Bakı, 24 iyul (AZƏRTAC). Paralimpiyaçılarımız bu ilin altı ayında idmanın müxtəlif növləri üzrə 12 beynəlxalq yarışda iştirak edərək 7 medal qazanıblar.

Azərbaycan Milli Paralimpiya Komitəsindən (AMPK) AZƏRTAC-a bildiriblər ki, bunu AMPK-nın vitse-prezidenti Şaiq Həmidov cari ilin altı ayında görülən işlərə dair keçirilən mətbuat konfransında deyib.

Ş.Həmidov komitənin yarandığı 1996-cı ildən beş Paralimpiya Oyunlarında iştirak etdiyini və dinamik inkişafda olduğunu bildirib. O, qeyd edib ki, Paralimpiya Komitəsinin ötən il fevralın 8-də keçirilmiş konqresində AMPK-nın 2013-2016-cı illər üçün strateji fəaliyyət planı təsdiq edilib. Planda 2016-cı ildə Rio-de-Janeyroda keçiriləcək XV Yay Paralimpiya Oyunlarına hazırlıq tədbirlərinin görülməsi əksini tapıb. Planda cari ilin birinci yarısı üzrə nəzərdə tutulan bütün məsələlər həllini tapıb. Belə ki, respublikamızda paralimpiya hərəkatının genişləndirilməsi məqsədilə bir sıra tədbirlər keçirilib. Məhz bunun nəticəsində paralimpiya növləri 7-dən 12-yə çatdırılıb, gənclər arasında bu sahəyə maraq xeyli artıb. Artıq yeni yaranan adaptiv avarçəkmə, əlil arabasında qılıncoynatma, stolüstü tennis, kanoe, bossiya idman növləri üzrə formalaşdırılan komandalar bir sıra beynəlxalq yarışda iştirak edib. İdmançılarımız komanda yarışlarında ilk üç yerlərə sahib olublar.

2016-cı il Rio-de-Janeyro Olimpiadasına lisenziya qazanmaq üçün idmançılarımızın ciddi hazırlaşdıqlarını bildirən Ş.Həmidov Azərbaycanın sentyabrda cüdo üzrə milli komandaların Amerikada keçiriləcək dünya çempionatında 15 nəfərdən ibarət idmançı ilə bütün çəki dərəcələrində təmsil olunacağını bildirib. “Bakı-2015” ilk Avropa Oyunlarında paralimpiya idman növlərində cüdo üzrə iki çəki dərəcəsində hər ölkədən bir qadın və bir kişi idmançının iştirakı nəzərdə tutulub.

Qeyd edilib ki, AMPK fiziki məhdudiyyətli insanlar arasında idmanın kütləviliyinin artırılması məqsədilə qeyri-paralimpiya idman növlərinin yaradılmasına da xüsusi diqqət yetirir. Artıq əlil arabasında idman rəqsi, boulinq idman növləri yaradılıb. Bu il qarşıya qoyulmuş əsas məqsədlərdən biri də milli komandaların maddi-texniki bazasının gücləndirilməsi və müasir tələblər səviyyəsinə çatdırılmasıdır. İdmanın inkişafına diqqət və qayğı göstərən Prezident İlham Əliyev paralimpiya idmanının maddi-texniki bazasının gücləndirilməsi və təkmilləşdirilməsi məqsədilə Prezidentin ehtiyat fondundan AMPK-yə vəsait ayırıb. Artıq idmançıların fiziki hazırlıqlarının səmərəli təşkili və yarışlarda uğurlu çıxışları üçün zəruri avadanlıq və ləvazimat alınıb.

AMPK-nın şöbə müdiri, Uşaq Paralimpiya Komitəsinin idarə heyəti sədrinin müavini-icraçı direktor Kamal Məmmədov isə 2013-cü ilin avqustunda dünyada ilk dəfə olaraq Milli Paralimpiya Komitəsinin nəzdində Uşaq Paralimpiya Komitəsinin (UPK) yaradıldığını vurğulayıb. UPK-nın əsas məqsədi sağlamlıq imkanları məhdud uşaqları uyğun idman növlərinə cəlb etməklə ehtiyat idmançılar hazırlamaqdır.

UPK-nın hüquqi bazasının yaradılması, beynəlxalq standartların hazırlanması, sağlamlıq imkanları məhdud uşaqların tibbi təsnifatı sisteminin qurulması sahəsində UNİCEF-in Azərbaycan nümayəndəliyi ilə əməkdaşlıq çərçivəsində təlimlər təşkil olunub. Bu təlimlərin davamı olaraq bu ilin sentyabrında UNICEF-in dəstəyi ilə on nəfərdən ibarət UPK-nın nümayəndə heyətinin Londona təlim səfəri gözlənilir.

K.Məmmədov uşaq paralimpiya növlərinə cüdo, stolüstü tennis, bossiya, pauerliftinq və üzgüçülüyün daxil olduğunu bildirib. Ümumilikdə sağlamlıq imkanları məhdud 30-a yaxın uşaq peşəkar idmana cəlb olunub. Stolüstü tennislə məşğul olan 12 yaşlı Fəxri Soltanov cari ilin martında ilk beynəlxalq yarışda ölkəmizi təmsil edib. O, olimpiyaçılar arasında stolüstü tennis üzrə keçirilən Azərbaycan çempionatında qızıl medalın sahib olub. Ötən il Nabranda istirahət mərkəzlərinin birində ayaqlarından zədə alan dörd yaşlı İmran Cəfərov UPK tərəfindən idmanın üzgüçülük növünə cəlb olunub və yaxın günlərdə ilk məşqinə başlayacaq.