Milli Təhlükəsizlik Nazirlyindən və Baş Prokurorluqdan AZƏRTAC-a daxil olmuş məlumatda bildirilir ki, 1998-2008-ci illərdə Bakı şəhərində fəaliyyət göstərən ayrı-ayrı valyutadəyişmə məntəqələrinə, habelə orada işləyən şəxslərə qarşı odlu silahla hədə-qorxu gəlməklə külli miqdarda əmlak əldə etmək məqsədilə çoxlu sayda quldurluq cinayəti törədilmişdir. Bu ağır və xüsusilə ağır cinayət hadisələri cəmiyyətdə geniş rezonans doğurmuş, onları törətmiş şəxslərin müəyyən edilərək ifşa olunmaması ölkədə mövcud kriminogen vəziyyətə mənfi təsir göstərməklə gələcəkdə də bu cür cinayətlərin törədilməsinə şərait yaratmışdır. Həmin cinayət faktları üzrə Azərbaycan Respublikasının Cinayət Məcəlləsinin 181.2.1, 181.2.3, 181.2.4, 181.2.5 və 181.3.2-ci (quldurluq) maddələri ilə cinayət işləri başlanılmış, lakin görülmüş istintaq-əməliyyat təbirlərinə baxmayaraq, onların üstünün açılmasını təmin etmək mümkün olmamışdır. Həmin cinayət hadisələrinin açılmasının təmin edilməsi məqsədilə Respublika Baş Prokurorluğu tərəfindən Milli Təhlükəsizlik Nazirliyinə 2008-ci il avqustun 26-da müvafiq əməliyyat tapşırıqları verilmişdir.

Bu növ cinayətlər barədə daxil olan məlumatların təhlilinin nəticələri nəzərə alınaraq, Milli Təhlükəsizlik Nazirliyi tərəfindən Azərbaycanın iqtisadi sahədə maraqlarının və təhlükəsizliyinin təmin olunması məqsədilə xüsusi əməliyyat-axtarış tədbirləri planı hazırlanaraq həyata keçirilmişdir.

Müəyyən edilmişdir ki, uzun müddət cəzasızlıq şəraitində Bakı şəhərinin müxtəlif rayonlarının ərazisində törədilmiş 20-dən artıq həmin quldurluq cinayət hadisələri nəticəsində zərər çəkmiş şəxslərin əksəriyyəti “Binə” ticarət mərkəzində və bir sıra banklarda işləmişlər. Eyni zamanda, bu cinayətlərin həyata keçirilməsinin üsul və vasitələrinin, eləcə də hazırlıq proseslərinin təhlili həmin hüquqazidd əməllərin əməliyyat-axtarış fəaliyyətini yaxşı bilən və hüquq mühafizə orqanlarının iş prinsip və metodlarına yaxından bələd olan şəxs, yaxud şəxslər tərəfindən törədildiyini də ehtimal etməyə əsas vermişdir.

2008-ci il sentyabrın 30-da Milli Təhlükəsizlik Nazirliyi tərəfindən həyata keçirilən kompleks əməliyyat-axtarış tədbirləri ilə Bakı şəhər sakinləri - 1962-ci il təvəllüdlü, DİN Yasamal Rayon Polis İdarəsində, Banditizmə və Terrorizmə Qarşı Mübarizə İdarəsində, Nərimanov Rayon Polis İdarəsinin 18-ci polis bölməsinin rəisi və Yasamal Rayon Polis İdarəsinin cinayət axtarış şöbəsinin rəis müavini vəzifəsində işləmiş, 1997-ci ildə öz xahişi ilə işdən azad olunmuş Mehdi Əmirəliyev, 1964-cü il təvəllüdlü, DİN Şuşa Şəhər Şöbəsində və Mütəşəkkil Cinayətkarlığa Qarşı Mübarizə Baş İdarəsində əməliyyat müvəkkili vəzifəsində xidmət etmiş, 1994-cü ildə polis orqanlarından xaric olunmuş İrac Nəsrullayev və 1971-ci il təvəllüdlü Ceyhun Qarayev şübhəli şəxs qismində saxlanılmış, onların üzərindən 1 ədəd «TT» markalı tapança aşkar olunaraq götürülmüşdür. Mehdi Əmirəliyev, İrac Nəsrullayev və Ceyhun Qarayev istintaqa verdikləri ifadələrində 1998-ci ildən etibarən Bakı şəhərinin müxtəlif ərazilərində, əsasən, “Binə” ticarət mərkəzindəki valyutadəyişmə məntəqələrində işləyən ayrı-ayrı şəxslərə qarşı 20-dən artıq silahlı basqın törətdiklərini və onların külli miqdarda pullarını mənimsədiklərini etiraf etmişlər. Eyni zamanda, İrac Nəsrullayev və Mehdi Əmirəliyev törətdikləri hadisələrin təfərrüatları barədə verdikləri ifadələrində hüquq mühafizə orqanlarında işləyərkən topladıqları təcrübə əsasında özlərinin qanunsuz olaraq müəyyənetmə və məxfi müşahidə tədbirləri keçirdiklərini də bildirmişlər.

İş üzrə bütün halların araşdırılması, cinayətin digər iştirakçılarının ifşası üçün zəruri istintaq hərəkətləri və əməliyyat-axtarış tədbirləri davam etdirilir.