İQTİSADİYYAT
“Paşa Bank” ötən ilin maliyyə hesabatını açıqlamışdır
Bakı, 8 mart (AZƏRTAC). “Paşa Bank” 2010-cu ilin maliyyə hesabatını açıqlamışdır.
Bankın baş maliyyə inzibatçısı Şahin Məmmədov AZƏRTAC-a bildirmişdir ki, ötən il bankın aktivləri artaraq 512,304 min manata (642,065 min ABŞ dolları) çatmışdır. Bu da keçən ilin müvafiq göstəricisindən 67 faiz çoxdur. Həmin məbləğin 37 faizi müştərilərə verilmiş kreditlərdən, 31 faizi qiymətli kağızlar portfelindən, 26 faizi nağd vəsaitlərdən və nağda bərabər tutulmuş vəsaitlərdən, 5 faizi banklararası kreditlərdən, və s. aktivlərdən ibarətdir. Ümumi kredit portfeli 2009-cu ilə nisbətən 1,6 dəfə artaraq 196,081 min manat, portfel üzrə effektiv ehtiyat dərəcəsi 4,2 faiz təşkil etmişdir.
Bankın ümumi portfelindəki qeyri-işlək kreditlərin payı 0,6 faizdir. Keçən il bu göstərici 0,3 faiz olmuşdur. Bankın əməliyyat gəlirləri 30,334 min manata çatmışdır, bu da 2009-cu illə müqayisədə 34 faiz çoxdur. Ötən il əldə olunmuş xalis mənfəət 2009-cu illə müqayisədə 14 faiz azalmışdır. Buna, bazarda kreditləşmə üzrə orta faiz dərəcələrinin azalması, “Paşa Bank”da banklararası və müştərilərin maliyyələşdirilməsi üzrə ehtiyat fondunun qiymətləndirilməsi metodologiyasındakı dəyişikliklər səbəb olmuşdur.
Hesabat dövründə bankın faiz gəliri 33,842 min manata, qeyri-faiz gəlirləri 2 dəfə artaraq 5,258 min manata, işçilərlə əlaqədar olan xərclər 1,7 dəfə artaraq 5,680 min manata çatmışdır. Postmaliyyələşdirmə də daxil olmaqla sənədli əməliyyatların həcmi 37,116 min manat təşkil etmişdir.
Səhmdar kapitalı üzrə gəlirlilik əmsalı (ROE) 18,2 faiz (2009 - 16,9 faiz), aktivlər üzrə gəlirlilik əmsalı (ROA) 4,1 faiz (2009 - 5,5 faiz), likvidlik əmsalı 171faiz (2009 - 77 faiz), kapitalın adekvatlığı əmsalı 62 faiz (2009 - 77 faiz) olmuşdur.
Bank həm mənfəətinə həm də aktivlərin həcminə görə bazarda beşinci yeri tutur.