılaşdıracaqdır.
X X X
GÖMRÜKÇÜLƏRƏ BAYRAM HƏDİYYƏSİ
Mingəçevir Gömrük postunun kollektivi peşə bayramlarını təzə binada qarşılamışlar. Bu münasibətlə toplantı keçirilmiş, şəhər ictimaiyyətinin nümayəndələri binanın foyesində yaradılmış “Heydər Əliyev müstəqil Azərbaycanın Gömrük sisteminin qurucusudur”, “Müstəqilliyimizin və Gömrüyümüzün 10 ili” foto-rəsm guşələrinə baxmış, ölkəmizdə gömrük xidməti işinin təşkili ilə tanış olmuşlar.
X X X
ŞƏHİD AİLƏLƏRİNƏ QAYĞI
Azərbaycan Dövlət Rayon Elektrik Stansiyasının işçilərindən 14 nəfəri torpaqlarımızın müdafiəsi uğrunda döyüşlərdə şəhid olmuş, onlardan ikisi “Azərbaycan bayrağı” ordeni ilə təltif edilmişdir.
Stansiyanın qarşısındakı meydanda kollektivin vəsaiti ilə şəhid energetiklərin xatirəsinə abidə ucaldılmış, bulaq inşa olunmuş, yaşıl xiyaban salınmışdır. Şəhidlərin ömür yolundan bəhs edən kitab nəşr olunmuşdur. Onların ailələrinin üzvü olan 65 nəfər stansiyada işlə təmin olunmuş, 27 şəhid ailəsi himayəyə götürülmüşdür. Son vaxtlar onlara 9 milyon manat həcmində maddi yardım göstərilmişdir.