Bakı, 27 may (AZƏRTAC). Mayın 27-də Beynəlxalq Mətbuat Mərkəzində Azərbaycan Mətbuat Şurasının və “Multimedia” Mərkəzinin birgə təşkilatçılığı ilə “Yeni media və yeni çağırışlar” mövzusunda konfrans keçirilmişdir.

AZƏRTAC xəbər verir ki, tədbirdə media qurumlarının, dövlət orqanlarının, vətəndaş cəmiyyəti təşkilatlarının və beynəlxalq qurumların nümayəndələri iştirak etmişlər.

Azərbaycan Mətbuat Şurasının sədri Əflatun Amaşov tədbirdə çıxış edərək demişdir ki, ölkəmizdə internet medianın inkişafı daim diqqət mərkəzindədir. Bu gün Azərbaycanda genişzolaqlı internet istifadəçilərinin sayı 50 faizi ötmüşdür. Ölkəmizdə 1 milyon 300 mindən çox insan “Facebook”da qeydiyyatdadır, təxminən 50-dək internet televiziya və radio fəaliyyət göstərir.

Mətbuat Şurasının sədri vurğulamışdır ki, ümummilli lider Heydər Əliyev tərəfindən 2003-cü il fevralın 17-də təsdiq edilmiş “Azərbaycan Respublikasının inkişafı naminə informasiya və kommunikasiya texnologiyaları üzrə Milli Strategiya (2003-2012-ci illər)” ölkəmizdə bu sahənin sürətli inkişafına güclü təkan vermişdir.

Prezident Administrasiyası ictimai-siyasi məsələlər şöbəsinin sektor müdiri Vüqar Əliyev çıxış edərək aktual mövzuya həsr olunmuş konfransın əhəmiyyətindən və müzakirə olunacaq məsələlərin sosial medianın inkişafına verəcəyi töhfələrdən danışmışdır.

Bildirilmişdir ki, Azərbaycan müstəqillik əldə etdikdən sonra ümummilli lider Heydər Əliyevin rəhbərliyi altında azad informasiya mühitinin formalaşdırılması və paralel şəkildə dövlətin informasiya siyasətinin və informasiya təhlükəsizliyinin əsaslarının yaradılması prosesinə başlanılmışdır. Dövlətin informasiya siyasətinin əsas vəzifələri, istiqamətləri və onu həyata keçirəcək vasitələr müəyyənləşdirilmişdir. Sonrakı mərhələdə demokratik cəmiyyət quruculuğuna uyğun olaraq azad informasiya fəaliyyətinin hüquqi-normativ bazası yaradılmış, söz və məlumat azadlığı təmin edilmiş, azad medianın inkişafına, onun iqtisadi və siyasi müstəqilliyinə, beynəlxalq rəqabətədavamlılığının artırılmasına hərtərəfli dəstək göstərilmişdir. Nəticədə qısa zamanda respublikada azad informasiya mühiti formalaşmış, müstəqil media həm kəmiyyət, həm də keyfiyyət baxımından inkişaf etmişdir.

Vüqar Əliyev demişdir: “Azərbaycan informasiya-kommunikasiya texnologiyalarının sürətlə inkişaf etdiyi, bu sahədə innovasiyaların tətbiqinin hərtərəfli stimullaşdırıldığı, azad və keyfiyyətli internetin mövcud olduğu bir ölkədir. Bu gün əhalinin 70 faizinin internetə çıxışı mövcuddur, ölkədə yüzlərlə sayt, portal fəaliyyət göstərir, bloqosfera inkişaf edir, sosial şəbəkələrdən istifadə edənlərin sayı artıq 2 milyona çatmışdır. İKT sahəsində müasir standartların tətbiqi, ilk milli peykin orbitə çıxarılması, internetin infrastrukturunun təkmilləşdirilməsi, mətbuatla bağlı milli proqramların hazırlanması və həyata keçirilməsi nəticəsində dövlət orqanlarının fəaliyyətinin şəffaflaşdırılması və digər tədbirlər həm də yeni medianın imkanlarını genişləndirmiş, onun hərtərəfli inkişafına xidmət etmişdir”.

Müasir medianın qarşısında duran bir sıra mövcud problemləri diqqətə çatdıran Prezident Administrasiyası ictimai-siyasi şöbəsinin sektor müdiri bildirmişdir ki, sosial şəbəkələrdə insanların təhqir olunması, yalan, böhtan xarakterli yazıların yer alması yolverilməzdir, peşə etikasından kənardır və bu cür mənfi halların qarşısı qanunvericiliyin tələblərinə uyğun olaraq alınmalıdır.

Konfransda Rabitə və Yüksək Texnologiyalar Nazirliyinin şöbə müdiri İsfəndiyar Əliyev və Azərbaycan İnternet Forumunun prezidenti, “Multimedia” Mərkəzinin direktoru Osman Gündüz çıxış edərək internet medianın vəziyyətindən, bu sahədə ictimai informasiyaların açıqlanmasından, internet media qurumlarına dövlət dəstəyindən və digər məsələlərdən söz açmışlar.

Sonra konfrans öz işini “İnternet medianın inkişaf meyilləri və perspektivlər”, “Sosial mediadan informasiya əldə edilməsi və informasiyaların yayılmasında səmərəli istifadə imkanları” mövzularında panel iclaslarında davam etdirmişdir.