REGİONLAR
Şəhid anası: Qoy həmişə yaxşı işləsinlər, xalqa xidmət etsinlər
Lənkəran, 23 dekabr, Bağır Əliyev, AZƏRTAC
Lənkəranda dörd dairə seçki komissiyası fəaliyyət göstərir. 73 saylı Lənkəran şəhər, 74 saylı Lənkəran kənd, 75 saylı Lənkəran-Masallı və 76 saylı Lənkəran-Astara seçki dairələri üzrə ümumilikdə, 116 seçki məntəqəsi yaradılıb. Rayon üzrə seçicilərin sayı 116 min 846 nəfərdir.
AZƏRTAC-ın bölgə müxbiri seçkilərin gedişi ilə yerindəcə tanış olmaq üçün 73 saylı Lənkəran şəhər seçki dairəsinin 10 saylı orta məktəbdə yerləşən 7 saylı məntəqəsinə baş çəkib.
Məntəqəyə seçici axını müşahidə olunurdu. Onların arasında seçkilərdə ilk dəfə iştirak edən və 18 yaşı yeni tamam olan Aytən Ağazadə də vardı: “Bu gün həyatımda ilk dəfədir ki, seçkilərdə iştirak edirəm. Yəqin ki, bu unudulmaz anı ömrüm boyu unutmaram. Səsvermədə iştirak etməklə həyatımın yeni mərhələsinə qədəm qoyuram. Həyəcanlı olsam da, özümü xoşbəxt hesab edirəm. Ölkə vətəndaşı kimi öz seçici hüququmdan sərbəst şəkildə istifadə etməyimdəm qürur hissi keçirirəm”.
Həmin dairənin 29 saylı məntəqəsinin qarşısında seçici Məmmədxan Kərimovdan seçkinin gedişi barədə fikirlərini öyrəndik. O qeyd etdi ki, hər kəs növbə ilə bülletenini alıb kabinəyə keçir və seçdiyi namizədə tam azad şəkildə səs verir: “Heç bir komissiya üzvü və ya müşahidəçi seçicilərin seçiminə müdaxilə etmir. Mən çox razı qaldım və layiq bildiyim namizədə səs verdim”.
75 saylı Lənkəran-Masallı seçki dairəsi rayonun Liman şəhərində yerləşir. Dairə Seçki Komissiyasının sədri Cəmil Hüseynovun verdiyi məlumata əsasən, bu dairədə Lənkəran rayonu üzrə 29, Masallı rayonu üzrə isə 12 seçki məntəqəsi təşkil edilib. Seçici siyahıları dəqiqləşdirilib və Lənkəran rayonu üzrə 28611 seçicinin adı siyahıya daxil olunub. Dairənin əhatə etdiyi bütün məntəqələr zəruri texniki avadanlıqlarla, elektrik enerjisi, rabitə və yanğın təhlükəsizliyi ilə təchiz edilib. Seçici siyahıları hamının tanış ola biləcəyi yerdən asılıb.
Dairə üzrə bir seçicinin 100-dən yuxarı yaşı var. Bu, rayonun Boladi kəndində yaşayan 1905-ci il təvəllüdlü Şabikə Fərhad qızı Axundovadır. Sağlamlığında problem olduğundan 114 yaşlı Şabikə nənə 13 saylı seçki məntəqəsinə gələ bilməyib, ərizə ilə müraciət edərək daşınan qutu vasitəsilə evində səs verib.
75 saylı Lənkəran-Masallı Seçki Dairəsinin 23 saylı Şağlaser kənd seçki məntəqəsində apardığımız müşahidələrdən məlum oldu ki, burada seçicilərin sərbəst səsvermələri və komissiya üzvlərinin normal fəaliyyətləri üçün bütün imkanlar yaradılıb. Səsverməyə gələnlərin xoş ovqatı, yüksək əhval-ruhiyyəsi aydın hiss olunurdu.
Kənd sakini, Qarabağ döyüşlərində şəhid olmuş İqbal Həsənovun anası Əsmayə Həsənova deyib: “Mən günümü görüb, dövranımı sürmüşəm. Sevinirəm ki, xalqımız dinc şəraitdə, firavan yaşayır. Çoxlu oğul-uşağım, nəvə-nəticəm var. Hər biri də həyatda öz yerini tutub. Sağ olsun dövlətimiz, yaxşı şərait yaradıb. Adam naşükür olmaz. Evimizə qaz gəlir, fasiləsiz işığımız var. Bu yaxınlarda şəhid ailəsi kimi mənə də şəhid övladıma görə 11 min manat birdəfəlik müavinət və hər cür şəraiti olan mənzil verildi. Buna görə Prezidentimizə təşəkkürümü bildirirəm. Biz ondan çox razıyıq. Allah onu qorusun. O ki qaldı bələdiyyə seçkisinə, yaxşı tanıdığım, etimad göstərdiyim namizədə səs verdim. Qoy həmişə yaxşı işləsinlər, xalqa xidmət etsinlər. Biz də onlardan razı qalaq”.
76 saylı Lənkəran-Astara Dairə Seçki Komissiyasının sədri Məzahir Əliyevin məlumatına görə, dairədə Lənkəran rayonu üzrə 20 seçki məntəqəsində 17371 nəfər seçici səs verməlidir. Bütün məntəqələr zəruri texniki avadanlıqlarla təchiz olunub. Məntəqələrdə seçici siyahıları asılıb, istənilən seçici öz adını və soyadını həmin siyahıda dəqiqləşdirə bilir.
Dairənin 4 saylı Siyavər kənd seçki məntəqəsində olarkən seçicilərin normal şəkildə səsverməsi üçün yaradılan şərait diqqətimizi cəlb etdi. Məntəqədə səsvermə kabinələri qurulub, həkim, ana və uşaq otaqları ayrılıb, dəqiqləşdirilmiş seçici siyahıları lövhədən asılıb.
Məntəqədə rastlaşdığımız seçici, Əfqanıstan Müharibəsi Veteranları İctimai Birliyinin sədri Fəxrəddin Hüseynov bildirdi ki, indiyədək bütün seçkilərdə iştirak edib. Həmsöhbətimiz hər dəfə seçki təcrübəsinin təkmilləşdiyinin şahidi olduğunu, budəfəki bələdiyyə seçkilərinə hazırlıq işlərinin daha yüksək səviyyədə aparıldığını, görülmüş işlərin seçicilər tərəfindən rəğbətlə qarşılandığını və seçkilərin azad, şəffaf və demokratik şəkildə keçirildiyini əminlik hissi ilə söylədi.
Lənkəran rayonunun seçki dairələrində və ayrı-ayrı məntəqələrdə prosesə nəzarət edən müşahidəçilər də fəallıq göstərirdilər. Səsvermənin gedişini operativ və təlimata uyğun izləmək üçün hər cür şərait yaradılıb. Rayon üzrə seçkinin gedişini dairə seçki komissiyalarında 40, məntəqələrdə isə 1233 nəfər müşahidəçi izləyir. Onlar ayrı-ayrı siyasi partiyaları, qeyri-hökumət təşkilatlarını təmsil edirlər.
74 saylı Lənkəran kənd seçki dairəsinin Gərmətük qəsəbə orta məktəbində yerləşən 2 saylı məntəqəsində bitərəf müşahidəçi Zahid Hüseynov səsvermənin yüksək səviyyədə təşkil edildiyini, heç bir şikayət və iradın olmadığını bildirdi.