Bakı, 24 yanvar, Səadət Hakıyeva, AZƏRTAC

Azərbaycanda əsası ümummilli lider Heydər Əliyev tərəfindən qoyulan gənclər siyasəti uğurla həyata keçirilir. Azərbaycan dövləti gənclər siyasətini prioritet istiqamət kimi diqqət mərkəzində saxlayaraq, gənclərin demokratikləşmə prosesində, sosial-iqtisadi sahələrdə uğurlar əldə etməsi üçün dəstəyini əsirgəmir. “Azərbaycanın gələcəyini peşəkar və səriştəli kadrlar yaradacaq”,- deyən Prezident İlham Əliyev hər zaman gənclərin yanında olduğunu və onlara inandığını dəfələrlə vurğulayıb. Ölkə rəhbərinin diqqət və qayğısı sayəsində gənclərimiz idarəetmədə irəli çəkilir, onların potensialından səmərəli istifadə olunur. 2020-ci ilin “Könüllülər ili” elan edilməsi də dövlətimizin gənclər siyasətinin bir hissəsidir və bu, Azərbaycanda könüllülük hərəkatının inkişafına daha da təkan verəcək.

Bu sözləri AZƏRTAC-a müsahibəsində Azərbaycan Gimnastika Federasiyasının Təşkilat Komitəsinin könüllülər proqramının rəhbəri Xaqani Fərəcov deyib.

Könüllülük hərəkatının cəmiyyət üçün əhəmiyyətindən danışan X.Fərəcov deyib: “Könüllük hərəkatına tələbəlik illərindən qoşulmuşam. Universitetin Tələbə Gənclər Təşkilatının üzvü kimi ali təhsil ocağında və ölkədə keçirilən müxtəlif tədbirlərdə iştirak etmişəm. Qısa müddətdə tələbələr arasında rəğbət qazandım və 2006-2009-cu ildə Universitetin Tələbə-Gənclər Təşkilatının sədri kimi fəaliyyət göstərdim. Eyni zamanda, 2006-cı ildə “İRƏLİ” İctimai Birliyinin sıralarına qatılaraq, müxtəlif təşkilatlarda və tədbirlərdə könüllü kimi çalışdım.

“İRƏLİ” İctimai Birliyindən başlayan peşəkar təcrübə

Könüllü olaraq qoşulduğum “İRƏLİ” İctimai Birliyində 2012-2014-cü illərdə əməkdaş kimi çalışaraq gənclər arasında vətənpərvərliyin, könüllülük fəaliyyətinin, sağlam həyat tərzinin təbliği, Azərbaycan həqiqətlərinin tanıdılması, gənclərimizin bilik və təcrübələrinin inkişaf etdirilməsi istiqamətində çoxsaylı müxtəlif layihələrin və tədbirlərin təşkilində iştirak etdim. Bu layihələr arasında “Gənc Liderlərin Qış Universiteti”, “IT Akademiya” və sairlərini qeyd edə bilərəm.

Könüllülərlə iş sahəsində kifayət qədər təcrübəyə malik olan müsahibimin sözlərinə görə, əvvəllər ölkəmizdə insanlar könüllülük hərəkatı barədə o qədər də məlumatlı olmayıblar. 2008-ci ildə Heydər Əliyev Fondunun, Gənclər və İdman Nazirliyinin təşkilatçılığı ilə Dünya Gənclərinin 4-cü Məşğulluq Sammiti (YES) keçirilib. Sammitin təşkilində məqsəd gənclərin işsizlik və səmərəli məşğulluq problemlərinin həlli istiqamətində dünyada daha fəal işin aparılmasına nail olmaq idi. “Azərbaycanın Birinci vitse-prezidenti Mehriban Əliyevanın iştirakı ilə keçirilən Sammitin təşkilinə kömək üçün 300 könüllü tələb olunurdu. Həmin vaxt könüllüləri cəlb etmək üçün xeyli əziyyət çəkdik. Düşünürəm ki, bu tədbir Azərbaycan könüllüləri üçün ilk təcrübə oldu.

2008-ci ildə Azərbaycanda start götürən könüllülük hərəkatı özünün pik nöqtəsinə məhz tarixdə ilk dəfə keçirilən və ölkəmizin ev sahibliyi etdiyi “Bakı-2015” Avropa Oyunlarında çatdı. Birinci Avropa Oyunları özü ilə yeni standartlar gətirdi, yeni mexanizmlər formalaşdırdı.

