Bakı, 19 mart, Günel Məlikova, AZƏRTAC

Azərbaycan Respublikasının Prezidenti İlham Əliyevin tapşırığına əsasən, “Ölkəmizi tanıyaq” devizi ilə keçirilən maarifləndirici tur-aksiya çərçivəsində Naxçıvan Muxtar Respublikasında səfərdə olan Bakı məktəbliləri martın 19-da paytaxta geri dönüblər.

AZƏRTAC xəbər verir ki, Heydər Əliyev Beynəlxalq Aeroportunun gözləmə zalında aksiya iştirakçılarını rayon icra hakimiyyətlərinin əməkdaşları, tədbirin təşkilatçıları, ictimaiyyətin nümayəndələri qarşılayıblar.

Naxçıvana səyahət zamanı şagirdlər ümummilli lider Heydər Əliyevin abidəsini ziyarət edib, Heydər Əliyev Muzeyində olublar. Burada onlar Ulu Öndərin həyat və fəaliyyətini əks etdirən fotoşəkillər, kitablar, sənədlər, Ümummilli Liderə məxsus geyim və şəxsi əşyalara baxıblar.

Tur-aksiya iştirakçıları, həmçinin Batabat Dövlət Qoruğu, Batabat Astrofizika Rəsədxanası, Gənclər Mərkəzi, Dövlət Bayrağı Muzeyi, Naxçıvan Dövlət Universiteti, orta məktəblər, Naxçıvan şəhərində fəaliyyət göstərən sənaye müəssisələri və bir sıra tarixi abidələr ilə tanış olublar. İştirakçılar Naxçıvan şəhərinin füsunkar təbiətə malik qədim Ordubad rayonuna da səfər edib, tarixi və görkəmli şəxsiyyətlərin ev-muzeyində olub, onlara aid şəxsi əşyalar və ekspozisiyalarla bağlı məlumatlandırılıblar.

Bakı məktəbliləri Naxçıvan, Ordubad şəhərlərinin, Şahbuz, Kəngərli rayonlarının tarixi, maddi-mədəniyyət nümunələri, turizm mərkəzləri və başqa gəzməli-görməli yerləri ilə tanış olub, “Duzdağ” otelində Naxçıvan Dövlət Filarmoniyasının Kamera Orkestrinin konsertində iştirak ediblər.

Naxçıvana səfərdən razılığını bildirən Bakı məktəblisi Jalə Əlizadə təəssüratlarını bölüşüb. O, AZƏRTAC-a müsahibəsində deyib: “Qədim Naxçıvanın tarixi yerlərini gəzdik, məktəblər, universitet və sənaye müəssisələri ilə tanış olduq. Azərbaycanda yaşadığım üçün özümü çox xoşbəxt hiss edirəm. Ölkəmizin qədim tarixinin, zəngin mədəniyyətinin öyrənilməsində bu layihənin bizə çox böyük köməyi oldu. Yaradılan şəraitə görə dövlətimizin başçısına minnətdarlığımızı bildiririk”.

Şagird Rüstəm Aslanov məmnunluğunu bu sözlərlə ifadə edib: “Naxçıvan şəhərinin təbiəti, muzeyləri, tarixi yerləri ilə tanış olduq. Ölkəmizdə belə gözəlliklərin olmasından çox böyük qürur hissi keçirirəm. Bu qədim diyardan olduqca xoş təəssüratlarla ayrıldıq. Naxçıvana yenidən gedəcəyim günü səbirsizliklə gözləyəcəyəm”.

Xatırladaq ki, “Ölkəmizi tanıyaq” devizi ilə keçirilən maarifləndirici tur-aksiya çərçivəsində Bakı məktəblilərinin Naxçıvana səfəri martın 16-dan 19-dək davam edib.