Bakı, 22 dekabr, AZƏRTAC

Müzəffər Ali Baş Komandan, qalib sərkərdə, xilaskar Prezident İlham Əliyevin rəhbərlik etdiyi Azərbaycan Ordusunun rəşadəti, qəhrəmanlığı ilə 32 illik qanlı münaqişəyə son qoyuldu. 44 günlük tarixi, möhtəşəm Vətən müharibəsi ilə işğalçı, faşist, terror dövləti olan Ermənistan dizə gətirildi, təslim edildi, məğlubiyyətini elə öz dilindən etiraf etdi. Yağı düşmən üzərində 32 il səbirlə, təmkinlə, dözümlə gözlədiyimiz tarixi Zəfər çalındı, üçrəngli bayrağımız 28 ildən sonra yenidən Qarabağımızın hər bir guşəsində, Şuşada, Ağdamda, Kəlbəcərdə, Laçında, Hadrutda, Suqovuşanda, Füzulidə, Cəbrayılda, Zəngilanda, Qubadlıda, yaralı Xocalımızın kəndlərində dalğalandırıldı. Ərazi bütövlüyümüz, suverenliyimiz bərpa olundu. 10 dekabr tarixində bütün dünyanın maraqla gözlədiyi, bütün gözlərin zilləndiyi tarixi, möhtəşəm Zəfər paradı keçirildi. Qardaş və dost Türkiyənin Prezidenti Rəcəb Tayyib Ərdoğanın iştirakı, Azərbaycan və Türkiyə liderlərinin tarixi çıxışları ilə dünyaya bir daha birlik və bərabərliyimizin, dost və qardaşlığımızın sarsılmazlığının növbəti mesajları verildi.

Bu fikirləri AZƏRTAC-a Milli Məclisin ailə, qadın və uşaq məsələləri komitəsinin sədr müavini, professor Jalə Əliyeva bildirib.

J.Əliyeva deyib: “Bəli, tarixi Qələbəyə qədər böyük yol, məsafə qət edildi. Bu Qələbəni əldə etmək üçün çox böyük, tarixi addımlar atıldı. İkinci dəfə müstəqilliyimizi itirmək, parçalanmaq, məhv olmaq təhlükəsi aradan qaldırıldı, Azərbaycan inkişaf, tərəqqi, sabitlik yoluna qədəm qoydu. Bunlar da heç şübhəsiz ki, 1993-cü ilin gərgin və ağır iyun günlərində ikinci dəfə hakimiyyətə qayıdan, müasir müstəqil Azərbaycanın qurucusu və memarı, dahi şəxsiyyət Heydər Əliyevin tarixi xilaskarlıq missiyası nəticəsində mümkün oldu. Ümummilli Liderin hakimiyyətə qayıdışından sonra torpaqlarımızın, dəyəri heç nə ilə ölçülə bilməyəcək mənəvi, maddi sərvətlərimizin, milli, tarixi, dini abidələrimizin, məscidlərimizin, ziyarət yerlərimizin, qəbiristanlıqlarımızın, açıq və qapalı muzeylərimizin, mənəvi zənginliklərimizin murdar düşmən tapdağından qurtulması üçün bütün cəbhələrdə, bütün səngərlərdə ardıcıl, sistemli mübarizə başlanıldı. Elə bir tədbir, elə bir yüksək səviyyəli forum olmadı ki, torpaqlarımızın işğalı, mənəvi, maddi sərvətlərimizin barbarizm və vandalizmə məruz qalması, onların azad olunması məsələsi dilə gətirilməsin. İstər Ulu Öndərin 10 illik ikinci hakimiyyəti dönəmində, istər onun layiqli davamçısı Prezident İlham Əliyevin 17 illik hakimiyyəti dövründə, istərsə də dövlət başçısının ən yaxın və ən sədaqətli silahdaşı Birinci vitse-prezident Mehriban Əliyevanın ötən illər ərzindəki tükənməz, bənzərsiz ictimai-siyasi fəaliyyəti müddətində bu məsələlər, xüsusilə, milli, tarixi, dini abidələrimizin, sərvətlərimizin vəhşiliklərə məruz qalması, ermənilər tərəfindən mənəvi soyqırımının həyata keçirilməsi hər zaman, hər bir kürsüdə, hər bir tribunada açıq və gur səslə bəyan olundu. Nəticə etibarilə, Ermənistanın həm hərbi işğalı, həm də mənəvi təcavüzü pislənildi.

