Tbilisi, 6 mart, AZƏRTAC

Bu gün Tbilisidə Azərbaycan, Gürcüstan və Türkiyə parlamentlərinin növbəti 8-ci üçtərəfli görüşü təşkil olundu. Ötən ilə Azərbaycanın Mədəniyyət paytaxtı Şuşada keçirilən 7-ci iclasındakı məsələlər bizim əsas fəaliyyət istiqamətlərimizdir.

Bu sözləri AZƏRTAC-a müsahibəsində Milli Məclisin beynəlxalq münasibətlər və parlamentlərarası əlaqələr komitəsinin sədri Səməd Seyidov söyləyib.

Onun sözlərinə görə, üçtərəfli komitənin işğaldan azad olunmuş Şuşa şəhərində keçirilmiş 7-ci iclas tarixi bir görüş olub. Türkiyə və Gürcüstanın müvafiq komitələrinin üzvləri torpaqlarımızın işğaldan azad olunmasının canlı şahidi oldular. Bu, heç vaxt yaddan çıxmayacaq. Elə Şuşada biz qərara gəlmişdik ki, növbəti iclas Tbilisidə keçirilsin. Bu gün biz, əsasən, bu üç ölkə arasında əlaqələrin daha da genişləndirilməsi məsələlərini müzakirə etdik. Bu, bizim əsas məqsədimizdir. Məlumdur ki, Azərbaycan ilə Türkiyə arasındakı əlaqələr ən yüksək səviyyədədir. Azərbaycan-Türkiyə münasibətləri başqa ölkələr üçün bir nümunədir. Eyni zamanda, Azərbaycan-Gürcüstan arasında münasibətlər yüksək səviyyədədir. Lakin, bildiyiniz kimi, həyat davam edir, dünyada yeni çağırışlar yaranıb. Bu da münasibətlərimizin daha da genişləndirilməsi və möhkəmləndirilməsi zərurətini yaradıb. Bundan başqa regionda sülhə və sabitliyə nail olmalıyıq. Bu məqsədlərə çatmaq üçün bizə ən yaxşı yolu Prezident İlham Əliyev göstərib.

Komitə sədri deyib: “Prezident İlham Əliyevin keçən ilin oktyabrında Gürcüstana səfəri zamanı səsləndirdiyi bütün fikirlər, bəyanatlar bizim üçün çox mühüm əhəmiyyət kəsb edir. Dövlətimizin başçısının söylədiyi bütün fikirlər faktiki olaraq bizim yol xəritəmizdir. Biz və həmkarlarımız bunu yaxşı başa düşürük və bu istiqamətdə də işləyirik”.

Onun sözlərinə görə, üçtərəfli görüşdə müzakirə olunan məsələlər Azərbaycan, Gürcüstan və Türkiyənin milli mənafelərinə və ortaq məqsədlərə xidmət edən məsələlərdir.

“Bilirsiniz ki, regionda davamlı sülhün, sabitliyin, iqtisadi inkişafın və bu istiqamətdə olan bütün məsələlərin həlli istiqamətində Azərbaycan çox böyük işlər görür. Bu işlər içərisində isə əsas məqamlarından biri və ən vacibi ölkələr arasında isti münasibətlərin qurulmasıdır. Bizə qonşu olan və faktiki olaraq sabitliyə və sülhə təhdid olan Ermənistan da bunu başa düşməlidir. Ermənistan nə qədər tez bu məsələni başa düşsə bu onun özü və region üçün çox faydalı olar. Biz bu istiqamətdə də müzakirələrimizi davam etdirəcəyik”, – deyə S.Seyidov vurğulayıb.

Xətayi Əzizov

AZƏRTAC-ın xüsusi müxbiri

Tbilisi