İQTİSADİYYAT
Ötən il sosial-iqtisadi inkişaf baxımından Yevlax rayonu üçün uğurlu olmuşdur
Yevlax, 8 fevral (AZƏRTAC). 2013-cü ildə Yevlax rayonunda ümumi daxili məhsulun (ÜDM) həcmi 475,4 milyon manat olmuşdur. Bu, əvvəlki ilin eyni dövrünə nisbətən 98,4 milyon manat və yaxud 26,1 faiz çoxdur. ÜDM-in 11,8 milyon manatını sənaye, 79,2 milyon manatını kənd təsərrüfatı, 99,8 milyon manatını tikinti, 233 milyon manatını ticarət, 5 milyon manatını nəqliyyat, 1,1 milyon manatını rabitə, 45,4 milyon manatını digər xidmətlər təşkil etmişdir. İstehsal olunmuş 4,8 milyon manatlıq sənaye məhsulu ixrac olunmuşdur. Adambaşına 3843,1 manat ÜDM istehsal olunmuşdur ki, bu da 2012-ci ilə nisbətən 760,9 manat və yaxud 24,7 faiz çoxdur.
AZƏRTAC xəbər verir ki, bu faktlar Yevlax şəhərindəki Heydər Əliyev Sarayında 2013-cü ilin yekunları və cari ildə qarşıda duran vəzifələrlə bağlı keçirilən yığıncaqda səsləndirilmişdir.
Yığıncaqda bildirilmişdir ki, 2013-cü il sosial-iqtisadi inkişaf baxımından Yevlax rayonu üçün uğurlu olmuşdur. Rayonda geniş tikinti-quruculuq işləri aparılmış, infrastrukturun yaxşılaşdırılmasına, əhalini narahat edən problemlərin aradan qaldırılmasına xüsusi diqqət yetirilmişdir.
Hesabat dövründə rayon sakinlərinə, sahibkarlara, iş adamlarına 24 milyon 893,1 min manat kredit verilmiş, 1258-i daimi olmaqla 1410 yeni iş yeri açılmışdır.
Bu müddətdə bütün maliyyə mənbələri hesabına kapital qoyuluşunun həcmi 121 milyon manat olmuşdur. Əsas kapitala 99,8 milyon manat investisiya yönəldilmişdir ki, bu da 2012-ci ilə nisbətən 68 milyon manat və ya 3 dəfə çoxdur.
Hesabat ilində 180 çarpayılıq şəhər mərkəzi xəstəxanası, 50 çarpayılıq regional vərəm dispanseri, regional qaz nəzarəti idarəsinin inzibati binası, 4 mərtəbəli 23 mənzilli ev, Aran qəsəbəsində və Balçılı kəndində 180 şagird yerlik tam orta, İsmayılabad kəndində 90 şagird yerlik ibtidai məktəb binaları tikilib istifadəyə verilmişdir. Yevlax hava limanının inzibati binası və Kövər kənd tam orta məktəbinin binası əsaslı təmir olunmuş, regional referens toksikologiya və karantin ekspertiza laboratoriyası binasının tikintisi başa çatdırılmışdır.
Hesabat dövründə Yevlax şəhərində abadlıq işləri davam etdirilmişdir. Heydər Əliyev xiyabanında, Nizami parkında əsaslı təmir işləri aparılmış, 4 kilometr uzunluğunda avtomobil yolu asfaltlanmış, 25 min ədəddən çox ağac əkilmişdir.
Rayonun 11 yaşayış məntəqəsini birləşdirən Bakı-Qazax magistralı-Səmədabad-Qaraməmmədli-Rüstəmli-Qaramanlı-Köyük avtomobil yolunun 5,5 kilometr hissəsi istifadəyə verilmiş, Səmədabad-Bünyadabad kəndlərini birləşdirən 4,5 kilometr, Səmədabad-İsmayılabad kəndləri arasındakı 1,8 kilometr avtomobil yolları əsaslı təmir olunmuşdur.
Hazırda Kür çayı sahilində 5 ulduzlu otelin, təhsil şöbəsinin, “Azərbaycan Beynəlxalq Bankı” ASC-nin Yevlax filialının, qaz istismar sahəsinin, 11 saylı Ərazi Vergilər İdarəsinin, İqtisadiyyat və Sənaye Nazirliyinin Aran Regional İdarəsinin, Əcəmi və Yuxarı Bucaq kəndlərində 180 şagird yerlik məktəb binalarının tikintisi davam etdirilir, Yevlax şəhərindəki 3 nömrəli tam orta məktəbi üçün 1176 şagird yerlik bina və Kür çayı üzərindəki dəmir yol körpüsü əsaslı təmir olunur.
Məruzə və çıxışlarda əhalinin həyat şəraitinin yaxşılaşdırılması, elektrik enerjisi, təbii qaz və su ilə təminatı, təhsilin, mədəniyyətin inkişafı sahəsində görülən işlər ətraflı təhlil edilmiş, uğurlarla yanaşı, problemlər də sadalanmış, onların həlli məqsədilə təkliflər irəli sürülmüşdür.
Hesabat yığıncağında Azərbaycan Respublikası Prezidenti Administrasiyasının məsul işçisi Əlibaba Əliyev və Milli Məclisin deputatı İlham Məmmədov çıxış edərək 2013-cü ildə respublikamızın, o cümlədən Yevlax rayonunun sosial-iqtisadi inkişafı istiqamətində qazanılan uğurlardan danışmış, qarşıda duran vəzifələri qeyd etmiş, tövsiyələrini bildirmişlər.
Yığıncaq iştirakçıları adından Azərbaycan Respublikasının Prezidenti İlham Əliyevə müraciət qəbul edilmişdir.