İşğal uzandıqca mənəvi sərvətlərimizin, mənəvi resurslarımızın məhv edilməsi bütün Azərbaycan xalqını incitdi, sızlatdı. Xüsusilə də Qarabağmızın gözü, dilbər guşəsi olan Şuşadakı abidələrimizin, Gövhərağa məscidinin, Ağdam məscidinin, o cümlədən digər yurd yerlərimizdəki məscidlərimizin, qədim Alban kilsələrinin, Azıx mağarasının, başqa bənzərsiz, təkrarsız sərvətlərimizin dağıdılması, murdarlanması, yerlə-yeksan edilməsi hər birimizin ürək ağrısına naləsinə çevrildi. Bəs vətənindən didərgin salınan, təhqirlərə məruz qalan heykəllərimiz? Üzeyir bəy Hacıbəylinin, Xan qızı Natəvanın, Bülbülün heykəlləri güllələndi, məhv edildi. Düşmən bilə-bilə, qəsdən bunları edərək həm öz yırtıcı, ənənəvi insanlıqdan uzaq mahiyyətini ortaya qoyur, həm də bizim milli-mənəvi hisslərimizlə oynayırdı. Çünki işğalın daha amansız xarakter aldığı 1992-93-cü illərdən ötən illər, zaman ərzində işğal altında olan yurd yerlərimizin elə bir guşəsi, elə bir milli, mənəvi, dini, tarixi sərvəti, abidəsi olmadı ki, təcavüzdən ciddi zərər çəkməsin…Dağıdılan dağıdıldı, məhv edilən məhv edildi, qalanlar isə elə bir hala salındı ki, ələgəlməz oldu…

Ancaq 32 illik səbrin, dözümün də bir həddi olmalı idi və oldu da…Səbir kasası da daşmalı idi və daşdı…Sentyabrın 27-də Ermənistanın növbəti qanlı təcavüzündən, açıq təxribatından sonra Ali Baş Komandanın əmri ilə Silahlı Qüvvələrimizə döyüş, “vur” əmri verildi, İkinci Vətən müharibəsi başlandı və cəmi 44 gündə də 32 illik münaqişəyə son qoyuldu. İndi işğal altındakı torpaqlarımız, onun üstü də, altı da, o cümlədən təbii sərvətlərimiz də öz sahibindədir, bizdədir, Azərbaycandadır. Ölkə Prezidentinin və birinci xanımın Cəbrayıla, Xudafərinə, Füzuliyə, Ağdama tarixi səfərləri zamanı da bir daha dünyaya erməni faşizmi, erməni barbarizmi, erməni vəhşiliyi əyani şəkildə nümayiş etdirildi. Dünya bir daha erməni vandalizminə, erməni barbarizminə şahidlik etdi. Şahidlik etdi ki, işğal olunmuş və işğaldan azad edilmiş Azərbaycan ərazilərində daş üstə daş qalmayıb, hər yer dağıdılıb, məhv edilib, vəhşiliklərə, murdarlıqlara məruz qalıb, xüsusilə bərpası bəlkə də on illər çəkəcək milli, mənəvi, tarixi, dini sərvətlərimiz, abidələrimiz yox edilib…Ağdam məscidi bunun acı və əyani sübutudur.

Prezident və Birinci xanım 27 ildən sonra erməni vandalizmini hələ də canında, ruhunda hiss edən, yaşadan Ağdam məscidini ziyarət etdikdən sonra Ali Baş Komandan kameralar önünə keçdi, Ağdam məscidinin önündə tarixi nitq söylədi, bir daha dünyaya səsləndi, çağırış etdi, erməni vandalizminə diqqət çəkdi: “Bu gün burada, vandallar tərəfindən dağılmış məscidin önündə deyirəm ki, xoşbəxt adamam. Bir daha Allaha şükür edirəm ki, mənim dualarımı eşidib, bu gücü mənə verib. Biz gücümüzü səfərbər edərək bax, bu tarixi günləri yaşayırıq. Bu, həqiqətən də tarixi günlərdir. Bəlkə də çoxəsrlik Azərbaycan tarixində buna bənzər şərəfli və qürurlu günlər olmayıb. Biz bunu birliyimiz sayəsində qazanmışıq, gücümüz sayəsində qazanmışıq. Heç kim bizə kömək etməyib. Əksinə, ancaq maneçilik törədib. Gün gələcək bu barədə də ətraflı danışacağam”.