Xaqani Fərəcov bildirib ki, “Bakı-2015” Avropa Oyunları zamanı o, turnirin Əməliyyat Komitəsinin idman departamentinin, idmançılara xidmət şöbəsində çalışıb. Bu mötəbər yarışın təşkilində könüllülərin iştirakı və dəstəyi çox vacib rol oynadı.

Könüllülükdən Azərbaycan Gimnastika Federasiyasına gedən yol

X.Fərəcov deyir ki, o, Azərbaycan Gimnastika Federasiyası (AGF) ilə məhz könüllülük fəaliyyəti sayəsində əlaqə qurub. 2009-cu ildə Bakıda təşkil olunan bədii gimnastika üzrə Avropa çempionatında könüllü kimi iştirak edib. 2010-2011-ci illərdə güləş, boks, taekvondo idman növləri üzrə beynəlxalq yarışlarda yerli federasiyalarla əməkdaşlıq edib. 2014-cü ildə Milli Gimnastika Arenasının istifadəyə verilməsi, burada yaradılan şərait çoxlu sayda beynəlxalq və yerli yarışların təşkil edilməsinə imkan verib.

“AGF 2016-cı ildən etibarən könüllülərlə mütəmadi işləyən ən fəal federasiyalardan biridir. Federasiya könüllülərlə sıx əməkdaşlıq edir və hər il onların seçimi aparılır. Hazırda yerli təşkilat komitəsinin könüllülər proqramının rəhbəri kimi fəaliyyət göstərirəm. İşim çox maraqlıdır. Savadlı, enerjili gənclərlə işləmək insanda məmnuniyyət hissi oyadır. Federasiyada öz işini bilən, peşəkar könüllülərin sayı kifayət qədərdir. Hər il beynəlxalq yarışlara 100-ə yaxın könüllü cəlb olunur. Ötən il mötəbər yarışlarımız çox olduğundan 1000-ə yaxın könüllünün köməyindən istifadə olunub. Elə bədii gimnastika üzrə dünya çempionatına 300 könüllü cəlb edilib. Könüllülər yarışların təşkili, qonaqların qarşılanması və yerləşdirilməsi, tibb xidməti, eləcə də qaliblərin mükafatlandırılması prosesində yardım edirlər.

AGF rəhbərliyi tərəfindən könüllülərə hər zaman xoş münasibət göstərilir və onlar qayğı ilə əhatə olunurlar. Könüllülər arasından bacarıqlı, işgüzar gənclər seçilərək federasiyada əmək fəaliyyətinə cəlb olunurlar”,- deyə o vurğulayıb.

Azərbaycanın “Könüllü fəaliyyəti haqqında” Qanunun qəbul edildiyi məhdud sayda ölkələrdən biri olduğunu diqqətə çatdıran müsahibimiz vurğulayıb ki, “Könüllülər ili”ndən səmərəli istifadə etmək lazımdır. Onun sözlərinə görə, dünya təcrübəsində olduğu kimi, bu hərəkata təkcə gəncləri deyil, yaşlı insanları da cəlb etmək məqsədəuyğundur. O, ötənilki bədii gimnastika üzrə dünya çempionatında 69 yaşlı rusiyalı xanımın könüllü kimi iştirak etdiyini deyib.

Azərbaycanın hər bir vətəndaşı, hər bir gənci ölkəsi üçün könüllü olmalıdır

“Həyatın bir çox sahələrində könüllülük proqramı fəaliyyət göstərir. Bu, çox müsbət haldır. Düşünürəm ki, könüllülərin fəaliyyətindən uşaq və qocalar evlərində, xəstəxanalarda istifadə olunması yaxşı olardı. Həssas təbəqənin yardıma, köməyə daha çox ehtiyacı var.

Ekoloji təmizlik, qaydalara riayət etmək, ictimai asayişin qorunması hər birimizin borcudur. Əgər sən öz xalqının inkişafı üçün çalışırsansa, bunun özü elə könüllülük deməkdir. Qayğıya ehtiyacı olan insanlara, məsələn, fiziki qüsurlu, əlil, imkansız, kimsəsiz insanlara baş çəkmək, onların problemlərinin həll olunmasına kömək göstərmək hamımızın borcudur. Bir sözlə, Azərbaycanın hər bir vətəndaşı, hər bir gənci ölkəsi üçün könüllü olmalıdır” ,- deyə X.Fərəcov bildirib.