Bakı, 11 iyun, AZƏRTAC

Prezident, Müzəffər Ali Baş Komandan İlham Əliyevin rəhbərliyi ilə rəşadətli Ordumuz 30 ilə yaxın müddətdə erməni tapdağında qalan torpaqlarımızı 44 gün ərzində azad etdi. Bu tarixi Qələbə hər bir soydaşımızda əvəzsiz qürur hissi yaratdı. Uzun illər məcburi köçkün adı altında yaşamış həmvətənlərimiz artıq bu ağır yükdən xilas oldular. Erməni faşistləri 30 il müddətində işğal altında saxladıqları ərazilərdə daş üstə daş qoymayıblar. Artıq həmin ərazilər düşməndən azad edilib. İndi bu ərazilərdə tikinti-bərpa işlərinə start verilib.

AZƏRTAC xəbər verir ki, bu fikirləri YAP Səbail rayon təşkilatı sədrinin müavini, politoloq Mehman İsmayılov bildirib.

Mehman İsmayılov qeyd edib ki, Prezident İlham Əliyev Vətən müharibəsindən sonra müxtəlif tədbirlərdə, o cümlədən işğaldan azad edilmiş ərazilərdə yerli ictimaiyyətin nümayəndələri ilə görüşlərində dəfələrlə bəyan edib ki, Qarabağı cənnətə çevirəcəyik. İşğaldan azad olunmuş ərazilərdə görüləcək bütün işlərdə dost ölkələrin şirkətləri də çalışacaq. Artıq bir sıra ölkələrin tikinti təşkilatları Qarabağda şəhərsalmanın planlaşdırılması, zəngin tarixi-memarlıq irsimizin bərpası və yenidənqurma işlərində iştirak etməyə dəvət olunublar.

“Dövlətimizin başçısının işğaldan azad edilmiş bölgələrə səfərləri zamanı onunla birgə addımlayan Birinci vitse-prezident Mehriban xanım Əliyeva da erməni faşistlərinin dağıtdıqları, viran etdikləri yurd yerlərimizin, şəhərlərimizin, kəndlərimizin görüntülərini paylaşır. Artıq bütün dünya erməni qəddarlığının şahididir. Bu mənada, hazırda dövlətimizin qarşısında mühüm bir vəzifə dayanır – dağıdılmış şəhər və kəndləri bərpa etmək, yurd-yuvasından didərgin salınmış vətəndaşlarımızı doğma torpaqlarına qaytarmaq, viran qalmış ərazilərə həyat vermək, dirçəltmək. Biz tezliklə buna da nail olacağıq”, - deyə politoloq vurğulayıb.

YAP Səbail rayon təşkilatı sədrinin müavini qeyd edib ki, dövlətimizin başçısı Respublika Günündə Ağdam rayonuna səfəri zamanı burada aparılacaq tikinti- bərpa işlərinin baş planını təsdiq etdi və bildirdi ki, digər rayonlarda da bütün işlər plana uyğun aparılacaq. Dağıdılmış, viran qoyulmuş ərazilərdə dövlətin qarşıya qoyduğu bütün layihələr, planlar, tikinti və quruculuq işləri sürətlə davam edir.

Mehman İsmayılov deyib: “Mən xidməti vəzifəmlə əlaqədar həmin ərazilərdə dəfələrlə olmuşam. Ağdamda İşğal və Zəfər muzeylərinin, yaşayış binasının, 125 hektarlıq süni göl yaradılmasının planlaşdırılması, kanalların, körpülərin, rayonlararası yolların tikintisi, dəmir yollarının bərpası və yenidən qurulması, bir neçə rayonda aeroportun tikintisi düşmənə ciddi xəbərdarlıqdır. Bütün bunlar Azərbaycanın nə qədər güclü və qüdrətli olmasından xəbər verir.

Prezident İlham Əliyev tərəfindən bütün Qarabağ “yaşıl enerji” zonası elan edilib. Yaşayış məntəqələri “ağıllı şəhər”, “ağıllı kənd” konsepsiyaları əsasında bərpa olunur. Ermənistan işğal altında saxladığı ərazilərimizdə çox sayda minalar yerləşdirib və həmin minalanmış ərazilərin xəritəsini vermək istəmir, lakin buna baxmayaraq, hazırda minaların təmizlənməsi proses davam edir, ardınca da bərpa işlərinə start verilir. Ərazilər minalardan təmizləndikcə, infrastrukturun tam formalaşdırılması həyata keçiriləcək.

Hazırda dünyanın nəzəri Qarabağdadır. Ərazi bütövlüyünü bərpa etmiş Azərbaycanın dağıdılmış şəhər və kəndləri necə bərpa edəcəyi, şübhəsiz, dünya dövlətlərinin, bizə dost və qeyri-dost ölkələrin də marağındadır. Biz Qarabağdayıq və bərpa işlərinə başlamışıq. Tezliklə dünya ictimaiyyəti Qarabağa böyük qayıdışın şahidi olacaq”.