SİYASƏT
Növbəti Brüssel görüşü Azərbaycanın diplomatik uğurlarının davamıdır – Şərh
Bakı, 15 may, AZƏRTAC
Avropa İttifaqı Şurası Prezidenti Şarl Mişelin Azərbaycan Prezidenti İlham Əliyevlə Ermənistanın baş naziri Nikol Paşinyan arasında keçirilən görüşün nəticələri ilə bağlı açıqlaması Brüssel platformasında aparılan müzakirələrin rəsmi Bakının prinsipial mövqeyinə və təbii ki, bu mövqeyin söykəndiyi reallıqlara, beynəlxalq hüququn norma və prinsiplərinə uyğun bir şəkildə davam etdirildiyini sübuta yetirir.
Bunu AZƏRTAC-a açıqlamasında siyasi ekspert Elçin Mirzəbəyli deyib.
Onun sözlərinə görə, Ermənistan tərəfinin son zamanlar daha çox gündəmə gətirdiyi, artıq tarixin arxivinə göndərilmiş SSRİ adlı “mürəkkəb konfederasiya” adlandıra biləcəyimiz ölkənin müttəfiq subyektləri arasındakı inzibati sərhədləri əks etdirən 1975-ci ilin xəritələri ilə bağlı iddialarına baxmayaraq, Avropa İttifaqı Şurası Prezidentinin yekun bəyanatında mahiyyət etibarilə Qarabağın Azərbaycanın ayrılmaz tərkib hissəsi olduğunu ifadə edən “Alma-Ata Bəyannaməsi”nə istinad edilməsi İrəvanın növbəti dəfə tarixi və hüquqi reallıqlarla və təbii ki, Bakının mövqeyi ilə barışmaq məcburiyyətində qaldığını təsdiqləyir.
"Şarl Mişelin üçtərəfli görüşün nəticələri ilə bağlı yekun bəyanatında diqqətçəkən önəmli məqamlardan biri də Ermənistanın Qarabağ da daxil olmaqla, Azərbaycanın ən azı 86,6 min kvadratkilometr ərazisini rəsmən və açıq şəkildə tanıdığını bəyan etdiyinin vurğulanmasıdır.
Avropa İttifaqı Şurası Prezidentinin yekun bəyanatında Laçın yolu ilə bağlı da heç bir ifadə yer almayıb və bu amil Azərbaycanın öz suveren ərazilərində tətbiq etdiyi hüquqi prosedurlar nəticəsində yaranan reallıqların beynəlxalq ictimaiyyət tərəfindən qəbul olunduğunu göstərir.
Şarl Mişelin bəyanatında nəzərəçarpan önəmli məqamlardan biri də Azərbaycanın erməni əsilli sakinləri ilə bağlı əsasən Avropa İttifaqının baxış bucağını əks etdirən yanaşmadır. Burada da söhbət Azərbaycan ərazisində - Qarabağda yaşayan ermənilərin “hüquq və təhlükəsizliyi”ndən, erməni əsilli şəxslərlə rəsmi dövlət təsisatlarının gələcək reinteqrasiya prosesi müstəvisində aparacağı dialoqdan gedir", - deyə E.Mirzəbəyli vurğulayıb.
Siyasi ekspert diqqətə çatdırıb ki, rəsmi Bakı Azərbaycanın erməni sakinlərinə ölkə Konstitusiyası çərçivəsində bütün hüquqların veriləcəyini bəyan edib. Bu baxımdan, nə bu gün, nə də gələcəkdə Azərbaycanda yaşayan ermənilərə hər hansı bir statusun verilməsindən söhbət belə gedə bilməz. Azərbaycan ərazisində yaşayan hər kəsin hüquqlarına və təhlükəsizliyinə, onların milli, irqi və dini mənsubiyyətlərindən asılı olmayaraq, konstitusiya çərçivəsində təminat verilir. Əhalinin hər hansı bir qrupunun “hüquq və təhlükəsizliyi” ilə bağlı hansısa “beynəlxalq mexanizmlər”in müəyyənləşdirilməsi Azərbaycan Konstitusiyasının və beynəlxalq hüququn əsas prinsiplərindən birini - bərabərlik prinsipini pozduğu üçün heç bir halda tətbiq edilə bilməz.
"Brüsseldə aparılan müzakirələrdə Zəngəzur dəhlizinin, xüsusilə də dəhlizin dəmir yolu hissəsinin açılması ilə bağlı irəliləyişin əldə olunması da, qənaətimə görə, müsbət tendensiyadır və sözügedən istiqamətdə kənar müdaxilələrdən qaynaqlanan amillərin effektiv təsir gücünə malik olmadığını nümayiş etdirir.
Qənaətimə görə, Brüssel görüşünü Azərbaycanın diplomatik uğurunun davamı kimi qəbul etmək olar", -deyə Elçin Mirzəbəyli fikirlərini yekunlaşdırıb.