“Biz bu Qələbəni birlik, əzm, iradə və güc hesabına əldə etdik. Bu gün, müharibə başa çatandan sonra artıq Qərb dairələrindən bəzi Qərb liderləri məsələ qaldırırlar ki, bəs, Azərbaycanın nəzarətinə keçən azad edilmiş torpaqlarda xristian məbədləri necə olacaq? Həm mənimlə söhbət zamanı, həm rəsmi bəyanatlarda narahatlıq ifadə edirlər. Heç kim narahat olmasın, xüsusilə Qərb dövlətlərinin liderləri, hansılar ki, islamofob hissləri alovlandırırlar”, - deyən Ali Baş Komandan bildirdi ki, kimlər İslam müqəddəslərinin təhqirlərinə göz yumurlar və hətta onları təhqir edənlərə bəraət qazandırırlar, onların bu barədə danışmağa haqqı yoxdur. İkincisi, bizim ərazimizdə olan bütün məbədlər tarixi sərvətimizdir.

Bəli, Ali Baş Komandanın dediyi kimi, kimsənin, xüsusilə də, illərdir işğala göz yumanların, sərvətlərimizin talan edilməsinə səssiz qalanların “narahatlığı”na heç bir əsas və səbəb yoxdur. Azərbaycanda hər il Bakı Humanitar Forumu, Mədəniyyətlərarası Dialoq Forumu keçirilir. Azərbaycanda dünya dini liderlərinin Zirvə görüşləri keçirilib. İslam Əməkdaşlıq Təşkilatı Azərbaycanda İslam dininə olan münasibəti örnək kimi göstərir. Rusiya Pravoslav Kilsəsinin patriarxı Kiril Bakıda olarkən Azərbaycanda bu sahədə görülmüş işlərə yüksək qiymət verib, Pravoslav kilsələrində olub. Roma Papası Fransisk Bakıda olarkən rəsmi çıxışında Azərbaycanda tolerantlıq, dini dözümlülük, multikulturalizm haqqında danışıb.

Belə olan halda, kim bizə irad tuta bilər? Məscidləri bağlayan? Yaxud da ki, müsəlman məscidlərinə öldürülmüş donuzların başlarını atan bizə dərs deyəcək, narahatlıq ifadə edəcək? Bizə heç bir narahatlıq ifadə etmək lazım deyil. Bizim bütün tarixi abidələrimiz dövlət tərəfindən qorunur. Dövlət başçısının göstərişi ilə və dövlət vəsaiti hesabına hazırda iki pravoslav kilsəsi təmir edilir, üçüncü kilsə isə təmir olunub. İnzibati bina tikilir. Müharibə dövründə udin kilsəsi Heydər Əliyev Fondu tərəfindən təmir olunaraq istifadəyə verilib. Qafqaz Albaniyası kilsələri, Gürcü kilsələri bizim milli sərvətimizdir. Erməni kilsəsi də dini-mənəvi əhəmiyyət daşıyır və biz onlara da hər zaman hörmətlə yanaşmışıq.

Ancaq vəhşi, qəbilə, yırtıcı təfəkkürlü düşmən məscidlərimizdə, xüsusilə Ağdam məscidində inək saxlayıb, donuz saxlayıb və bununla da əsl mahiyyətini ortaya qoyub. Onu da xatırlatmaq yerinə düşər ki, bir neçə il bundan əvvəl bədnam Minsk qrupunun həmsədr ölkələrinin səfirləri Ağdam məscidində olublar. Bəs niyə gördükləri barədə, erməni vandalizmi barədə məsələ qaldırmayıblar? Niyə bu, bəzi Qərb liderlərində narahatlıq yaratmayıb? Deməli, müsəlman məscidlərini təhqir etmək olar, inək, donuz saxlamaq olar, dağıtmaq olar?!

Dövlət başçımızın da dediyi kimi, əgər belədirsə, belə də desinlər və getsinlər öz ölkələrində problemlərlə məşğul olsunlar, bizim işimizə qarışmasınlar. Bütün o ölkələrin səylərinə rəğmən gəlmişik, bütün təxribatlara rəğmən gəlmişik, qan tökə-tökə gəlmişik və durmuşuq tarixi torpağımızda, Qarabağımızda! Hərə artıq getsin öz işi ilə məşğul olsun. Bizim işimizə qarışmaq istəyənin cavabını vermişik və verəcəyik.

Necə ki, 44 gün ərzində birlik göstərmişik, azad edilmiş torpaqlarımızın bərpası işində də birlik, əzmkarlıq göstərəcəyik. Bütün şəhərlərimizi bərpa edəcəyik, daha da gözəl şəhərlər olacaq. Şəhərlərimizdə qalan tarixi abidələri bərpa edəcəyik və bir daha gücümüzü göstərəcəyik.

Eşq olsun, Azərbaycan xalqına! Eşq olsun, Azərbaycan əsgərinə, Azərbaycan zabitinə! Eşq olsun, Müzəffər Ali Baş Komandana! Qarabağ bizimdir, Qarabağ Azərbaycandır!”.