QAN YADDAŞI
XOCALI - ƏSRİN FACİƏSİ
AZƏRTAC xəbər verir ki, fevralın 26-da M.F.Axundov adına Milli Kitabxanada “Xocalı - əsrin faciəsi” adlı tədbir keçirilmişdir.
Kitabxananın direktoru Kərim Tahirov bildirmişdir ki, erməni təcavüzkarlarının Xocalıda Azərbaycan xalqına qarşı törətdikləri bu kütləvi qırğın 613 nəfərin, o cümlədən 106 qadının, 63 uşağın, 70 qocanın həyatına son qoymuş, yüzlərlə insan yaralanmışdır. 1275 dinc sakin əsir götürülmüşdür ki, onlardan 150 nəfərinin taleyi hələ də məlum deyildir.
Bildirilmişdir ki, bu gün 60-dan çox ölkədə Xocalı faciəsi anılmışdır. Mədəniyyət və Turizm Nazirliyi mədəniyyət siyasəti şöbəsinin müdiri Fikrət Babayev alman faşistləri tərəfindən yerlə-yeksan edilən Xatın kəndinin faciəsinin bütün dünyada soyqırım kimi tanındığını vurğulayaraq, Xocalı faciəsinin də soyqırım kimi tanımasının vaxtı çatdığını bildirmişdir.
Tədbirdə Mədəniyyət və Turizm Nazirliyinin dəstəyi ilə çəkilmiş Xocalı faciəsindən bəhs edən “Dua” filmi nümayiş etdirilmişdir.
Sonda tədbir iştirakçıları Qarabağ mözusunda yazılmış və son vaxtlar 80-dən çox müəllifin Xocalı soyqırımına həsr etdiyi kitabların sərgisinə baxmışlar.