X Bakı Beynəlxalq Kitab Sərgisinin Təşkilat Komitəsi AZƏRTAC-a iki sertifikat təqdim edib
Bakı, 8 oktyabr, AZƏRTAC
Oktyabrın 8-də X Bakı Beynəlxalq Kitab Sərgisi çərçivəsində sərginin Təşkilat Komitəsi tərəfindən Azərbaycan Dövlət İnformasiya Agentliyinə - AZƏRTAC-a sərgidə fəal iştirakına görə sertifikat təqdim olunub. AZƏRTAC-a ikinci sertifikat isə sərginin media tərəfdaşı olduğuna görə verilib.
AZƏRTAC xəbər verir ki, sərgi kitabsevərlər, müəlliflər, nəşriyyatlar və media nümayəndələri üçün mükəmməl bir platforma olub. AZƏRTAC-ın stendində ziyarətçilərə Dövlət İnformasiya Agentliyinin fəaliyyəti barədə ətraflı məlumat verilib. AZƏRTAC-ın stendi sərgi boyunca ziyarətçilərin diqqətini çəkərək geniş məlumatlandırma imkanları təqdim edib. Agentliyin əməkdaşları ziyarətçilərə Azərbaycan və dünya ilə bağlı xəbərləri operativ şəkildə, doğru mənbələr əsasında təqdim etdiklərini bildiriblər. Əlavə edilib ki, AZƏRTAC müasir tələblərə uyğun olaraq, keyfiyyətli və etibarlı xəbərlər təqdim etməyi hədəfləyib.
Sərgi zamanı AZƏRTAC-ın əməkdaşları ziyarətçilərlə fəal ünsiyyət quraraq onların suallarını cavablandırıb və müzakirələr aparıblar.
Qeyd edək ki, X Bakı Beynəlxalq Kitab Sərgisi ölkəmizin kitab mədəniyyətini tanıtmaqla yanaşı, müxtəlif ölkələrin mədəniyyətləri ilə də tanış olma imkanı yaradır. AZƏRTAC-ın bu cür tədbirlərdə fəal və uğurla iştirak etməsi, onun müasir informasiya mühitindəki rolundan xəbər verir. Ümumilikdə, sərgi Azərbaycanın mədəni irsinin qorunması və təbliği baxımından önəmli bir platforma olub, eyni zamanda, gənc müəlliflər və nəşriyyatlar üçün yeni imkanların açılmasına səbəb yaradır.
Bölmənin digər xəbərləri
